ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋប្រជាមានិតចិនថ្មី លោកលោកវ៉ាង វេនធៀន(Wang Wentian)អះអាងថា ថ្នាក់ដឹកនាំជាន់ខ្ពស់ចិននៅតែបន្តការគាំទ្រដល់រដ្ឋាភិបាលលោកហ៊ុន សែន ក្នុងការអភិវឌ្ឍសេដ្ឋកិច្ចសង្គម ក្នុងបុព្វហេតុពង្រឹងឯករាជ្យអធិបតេយ្យភាពរបស់កម្ពុជា។
ការអះអាងរបស់លោកវ៉ាង វេនធៀន(Wang Wentian) ធ្វើឡើងក្នុងពេលលោកចូលជួបសម្តែងការគួរសមជាមួយប្រធានព្រឹទ្ធសភាលោកសាយ ឈុំ នៅថ្ងៃពុធនេះ។
សេចក្តីប្រកាសព័ត៌មាននៃព្រឹទ្ធសភាកម្ពុជាបានចុះផ្សាយថា លោកសាយ ឈុំ បានប្រាប់ភាគីចិនវិញថា រដ្ឋាភិបាលកម្ពុជានឹងបន្តអនុវត្តគោលនយោបាយការបរទេសទន់ភ្លន់ សុភាពរាបសារដើម្បីបម្រើផលប្រយោជន៍ប្រជាជន។
ការបង្ហាញជំហររបស់ចិនមកលើរបបក្រុងភ្នំពេញនៅពេលនេះ ធ្វើឡើងស្របពេលដែលក្រុមប្រទេសលោកសេរីព្រមានដាក់ទណ្ឌកម្មមកលើរដ្ឋាភិបាលលោកហ៊ុន សែន ដែលបានបំផ្លាញគោលការណ៍ប្រជាធិបតេយ្យរបស់ប្រទេសយ៉ាងធ្ងន់ធ្ងរ៕