រដ្ឋាភិបាលបារាំងបង្ហាញពីការព្រួយបារម្ភខ្លាចកម្ពុជាបាត់បង់ប្រព័ន្ធអនុគ្រោះពន្ធលើទំនិញគ្រប់ប្រភេទរបស់កម្ពុជាទៅកាន់ទីផ្សារអឺរ៉ុប ឬហៅថា EBAប្រសិនបើកម្ពុជាមិនអាចកែប្រែច្បាប់មួយចំនួនដើម្បីធានាឲ្យមានដំណើរការប្រជាធិបតេយ្យនៅកម្ពុជាតបតាមលក្ខខណ្ឌរបស់សហភាពអឺរ៉ុបដែលចង់បាន។
អនុប្រធានសភាបារាំង លោកSylvainWAERMANបានប្រាប់លោក ឈាង វុន ប្រធានគណៈកម្មការបរទេសសហប្រតិបត្តិការអន្តរជាតិ ឃោសនាការ និងព័ត៌មានរបស់រដ្ឋសភាថាប្រព័ន្ធអនុគ្រោះពន្ធ EBAនេះមានសារៈសំខាន់ណាស់ដល់តម្លៃសេដ្ឋកិច្ចរបស់កម្ពុជា ជាពិសេសសម្រាប់់ជីវិតកម្មករ និងកសិករខ្មែរទូទាំងប្រទេស។
អនុប្រធានសភាបារាំងរូបនេះក៏បានចូលជួបលោក ស ខេង រដ្ឋមន្រ្តីក្រសួងមហាផ្ទៃដែរ ហើយលោក ស ខេង បានបញ្ជាក់ថា កម្ពុជាមិនអាចងាកចេញពីមាគ៌ាប្រជាធិបតេយ្យសេរីពហុបក្សបានឡើយ ពីព្រោះមានតែប្រជាធិបតេយ្យទេ ដែលអាចនាំកម្ពុជាទៅរកសុខសន្តិភាព។
អនុប្រធានរដ្ឋសភាបារាំង លោក Sylvain WAERMANមកបំពេញទស្សនកិច្ចជាផ្លូវការនៅកម្ពុជា រយៈពេល៦ថ្ងៃ ចាប់ពីថ្ងៃទី១៥ ដល់ទី២០ ខែធ្នូ ឆ្នាំ២០១៨ ដើម្បីរឹតចំណងមិត្តភាព និងកិច្ចសហប្រតិបត្តិការរវាងស្ថាប័ននីតិប្បញ្ញត្តិកម្ពុជានិងបារាំង៕