កម្ពុជានិងវៀតណាម កាលពីថ្ងៃទី៧ខែធ្នូបានព្រមព្រៀងគ្នាលើអនុស្សរណៈចំនួន ៦ដែលរួមមានអនុស្សរណៈនៃការយោគយល់គ្នាស្តីពីយុទ្ធសហប្រតិបត្តិការលើវិស័យដឹកជញ្ជូនសម្រាប់រយៈពេល៧ឆ្នាំពីឆ្នាំ២០១៨-២០២៥។
អនុស្សរណៈទាំងនោះរួមមានអនុស្សរណៈស្តីពីវិសោធនកម្មពិធីសារឆ្នាំ២០០៥ សម្រាប់ការអនុវត្តកិច្ចព្រមព្រៀងនៃការដឹកជញ្ជូនតាមផ្លូវគោកឆ្នាំ១៩៩៨ អនុស្សរណៈស្តីពីវិសោធនកម្មកិច្ចព្រមព្រៀងស្តីពីការដឹកជញ្ជូនផ្លូវទឹកឆ្នាំ២០០៩ អនុស្សរណៈស្តីពីកិច្ចព្រមព្រៀងពាណិជ្ជកម្មតាមព្រំដែនកម្ពុជា-វៀតណាម អនុស្សរណៈស្តីពីការសម្របសម្រួលជំរុញពាណិជ្ជកម្មទ្វេភាគីរវាងកម្ពុជា-វៀតណាមសម្រាប់ឆ្នាំ២០១៨-២០១៩ក្នុងអនុគ្រោះពន្ធឲ្យគ្នាទៅវិញទៅមក ហើយចុងក្រោយគឺអនុស្សរណៈស្តីពីកិច្ចព្រមព្រៀងក្នុងការទប់ស្កាត់ការជួញដូរ ការជីកកកាយដោយខុសច្បាប់ និងការនាំត្រឡប់មកវិញ នូវសម្បត្តិបេតិកភណ្ឌនៃប្រទេសទាំងពីរកម្ពុជាវៀតណាម។
អនុស្សរណៈនេះធ្វើឡើងខណៈលោកហ៊ុន សែនកំពុងធ្វើទស្សនកិច្ច ផ្លូវការអមដោយមន្រ្តីគ្រាគ់ៗរបស់លោកទៅកាន់ប្រទេសវៀតណាម។
ក្រុមអ្នកឃ្លាំមើលនិយាយថា ដំណើរទស្សនកិច្ចផ្លូវការរបស់លោកហ៊ុន សែន ទៅកាន់ប្រទេសវៀតណាមគឺដើម្បីលួងប្រទេសវៀតណាមកុំឲ្យយល់ច្រឡំថា កម្ពុជាអនុញ្ញាតឲ្យប្រទេសចិនបោះមូលដ្ឋានកងទ័ពជើងទឹកនៅកម្ពុជា និងការលួងចិត្តមេដឹកនាំវៀតណាម ខណៈសមត្ថកិច្ចរបស់កម្ពុជាកំពុងបោះពួយជម្លៀសជនអន្តោប្រវេសន៍ វៀតណាមខុសច្បាប់ដែលកំពុងរស់នៅលើបឹងទន្លេសាបឲ្យឡើងគោកវិញនោះ។
លោកហ៊ុន សែនអះអាងថា លោកបានប្រាប់លោកង្វៀន សួនហ្វុក នាយករដ្ឋមន្ត្រីវៀតណាមថា កម្ពុជាមិនអនុញ្ញាតឲ្យមានមូលដ្ឋានយោធាបរទេស នៅលើទឹកដីខ្មែរ ហើយថា ព័ត៌មានដ៏អាក្រក់ដែលបាន ចោទប្រកាន់កម្ពុជា នឹងបញ្ចប់ទៅវិញក្នុងពេលឆាប់ៗនេះ៕