28 C
Phnom Penh

ក្រុម​ប្រឹក្សា​ឃ្លាំមើល​កម្ពុជា​បារម្ភ​អំពី​បញ្ហា​អ​សន្តិសុខ​សង្គម​ដោយសារ​ ការ​ហូរចូល​របស់​ជនជាតិ​ចិន​ជាច្រើន​

ដោយ ឌឹ ខេមបូឌា ដេលី

បទវិភាគ

ក្រុម​ប្រឹក្សា​ឃ្លាំមើល​កម្ពុជា​បង្ហាញ​ក្តី​បារម្ភ​ថា​ ចំនួន​ប្រជាជន​ចិន​កើន​ឡើង​ច្រើន​ក្នុង​រយៈ​ពេល​ខ្លី ​អាច​នឹង​នាំឲ្យ​មាន​វិបត្តិ​នៅក្នុង​សង្គម​ពេលអនាគត។​

ប្រធាន​ក្រុម​ប្រឹក្សា​ឃ្លាំមើល​កម្ពុជា​លោក​រ៉ុង ឈុន​អះអាង​ថា​  លំហូរ​ជន​ជាតិចិន​មក​កាន់​ប្រទេស​កម្ពុជា​ កំពុង​ធ្វើឲ្យ​ខេត្ត​ក្រុង​របស់​ខ្មែរ​មួយ​ចំនួន​គ្មាន​សណ្តាប់​ធ្នាប់ ​និង​កំពុង​បង្ក​អ​សន្តិសុខ​ជា​ច្រើន។​ លោក​បន្តថា​ វត្តមាន​របស់​ជនជាតិ​ចិន​ដ៏​ច្រើន​សន្ធឹក​សន្ធាប់​មក​កាន់​ប្រទេសកម្ពុជា​នេះ​នឹង​ធ្វើឲ្យ​ប៉ះ​ទង្គិច​ធ្ងន់ធ្ងរ​ដល់​ការ​ប្រកប​មុខ​របរ​ជួញ​ដូរ​របស់​ពលរដ្ឋ​ខ្មែរ។​

សេចក្តី​ថ្លែង​ការណ៍​របស់​ក្រុម​ប្រឹក្សា​ឃ្លាំ​មើល​កម្ពុជា​ចេញ​ផ្សាយ​នៅ​ថ្ងៃពុធ​នេះ​​អះអាង​ថា ​ស្រប​ពេល​កំណើន​ជន​ជាតិ​ចិន​កើន​ឡើង​ច្រើន​ ហើយ​ច្បាប់​កម្ពុជា​ធូរ​រលុង​នោះ ​នឹង​នាំឲ្យ​មាន​វិបត្តិ​សង្គម​ធ្ងន់ធ្ងរ​នៅពេល​ខាងមុខ​ចៀស​មិន​រួច។​ សេចក្តី​ថ្លែង​ការណ៍​ដដែល​បន្ត​ថា​  នៅពេល​ខាង​មុខពល​រដ្ឋខ្មែរ​នឹង​ក្លាយ​ជា​ជនភាគ​តិច​លើទឹក​ដី​របស់​ខ្លួន​មិន​ខាន។​

ប្រធាន​ក្រុម​ប្រឹក្សា​ឃ្លាំមើល​កម្ពុជា​លោក​រ៉ុង ឈុន​ បាន​ជំរុញ​ឲ្យ​រដ្ឋាភិបាល​លោក​ហ៊ុន សែន​ ត្រូវតែ​មាន​វិធាន​ការ​ដោះស្រាយ​វិបត្តិ​សង្គម​មួយ​នេះ​ឲ្យបាន​លឿន​ជាទី​បំផុត​ដើម្បី​កុំ​ឲ្យ​បញ្ហា​នេះ​រីករាល​ដាល​ទៅថ្ងៃ​មុខ​កាន់តែ​ធំទៅៗ​ពិបាក​ដោះ​ស្រាយ។​

របាយ​ការណ៍​របស់​ក្រសួង​មហា​ផ្ទៃដែល​បាន​ចេញ​ផ្សាយ​កាលពី​ខែ​កញ្ញា​ឆ្នាំ​២០១៨​បង្ហាញ​ថា ​ជនជាតិ​ចិន​នៅ​កម្ពុជា​មាន​ជំនួន​ ២១​ម៉ឺន​នាក់។​

រដ្ឋាភិបាល​កម្ពុជា​ធ្លាប់​អះអាង​ថា​ ជន​ជាតិចិន​នឹង​មក​ដល់​ប្រទេស​កម្ពុជា​ជាង​បី​លាន​នាក់​ទៀត​នៅ​ឆ្នាំ​២០២០​ខាង​មុខ។​ លោក​ហ៊ុន សែន​ធ្លាប់​អះអាង​ថា ​ចំនួន​ជនជាតិ​ចិន​នៅ​កម្ពុជា​មិនមាន​អ្វីដែល​ត្រូវ​មាន​ការ​ព្រួយ​បារម្ភ​នោះ​ទេ​ ពីព្រោះ​ពួកគេ​មក​ធ្វើការ​ប៉ុណ្ណោះ​ ហើយ​ថា​ ពេល​ចប់​ការងារ​ ពួកគេ​នឹង​វិល​ត្រឡប់​ទៅ​ប្រទេស​កំណើត​វិញ។​

កាលពី​ដើម​ខែ​ធ្នូ​នេះ​ សមត្ថ​កិច្ច​ក្រសួង​មហា​ផ្ទៃ​បាន​បណ្តេញ​ចេញ​ជនជាតិ​ចិន​ចំនួន​២៣២​នាក់​ ក្នុង​នោះ​ស្រី​៣៨​នាក់​ ចេញ​ពី​កម្ពុជា​ទៅ​កាន់​ប្រទេស​ចិន​វិញ​ ពាក់​ព័ន្ធ​ករណី​ឆបោក​គំរាម​កំហែង​ និង​ជំរិត​ទារប្រាក់​តាម​ប្រព័ន្ធ​​​ទូរគមនាគមន៍​វ៉យ​(VOIP)​ក្រោយ​ពេល​ពួកគេ​ត្រូវ​បាន​ចាប់​ខ្លួន​ក្នុង​ ស្រុក​ត្រាំកក់​ និង​ស្រុក​បាទី ខេត្ត​តាកែវ។​

របាយ​ការណ៍​នាយកដ្ឋាន​អន្តោ​ប្រវេសន៍​ឲ្យ​ដឹង​ថា ​ចាប់តាំង​ពី​ឆ្នាំ​ ២០១៤​មក​សមត្ថ​កិច្ច​បាន​ឃាត់​ខ្លួន​ និង​បណ្ដេញ​ជន​បរទេស​ទៅ​ប្រទេស​កំណើត​វិញ​សរុប​ចំនួន​ជិត​១​ម៉ឺន​៥​ពាន់​នាក់​ក្នុង​នោះ​មាន​ស្រីជាង​២​ពាន់​៥​រយ​នាក់ ​ហើយ​ពួក​គេ​ភាគ​ច្រើន​ជា​ជនជាតិ​ចិន៕​

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស