លោកហ៊ុន សែនកាលពីថ្ងៃទី២៧ខែវិច្ឆិកា បានយល់ព្រមឲ្យមានការដោះស្រាយបញ្ហាណែនចង្អៀតក្នុងពន្ធនាគារ បន្ទាប់ពីចំនួនអ្នកទោសក្នុងពន្ធនាគារនៅទូទាំងប្រទេសមានការកើនឡើងច្រើនទៅៗ។
ការយល់ព្រមរបស់លោកហ៊ុន សែនធ្វើឡើងទៅតាមសំណើរបស់លោកស ខេង រដ្ឋមន្ត្រីក្រសួងមហាផ្ទៃ កាលពីដើមខែវិច្ឆិកា ដែលសម្តែងការព្រួយបារម្ភអំពីចំនួនជនជាប់ឃុំកើនឡើងដល់ទៅជាង៣ម៉ឺននាក់។
លោកស ខេងក៏បានស្នើឲ្យលោកហ៊ុន សែនអនុញ្ញាតឱ្យលោកដឹកនាំកិច្ចប្រជុំអន្តរក្រសួងមួយដែលមានការចូលរួមពីក្រុមមន្រ្តីក្រសួងមហាផ្ទៃ ក្រសួងយុត្តិធម៌ ប្រធានសាលាដំបូងរាជធានី ខេត្ត និងព្រះរាជអាជ្ញា នៃអយ្យការសាលាដំបូងរាជធានី ខេត្ត ក្នុងគោលបំណងពិភាក្សា និងស្វែងរកដំណោះស្រាយសមស្រប ក្នុងការជំរុញឱ្យសាលាក្តីគ្រប់ជាន់ថ្នាក់ ពន្លឿននីតិវិធីដោះស្រាយសំណុំរឿងព្រហ្មទណ្ឌឱ្យឈានដល់ការជំនុំជម្រះឱ្យបានឆាប់រហ័សដើម្បីកាត់បន្ថយចំនួនអ្នកជាប់ឃុំ។
ពាក់ព័ន្ធនឹងបញ្ហានេះ លោកអំ សំអាត មន្រ្តីឃ្លាំមើលសិទ្ធិមនុស្សរបស់អង្គការការពារសិទ្ធិមនុស្សលីកាដូ ដែលតែងឃ្លាំមើលអំពីភាពមិនប្រក្រតីក្នុងពន្ធនាគារក្នុងប្រទេសកម្ពុជា បានសម្តែងការគាំទ្រចំពោះគោលបំណងរបស់រដ្ឋាភិបាលក្នុងការរកដំណោះស្រាយលើបញ្ហាចង្អៀតណែនក្នុងពន្ធនាគារ។
ជាងនេះទៅទៀត លោកបានផ្តល់អនុសាសន៍ដល់រដ្ឋាភិបាលធ្វើការសាងសង់អគារពន្ធនាគារបន្ថែម អនុញ្ញាតឲ្យក្រៅឃុំបណ្តោះអាសន្នករណីបទល្មើសមជ្ឈឹមកម្រិតស្រាលពន្លឿនការជំនុំជម្រះ និងបញ្ឈប់ការឃុំខ្លួនអ្នកទោសលើសរយៈពេលកំណត់៕