ប្រធានអង្គការតម្លាភាពកម្ពុជាលោកព្រាប កុលបានព្យាករណ៍ថា លោកកឹម សុខាអាចនឹងត្រូវដោះលែងនៅមុនបុណ្យចូលឆ្នាំខ្មែរ ក្នុងអំឡុងខែមេសា ឆ្នាំ២០១៩ខាងមុខ ហើយប្រហែលជាមានតែក្រុមរបស់លោកកឹម សុខាទេ ដែលអាចមានសិទ្ធិធ្វើនយោបាយឡើងវិញ ក្រោយការធ្វើ វិសោធនកម្មច្បាប់គណបក្សនយោបាយត្រង់មាត្រា៤៥ថ្មី(ស្ទួន)។
រដ្ឋមន្រ្តីក្រសួងមហាផ្ទៃលោកស ខេង កាលពីថ្ងៃទី៤ខែធ្នូនិយាយថា ក្នុងចំណោមមន្រ្តីចំនួន១១៨រូបរបស់គណបក្សសង្គ្រោះជាតិមានមន្រ្តី មួយចំនួនធំបានអនុវត្តតាមសាលក្រមរបស់តុលាការកំពូលក្រោយពីតុលាការមួយនេះ បានរំលាយគណបក្សសង្រ្គោះជាតិ និងបិទសិទ្ធិធ្វើនយោបាយ របស់មន្រ្តីបក្សសង្គ្រោះជាតិទាំង១១៨រូបកន្លងមកនោះ។
លោកព្រាប កុលបានសរសេរនៅគណនីហ្វេសប៊ុករបស់លោកកាលពីថ្ងៃទី៥ ខែធ្នូថា ច្បាប់វិសោធនកម្មមាត្រា៤៥ថ្មី(ស្ទួន)នៃច្បាប់គណបក្សនយោបាយ នឹងត្រូវអនុមត័ក្នុងពេលឆាប់ៗនេះ ដើម្បីផ្តល់សិទ្ធិធ្វើនយោបាយឲ្យអតីតថ្នាក់ដឹកនាំគណបក្សសង្គ្រោះជាតិ ប៉ុន្តែមិនមែនទាំង១១៨នាក់នោះទេ។ លោកបញ្ជាក់ថា ភាគច្រើននៃអ្នកដែលទទួលបានសិទ្ធិធ្វើនយោបាយមកវិញមុនគេ គឺក្រុមមន្រ្តីដែលស្មោះស្ម័គ្រជាមួយលោកកឹម សុខា។
លោកបន្តថា ប្រសិនបើក្រុមអ្នកគាំទ្រលោកសម រង្ស៊ី និងក្រុមអ្នកគាំទ្រលោកកឹម សុខាបន្តធ្វើសង្រ្គាមពាក្យសម្តីដាក់គ្នាទៀត លទ្ធផលចុងក្រោយ គឺជម្លោះនេះកាន់តែរីករាលដាលឡើងៗរហូតឈានទៅដល់ការចែកផ្លូវគ្នាដើរ។
លោកបន្តថា ប្រជាប្រិយភាពរបស់លោកសម រង្ស៊ីមិនបានធ្លាក់ចុះទេ ហើយគាត់នៅតែមានអ្នកគាំទ្រច្រើន ទាំងនៅក្នុង និងនៅក្រៅប្រទេស ដូច្នេះបើក្រុមលោកកឹម សុខាសម្រេចចូលប្រឡូកនយោបាយវិញដោយទុកលោកសម រង្ស៊ីឲ្យនៅក្រៅឆាក ហើយលទ្ធផលបោះឆ្នោតលើកក្រោយ គឺច្បាស់ជាចាញ់បក្សកាន់អំណាចបច្ចុប្បន្នមិនខាន៕