ក្រុមហ៊ុនបណ្ដាញផ្សព្វផ្សាយកម្ពុជា(Cambodia Broadcasting Service ឬហៅកាត់ថា CBSកាលពីថ្ងៃទី២២ខែធ្នូបាន ចេញសេចក្តីថ្លែងការណ៍ជាបន្ទាន់មួយបដិសេធថា សមត្ថកិច្ចរបស់លោកហ៊ុន សែន មិនបានចាប់ខ្លួនលោកគិត ម៉េងនោះទេ។
ក្រុមហ៊ុនបណ្តាញផ្សព្វផ្សាយកម្ពុជាគឺក្រុមបណ្តុំទូរទស្សន៍ក្នុងស្រុកមួយចំនួនដែលមានភាគហ៊ុនរបស់លោកឧកញ៉ាគិត មេង ដែលរួមមានទូរទស្សន៍CNC,CTN,MyTV និង One TV។
សេចក្ដីបំភ្លឺចុះថ្ងៃទី២២ ខែធ្នូ របស់ក្រុមហ៊ុន CBSដែលThe Cambodia Dailyទើបទទួលបានអះអាងថា The Cambodia Dailyនិងគណនីហ្វេសប៊ុកមួយឈ្មោះ CBN Khmerបានផ្សព្វផ្សាយព័ត៌មានមួលបង្កាច់ និងប្រមាថកិត្តិយដល់លោកឧកញ៉ាគិត ម៉េង។ ក្រុមហ៊ុនCBSបកស្រាយថា លោកគិត ម៉េងកំពុងតែសប្បាយរីករាយជាមួយគ្រួសារនៅខេត្តសៀមរាបដោយមិនមានការចាប់ខ្លួននោះឡើយ។
ទោះជាយ៉ាងណាក៏ដោយThe Cambodia Dailyមិនបានចុះផ្សាយថា លោកឧកញ៉ាគិត ម៉េងត្រូវបានសមត្ថកិច្ចនៃរបបលោកហ៊ុន សែន ចាប់ខ្លួននោះទេ។
សេចក្តីថ្លែងការណ៍របស់ក្រុមហ៊ុន CBSធ្វើឡើងក្រោយពីសំឡេងរបស់លោកហ៊ុន សែនត្រូវបានផ្សព្វផ្សាយនៅលើការផ្សាយបន្តបន្ទាប់តាមបណ្តាញសង្គមហ្វេសប៊ុករបស់The Cambodia Dailyកាលពីថ្ងៃទី២២ ខែធ្នូ ក្រោយពីប្រភពដ៏គួរឲ្យជឿទុកចិត្តបានផ្ញើសារសំឡេងរបស់លោកហ៊ុន សែនមកឲ្យស្ថានីយ៍ផ្សាយរបស់The Cambodia Dailyកាលពីថ្ងៃទី២១អំពីករណីអន្តរាគមន៍ជម្លោះផ្ទៃក្នុងរបស់ទូរទស្សន៍ឯកជនCNC។
សារសំឡេងរបស់លោកលោកហ៊ុន សែនប្រវែងជាង១៥នាទីនោះ បានបញ្ជាឲ្យលោកឧកញ៉ាគិត ម៉េង ដកអគ្គនាយកថ្មីនៃស្ថានីយ៍ទូរទស្សន៍CNCឈ្មោះអ៊ុក វូរ៉ា ដែលត្រូវជាក្មួយរបស់សមាជិកគណៈអចិន្ត្រៃយ៍បក្សប្រជាជនកម្ពុជាអ្នកស្រីម៉ែន សំអន ចេញពីតួនាទី ដោយចោទថា លោកបានរំលោភសិទ្ធិបុគ្គលិកធ្ងន់ធ្ងរ។ លោកហ៊ុន សែនក៏បានព្រមានថា ប្រសិនបើលោកគិត ម៉េងមិនចាត់វិធានលើបញ្ហានេះ នោះមានន័យថា លោកគិត ម៉េងនឹងក្លាយជាសត្រូវរបស់លោកហ៊ុន សែន។
លោកហ៊ុន សែនអះអាងថា ការគ្រប់អាជីវកម្មរកស៊ីរបស់លោកគិត ម៉េងទាំងអស់គឺស្ថិតក្នុងកណ្តាប់ដៃរបស់លោក។ លោកហ៊ុន សែន អះអាងថា កុំថាឡើយត្រឹមក្មួយអ្នកស្រីម៉ែន សំអន សូម្បីបិតាព្រះមហាក្សត្រ មាតាព្រះមហាក្សត្រក៏លោកអាចចាត់ការបានដែរ៕