របបលោកហ៊ុន សែនមិនឲ្យអ្នករាយការណ៍ពិសេសអង្គការសហប្រជាជាតិជួបលោកកឹម សុខា ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាឲ្យដឹងថា របបលោកហ៊ុន សែននឹងមិនអនុញ្ញាតឲ្យអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្ម៊ីតចូលជួបលោកកឹម សុខា ប្រធានគណបក្សសង្គ្រោះជាតិនោះឡើយ។
ក្រុមអ្នកឃ្លាំមើលនិយាយថា ការហាមបេសកជនពិសេសរបស់អង្គការសហប្រជាជាតិមិឲ្យជួបមេដឹកនាំគណបក្សប្រឆាំងដែលកំពុងជាប់ឃុំក្នុងផ្ទះនេះគឺជាការបង្ហាញឲ្យឃើញថា របបលោកហ៊ុន សែនពុំមានភាពស្មើគ្នាក្នុងវិស័យនយោបាយ និងសិទ្ធិ មនុស្សឡើយ។
អ្នកវិភាគឯករាជ្យលោកបណ្ឌិតឡៅ ម៉ុងហៃបានប្រាប់កាសែត The Cambod Daily ថា ការមិនអនុញ្ញាតឲ្យអ្នករាយការណ៍ពិសេសរបស់អង្គការសហប្រជាជាតិចូលជួបជាមួយលោកកឹម សុខានេះគឺជាចេតនាលាក់បាំងដ៏ធំរបស់លោកហ៊ុន សែន។
លោកបន្តថាលោកហ៊ុន សែនគួរគោរពតាមអ្វីដែលខ្លួនបានសន្យាជាមួយភាគីអង្គការសហប្រជាជាតិ ដែលថា នឹងផ្តល់កិច្ចសហការជុំវិញបញ្ហានៃការគោរពសិទ្ធិមនុស្ស។
អ្នកស្រី រ៉ូណា ស្មីតអញ្ជើញមកទស្សនកិច្ចផ្លូវការនៅកម្ពុជាចាប់ពីថ្ងៃទី២៩តុលាដល់ថ្ងៃទី៨ខែវិច្ឆិកា។
អ្នកស្រីគ្រោងជួបមន្ត្រីជាន់ខ្ពស់នៃរបបលោកហ៊ុន សែន តំណាងមន្ត្រីសង្គមស៊ីវិលនិងអ្នកការទូតនៅកម្ពុជា។
មុនពេលអ្នកស្រីចាកចេញពីកម្ពុជាអ្នកស្រីនឹងធ្វើសន្និសីទសារព័ត៌មានស្ដីពីលទ្ធផលនៃដំណើរទស្សនកិច្ចនេះ៕