កម្ពុជា និងនេប៉ាល់បានចុះកិច្ចព្រមព្រៀងកិច្ចសហប្រតិបត្តិការហោះហើរត្រង់លើវិស័យអាកាសចរស៊ីវិល។
កិច្ចព្រមព្រៀងនេះធ្វើឡើងនៅក្នុងជំនួបរវាងលោក ហ៊ុន សែន ជាមួយលោកស្រី ប៊ីធីយ៉ា ទេវីបាន់ដារី(Bidhya Devi Bhandari)ប្រធានាធិបតីរបស់ប្រទេសនេប៉ាល់កាលពីថ្ងៃទី៣០ខែវិច្ឆិកា។
លោកហ៊ុន សែន អះអាងថា កិច្ចព្រមព្រៀងនេះជាផ្នែកមួយដែលជំរុញទំនាក់ទំនងរវាងប្រជាជន និងប្រជាជននៃប្រទេសទាំងពីរក្នុងវិស័យពាណិជ្ចកម្ម និងសេដ្ឋកិច្ច។
ចំណែកលោកស្រីប្រធានាធិបតីនេប៉ាល់ ក៏បានជំរុញឱ្យប្រទេសទាំងពីរមានទំនាក់ទំនងល្អកាន់តែខ្លាំងក្លាបន្ថែមទៀត។
លោកស្រីបានបន្តថា ប្រទេសនេប៉ាល់គឺជាទឹកដីនៃព្រះពុទ្ធ និងទស្សនវិជ្ជារបស់ព្រះពុទ្ធ ដូច្នេះប្រទេសនេប៉ាល់ពិតជារីករាយជាខ្លាំងលើការចុះហត្ថលេខា ក្នុងការតភ្ជាប់លើការហោះហើររវាងប្រទេសកម្ពុជា និងនេប៉ាល់ ព្រមទាំងជំរុញឱ្យពាណិជ្ជករនេប៉ាល់ចូលរួមក្នុងវិស័យនេះផងដែរ។
កម្ពុជា និងនេប៉ាល់បានភ្ជាប់ទំនាក់ទំនងការទូតជាមួយគ្នានៅឆ្នាំ១៩៦៤ ហើយប្រទេសទាំងពីរបានភ្ជាប់ទំនាក់ទំនងការទូតជាមួយគ្នាឡើងវិញ នៅខែកញ្ញា ឆ្នាំ១៩៩៩ បន្ទាប់ពីមានការអាក់ខានមួយរយៈ៕