អភិបាលខេត្តព្រះសីហនុបានបញ្ជាឲ្យមានការចុះស្រង់ស្ថិតិ និងតម្លៃសណ្ឋាគារ និងផ្ទះសំណាក់ក្នុងខេត្តមួយនេះ ក្រោយពីមានការរិះគន់ជាខ្លាំងថា តម្លៃសេវាកម្មវិស័យទេសចរណ៍នៅទីនោះ បានឡើងថ្លៃខ្ពស់ហួសពីការទទួលយកបានរបស់ភ្ញៀវទេសចរក្នុងស្រុក។
ក្នុងលិខិតបង្គាប់ការចុះថ្ងៃទី២៨ខែវិច្ឆិកា រដ្ឋបាលខេត្តព្រះសីហនុបានបញ្ជាមន្រ្តីរបស់ខ្លួនមួយចំនួន ឲ្យចុះទៅស្រង់តម្លៃបន្ទប់ជួល ផ្ទះសំណាក់ សណ្ឋាគារ រីហ្សត ឬបឹងហ្កាឡូក្នុងខេត្តនេះដើម្បីធ្វើ របាយការណ៍ដល់ថ្នាក់លើសំរាប់ដោះស្រាយក្នុងបុព្វហេតុបញ្ចៀសការភាន់ច្រឡំលើតម្លៃសេវាស្នាក់នៅក្នុងខេត្តព្រះសីហនុ។
ក្រុមសង្គមស៊ីវិលក្នុងស្រុកអះអាងថា អាជ្ញាធរខេត្តព្រះសីហនុគួរតែផ្សព្វផ្សាយឲ្យបានទូលំទូលាយអំពីតម្លៃស្នាក់នៅក្នុងខេត្តទេសចរណ៍មួយនេះx។
ក្រុមប្រជាពលរដ្ឋតែងត្អូញត្អែរថា ពួកគេមិនចង់ទៅកម្សាន្តក្នុងខេត្តព្រះសីហនុដូចកាលពីលើកមុនទៀតនោះទេ ដោយសារតែតំលៃសេវាស្នាក់នៅក្នុងខេត្តនេះបានឡើងខ្ពស់ខុសប្រក្រតី និងមានការអុកឡុកដល់សន្តិសុខ និងសណ្តាប់ធ្នាប់ពីសំណាក់ជនជាតិចិនថែមទៀត។
របាយការណ៍ឆ្នាំ២០១៨របស់ក្រសួងទេសចរណ៍បង្ហាញថា ភ្ញៀវទេសចរចិនដែលចូលមកកម្ពុជាមានចំនួនដល់ទៅជាង១លាននាក់ គឺកើនដល់ទៅជាង៧១% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន៕