សាលាដំបូងរាជធានីភ្នំពេញនឹងបើកសវនការ ជំនុំជម្រះលើសំណុំរឿងមេដឹកនាំសហជីពធំៗចំនួន៦រូប នៅកម្ពុជា នៅថ្ងៃទី៧ ខែធ្នូ ឆ្នាំ២០១៨ខាងមុខ។
លិខិតរបស់លោកលី សុផាណា តំណាងអយ្យការអមសាលាដំបូងរាជធានីភ្នំពេញ ដែលអញ្ជើញលោកជួង ជូងី មេធាវីការពារក្តីឲ្យលោកអាត់ ធន់ និងលោកប៉ាវ ស៊ីណាឱ្យដឹងថា មេដឹកនាំសហជីពដែលត្រូវបើកសវនាការនៅថ្ងៃទី៧ ខែធ្នូនោះ រួមមានលោក អាត់ ធន់ លោក ម៉ម ញឹម លោក ប៉ាវ ស៊ីណាលោក ជា មុនី លោក រ៉ុង ឈុន និងលោកស្រីយ៉ាង សោភ័ណ្ឌ ដែលពួកគេត្រូវបានចោទប្រកាន់ពីបទប្រព្រឹត្តអំពើហិង្សាដោយចេតនាមានស្ថានទម្ងន់ទោស បទធ្វើឱ្យខូចខាត ដោយចេតនាមានស្ថានទម្ងន់ទោស បទគំរាមកំហែងថា នឹងធ្វើឱ្យខូចខាតដែលភ្ជាប់នូវបញ្ហាអ្វីមួយ និងបទប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ ដែលធ្វើឡើងនៅមុខសួនឧស្សាហកម្មកាណាឌីយ៉ាស្ថិតលើផ្លូវវ៉េងស្រេង កាលពីថ្ងៃទី២៥ខែធ្នូឆ្នាំ២០១៣ដល់ថ្ងៃទី១៣ខែមករាឆ្នាំ២០១៤។
កាលពីពេលថ្មីៗនេះ លោក ហ៊ុន សែនបានស្នើឱ្យក្រសួងពាក់ព័ន្ធ បញ្ចប់រឿងក្តីរបស់សហជីពនៅតុលាការត្រឹមឆ្នាំ២០១៨។
ក្រុមសហជីពទាំងនេះសង្ឃឹមថា តុលាការនឹងទម្លាក់ចោលបទចោទប្រកាន់ប្រឆាំងមកលើពួកគេទាំងស្រុងដើម្បីអាចឲ្យពួកគេ មានសេរីភាពបំពេញការងារដូចពលរដ្ឋទូទៅ៕