30 C
Phnom Penh

លោក​ហ៊ុន សែន​ព្រមាន​ចាប់​ខ្លួន​លោក​សម រង្ស៊ី​ ប្រសិន​បើ​ហ៊ាន​ចូល​ប្រទេស​

ដោយ ឌឹ ខេមបូឌា ដេលី

បទវិភាគ

លោក​ហ៊ុន សែន កា​លពី​ព្រឹក​ថ្ងៃ​ពុធ​នេះ ​ក៏​បាន​ព្រមាន​វាយ​ខ្នោះ ​លោក​សម រង្ស៊ី​ ប្រសិន​បើ​ប្រធាន​ស្តីទី​របស់​គណបក្ស​ប្រឆាំង​រូប​នេះ​ហ៊ាន​ចូល​ស្រុក​វិញ​ ដូច​ការ​អះអាង​មែន​នោះ។​

ទោះជាយ៉ាង​ណាក៏​ដោយ ​លោក​ហ៊ុន សែន​បាន​ថ្លែង​ដោយ​មិន​បញ្ចេញ​ឈ្មោះ ​ប៉ុន្តែ​ទំនង​ជា​សំដៅ​ទៅ​លោក​សម រង្ស៊ី​ថា​ គេ​បាន​ប្រកាស​ថា ​គេ​នឹង​ចូល​មក​កម្ពុជា​វិញ​ឆាប់ៗ​ ហើយ​លោក​ក៏​ត្រៀម​ខ្នោះ​រួច​រាល់​ហើយ​សម្រាប់​ទទួល​ដើម្បី​ទូទាត់​បញ្ជី​ចាស់។ ​ លោក​អះអាង​ថា ​​ព្រលាន​យន្តហោះ​មាន​៣​សម្រាប់​ចុះ​ចត​ ​១​ទីក្រុង​ភ្នំពេញ​ ទី២​សៀមរាប​ ទី​ក្រុង​ព្រះ​សីហនុ​ អាច​ចុះចត​បាន​ទៅ​តាម​បំណង​របស់​អ្នក​ជិះ  ​តែ​ខ្នោះក៏​វា​ទៅ​តាម​ទីកន្លែង​នោះ​ដែរ ​ហើយ​បើ​ដាក់​ខ្នោះ ​ដាក់​តាម​ស្ទីល​អាមេរិកាំង​ទៀត​ផង។​

លើស​ពី​នេះទៅ​ទៀត​ លោក​ហ៊ុន សែន​ក៏បាន​ញុះញង់​ឱ្យ​លោក​សម រង្ស៊ី ​និង​​លោក​កឹម សុខា​បែក​គ្នា​ដែរ។​ លោក​អះអាង​ថា​ ប្រសិន​បើ​ លោក​កឹម សុខា​នៅតែ​បន្ត​រក្សា​មិត្តភាព​ដៃ​គូ​របស់​ខ្លួន​គឺ​ លោក​សម រង្ស៊ី​នឹង​បាត់​ឱកាស​ធ្វើ​នយោបាយ​មិន​ខាន។​

ជាង​នេះ​ទៅ​ទៀត ​លោក​ហ៊ុន សែន​ក៏​បាន​ណែនាំ​ឱ្យ​លោក​កឹម សុខា​ ដាក់​លិខិត​សុំ​អន្តរាគមន៍​ និង​សុំ​ទោស​ដល់​រូប​លោក​ដើម្បី​បាន​បន្ត​ជីវិត​នយោបាយ​របស់​ខ្លួន​ឡើង​វិញ។​ ​

នយោបាយ​របស់​លោក​ហ៊ុន សែន​ត្រូវ​បាន​គេ​មើល​ឃើញ​ថា​  បាន​បរាជ័យ​ក្នុង​ការ​បំបែក​បំបាក់​​ចំណង​មិត្តភាព​រវាង​លោក​សម រង្ស៊ី ​និង​ លោក​កឹម សុខា​ ដែល​រហូត​ដល់មាន​ការ​រំលាយ​គណបក្ស​សង្រ្គោះ​ជាតិ​ចោល​កាលពី​ខែ​វិច្ឆិកា​២០១៧​ ដើម្បី​ក្តោប​ក្តាប់​អំណាច​របស់​ខ្លួន​នៅ​ក្នុង​អាណត្តិ​ទី​៦​នេះ។​

កាលពី​ថ្ងៃទី​២៣​ខែ​ធ្នូ ​លោក​សម រង្ស៊ី​ បាន​សរសេរ​នៅក្នុង​ទំព័រ​ហ្វេសប៊ុក​របស់​លោក​ពី​ប្រទេស​បារាំង​មក​ថា ​ ក្នុង​ឱកាស​បុណ្យ​​Christmas ​និង​បុណ្យ​ឆ្លង​ឆ្នាំ​សាកល​២០១៨​ ផ្លាស់​ចូល​ឆ្នាំថ្មី​២០១៩​ ខាង​មុខ​នេះ​ថា ​លោក​មាន​ក្តី​សង្ឃឹម​យ៉ាង​មុតមាំ​ថា​  គណបក្ស​សង្គ្រោះ​ជាតិ​នឹង​អាច​ដំណើរ​ការ​ជា​ប្រក្រតី​ដូច​ដើម​វិញ​ ហើយ​លោក​ប្រធាន​ កឹម សុខា​និង​មាន​សេរីភាព​ពេញលេញ​វិល​មក​ដឹក​នាំ​គណបក្ស​សង្គ្រោះ​ជាតិ​ដើម្បី​ឈាន​ទៅ​រក​ភាព​ជោគជ័យ​ និង​ការ​ផ្លាស់ប្តូរ​ជា​វិជ្ជមាន​តាម​យន្តការ​ប្រជា​ធិបតេយ្យ។​លោក​សម រង្ស៊ី​ ប្រាកដ​ក្នុង​ចិត្ត​ថា ​លោក​កឹម សុខា ​និង​រូប​លោក​ផ្ទាល់​ ជាដៃ​​គូ​នយោបាយ​ស្មោះ​ត្រង់​សម្រាប់​ជាតិ​ខ្មែរ ​និង​ជា​មនុស្ស​តែមួយ​ សម្លុត​មិន​ខ្លាច​ បំបែក​មិន​បាន៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស