សមាជិកសភាអាស៊ានលោកCharles Santiagoកាលពីថ្ងៃទី១៣ខែធ្នូបានរិះគន់ចំពោះការអនុម័តលើវិសោធនកម្មច្បាប់ស្តីពីគណបក្សនយោបាយនៅកម្ពុជា ថា ធ្វើឡើងដើម្បីស្វែងរកការគាំទ្រពីសហគមន៍អន្តរជាតិនិងដើម្បីបញ្ចៀសការដាក់ទណ្ឌកម្មផ្នែកសេដ្ឋកិច្ចប៉ុណ្ណោះ។
ការអះអាងរបស់សមាជិកសភាអាស៊ានរូបនេះធ្វើឡើងក្រោយពីរដ្ឋសភាឯកបក្សនៃរបបលោកហ៊ុន សែនបានអនុម័តលើសំណើវិសោធនកម្មច្បាប់ស្តីពីគណបក្សនយោបាយត្រង់មាត្រា៤៥ថ្មីស្ទួនដើម្បីបើកផ្លូវឲ្យថ្នាក់ដឹកនាំអតីតគណបក្សសង្គ្រោះជាតិចំនួន១១៨រូបបានវិលត្រឡប់ចូលប្រឡូកក្នុងឆាកនយោបាយឡើងវិញ។
លោកCharles Santiagoដែលជាប្រធានអង្គការសមាជិកសភាអាស៊ាន ដើម្បីសិទ្ធិមនុស្សហៅកាត់ថាAPHRបានប្រាប់សារព័ត៌មានក្នុងស្រុកថា សំណើកែប្រែច្បាប់នេះត្រូវបានធ្វើឡើងដើម្បីបានការបន្ធូរបន្ថយសម្ពាធរបស់សហគមន៍អន្តរជាតិតែប៉ុណ្ណោះ ហើយថា ច្បាប់នេះនឹងគ្មានផលវិជ្ជមានសម្រាប់នយោបាយនៅកម្ពុជាក្នុងរយៈពេលយូរអង្វែងនោះឡើយ។
តុលាការកំពូលសម្រេចរំលាយចោលគណបក្សសង្គ្រោះជាតិកាលពីខែវិច្ឆិកា ឆ្នាំ២០១៧ទៅតាមបណ្ដឹងរបស់ក្រសួងមហាផ្ទៃទាក់ទងការចោទថា គណបក្សនេះពាក់ព័ន្ធនឹងអំពើក្បត់ជាតិ។ របបលោកហ៊ុនសែន បានហែកអាសនៈរបស់គណបក្សប្រឆាំងដ៏ធំមួយនេះទៅឲ្យគណបក្សតូចតាចដទៃទៀតដែលគ្មានសំឡេងក្នុងរដ្ឋសភា និងបានហាមមន្រ្តីរបស់គណបក្សនេះទាំង១១៨រូបមិនឲ្យធ្វើនយោបាយថែមទៀត។
ប្រធានស្តីទីគណបក្សសង្គ្រោះជាតិលោកសម រង្ស៊ី កាលពីពេលថ្មីៗនេះបានហាមមិនឲ្យក្រុមមន្រ្តីបក្សសង្គ្រោះជាតិទាំង១១៨រូបនេះទទួលយកការអនុម័តសេចក្តីព្រាងច្បាប់បែបបោកបញ្ឆោតនោះទេ ដរាបណាមិនមានការដោះលែងលោកកឹម សុខាជាមុនសិន។ ប៉ុន្តែលោកគង់ គាំ ដែលជាអតីតប្រធានគណបក្សសម រង្ស៊ីនិងជាមនុស្សជំនិតរបស់លោកសម រង្ស៊ីពីមុននិងជាមនុស្សមា្នក់ក្នុងចំណោមមនុស្សទាំង១១៨រូបដែរនោះ ប្រកាសថា លោកត្រៀមខ្លួនជាស្រេចក្នុងការស្នើសុំសិទ្ធិធ្វើនយោបាយឡើងវិញ។
លោកសម រង្ស៊ី កាលពីម្សិលមិញបានអះអាងតាមរយៈសេចក្តីថ្លែងការណ៍ថា ដើម្បីឲ្យដំណោះស្រាយនយោបាយនៅកម្ពុជាអាចទទួលយកបាន លុះត្រា អាជ្ញាធររបស់លោកហ៊ុន សែនដោះលែងលោកកឹម សុខា ប្រធានគណបក្សសង្គ្រោះជាតិជាបន្ទាន់ និងដោយឥតលក្ខខណ្ឌទម្លាក់ចោលរាល់ការចោទប្រកាន់មកលើមន្ត្រី និងសកម្មជនទាំងអស់នៃគណបក្សសង្គ្រោះជាតិ បើកផ្លូវឲ្យគណបក្សសង្គ្រោះជាតិ ដំណើរការឡើងវិញ។ប្រគល់សងសកម្មជនគណបក្សសង្គ្រោះជាតិនូវតំណែងនិងតួនាទីទាំងអស់ ដែលបានមកពីការបោះឆ្នោតដោយប្រជាពលរដ្ឋ ហើយដែលត្រូវបានរបបឯកបក្ស ប្លន់យកទៅចែកចាយឲ្យបក្ខពួករបស់ខ្លួនរៀបចំការបោះឆ្នោតព្រឹទ្ធសភានិងរដ្ឋសភាឡើងវិញ ដោយមានការចូលរួមពីគណបក្សសង្គ្រោះជាតិ ហើយដោយមានការត្រួតពិនិត្យ ពីសហគមន៍អន្តរជាតិថែមទៀត៕