លោកនាយករដ្ឋមន្ត្រីហ៊ុន សែនបានសម្តែងការមិនពេញចិត្ត និងរិះគន់ ចំពោះក្រុមអ្នកវិភាគមួយចំនួនដែលងឿងឆ្ងល់ពីប្រភពថវិកា របស់លោកដែលយកទៅជួយឧបត្ថម្ភបុគ្គលិកទូរទស្សន៍CNCនិងបុគ្គលិកទូរទស្សន៍បាយ័ន។
លោកហ៊ុន សែនបញ្ជាក់ថា លុយដែលលោកផ្តល់ឱ្យបុគ្គលិកទូរទស្សន៍CNCនិងទូរទស្សន៍បាយ័នគឺជាលុយរបស់លោកផ្ទាល់។ លោកអះអាងថា លោកធ្វើជានាយករដ្ឋមន្រ្តីទៅហើយ គឺលោកមិនមែនដាច់យ៉ៃនោះទេ។
ការអះអាងរបស់លោកហ៊ុន សែន ធ្វើឡើងនៅក្នុងពិធីជួបជាមួយកម្មករជាង១ម៉ឺននាក់នៅខេត្តកណ្តាល នាព្រឹកថ្ងៃទី២៦ធ្នូ។
នាយកមន្រ្តីដែលក្រាញអំណាចជាង៣០ឆ្នាំរូបនេះ អះអាងថា ក្រៅពីលុយដែលជួយឧបត្ថម្ភទូរទស្សន៍ក្នុងស្រុកមួយចំនួន លោកនិងប្រពន្ធ របស់លោកក៏បានយកលុយផ្ទាល់ខ្លួនទៅជួយដល់កីឡាករប្រដាល់ និងជួយដល់វិស័យសិល្បៈផងដែរ។
ទោះជាយ៉ាងណាក៏ដោយ លោកសន ជ័យ ប្រធានអង្គការសម្ព័នគណនេយ្យភាពសង្គមបានប្រាប់កាសែត The Cambodia Dailyថា ប្រសិនបើលោកហ៊ុន សែនយកថវិការបស់លោកផ្ទាល់ លោកទៅប្រើប្រាស់ជំនួយមនុស្សធម៌វាជារឿងផ្ទាល់ខ្លួនរបស់លោកប៉ុណ្ណោះ ប៉ុន្តែប្រសិនបើលោកយកថវិការបស់រដ្ឋទៅប្រើប្រាស់លើសេវាឯកជន ដែលមិនមែនជាការចង់បានសាធារណៈនោះ វាមិនមែនជាការត្រឹមត្រូវនោះទេ។
ការអះអាងរបស់លោកហ៊ុន សែនពាក់ព័ន្ធនឹងការជួយថវិកាដល់បុគ្គលិកទូរទស្សន៍CNCនិងបាយ័នធ្វើឡើង ក្រោយពេលកាសែត The Cambodia Dailyបានផ្សាយសារជាសំឡេងរបស់លោកហ៊ុន សែន មុនគេចំពោះការលូកដៃរបស់លោកទៅក្នុងជម្លោះការងារ នៅទូរទស្សន៍ CNCកាលពីពេលថ្មីៗនេះ។ ក្នុងសំឡេងនោះ លោកហ៊ុន សែនបានព្រមានលោកឧកញ៉ាគិត ម៉េងថា ប្រសិនឧកញ៉ារូបនេះ មិនព្រមដកអគ្គនាយកទូរទស្សន៍ CNCឈ្មោះ អ៊ុក វូរ៉ាចេញពីតំណែងទេ នោះលោកគិត ម៉េងនឹងក្លាយជាសត្រូវរបស់លោកហ៊ុន សែន។ ក្នុងសំឡេងដដែលនោះ លោកហ៊ុន សែនក៏បានបង្ហាញពីឥទ្ធិពលរបស់លោកប្រមាថទៅដល់អង្គព្រះមហាក្សត្រទៀតផង៕