នាយករដ្ឋមន្រ្តីវៀតណាម លោក ង្វៀង ស៊ុនហ៊្វុក បានណែនាំឲ្យកម្ពុជាមើលការខុសត្រូវពលរដ្ឋវៀតណាមក្នុងប្រទេសកម្ពុជាឲ្យបានល្អជាពិសេសបញ្ហាជម្លៀសពួកគេពីបឹងទន្លេសាបមករស់នៅលើគោកវិញនោះ។
សារព័ត៌មានវៀតណាម(VNA)កាលពីថ្ងៃទី២៩ បានចុះផ្សាយថា ក្នុងជំនួបរវាងលោកប្រាក់ សុខុន រដ្ឋមន្រ្តីការបរទេសកម្ពុជាជាមួយនាយករដ្ឋមន្ត្រីវៀតណាមនោះ លោក ង្វៀន សួនហ្វុកបានប្រាប់ លោកប្រាក់ សុខុនថា ត្រូវធ្វើការជិតស្និទ្ធជាមួយអាជ្ញាធរមូលដ្ឋានដើម្បីដោះស្រាយករណីបម្លាស់ទីផ្ទះបណ្ដែតទឹករបស់ជនជាតិវៀតណាមពីក្នុងបឹងទន្លេសាបក្នុងខេត្តកំពង់ឆ្នាំងមករស់នៅលើគោកវិញនោះ។
សារព័ត៌មានដដែលរាយការណ៍ថា លោកប្រាក់ សុខុនបានប្រាប់ទៅភាគីវៀតណាមវិញថា អាជ្ញាធររបស់កម្ពុជាកំពុងសង់ទីលំនៅថ្មី សម្រាប់ជនជាតិវៀតណាម ដែលនឹងត្រូវរើទីលំនៅទៅនៅទីគោកវិញទាំងនោះ។
ជាងនេះទៅទៀតលោក ប្រាក់ សុខុន បានសន្យាជាមួយភាគីវៀតណាមថា នឹងធ្វើការងារឲ្យកាន់តែជិតស្និទ្ធបំផុតជាមួយរដ្ឋមន្ត្រីការបរទេសវៀតណាមដើម្បីដោះស្រាយបញ្ហាជនជាតិវៀតណាមក្នុងទឹកដីខ្មែរ៕