32.1 C
Phnom Penh

ក្រសួង​ការងារ​ជំរុញ​ឲ្យ​សមត្ថកិច្ច​បន្ត​ស្វែងរក​យុត្តិធម៌​ជូន​មេដឹកនាំ​ សហជីព​បី​រូប​ និង​កម្មករ​មួយ​ចំនួន​ដែល​ត្រូវ​បាន​សម្លាប់​នៅ​កម្ពុជា​

ដោយ ឌឹ ខេមបូឌា ដេលី

បទវិភាគ

គណៈ​កម្មការ​ត្រួត​ពិនិត្យ​ការ​អនុវត្តន៍​អនុសញ្ញា​អន្តរ​ជាតិ​របស់​អង្គការ​ពលកម្ម​អន្តរជាតិ​របស់​ក្រសួង​ការងារ​កម្ពុជា ​កាលពី​សប្តាហ៍​កន្លង​ទៅ​នេះ​ បាន​ជំរុញ​ឲ្យ​ក្រសួង​មហា​ផ្ទៃ ​និង​ក្រសួង​យុត្តិធម៌​ពន្លឿន​ការរក​យុត្តិធម៌​ជូន​លោក​ជា វិជ្ជា លោក​រស់ សុវណ្ណារ៉េត ​លោក​ហ៊ី វុទ្ធី​ និង​ករណី​បាញ់​សម្លាប់​កម្មករ​លើ​ផ្លូវវ៉េង​ស្រេង​កាលពី​ដើម​ឆ្នាំ​២០១៤​កន្លង​ទៅ។ ​ជាង​នេះទៅ​ទៀត​ គណៈ​កម្មការ​នេះ​នឹង​ធ្វើ​របាយ​ការណ៍​អំពី​ការ​វិវឌ្ឍន៍​ថ្មីៗ​លើ​ករណី​ឃាតកម្ម​ទាំង​នេះ។​

ការ​ជំរុញ​ឲ្យមាន​ការ​រក​យុត្តិធម៌​ដល់​ក្រុម​មេ​ដឹកនាំ​សហជីព​ទាំង​នេះ​ ធ្វើឡើង​ក្រោយ​ពី​ក្រសួង​ការងារ​កាលពី​ចុង​ឆ្នាំ​២១០៧​បាន​ចេញ​អនុក្រិត្យ​បង្កើត​គណៈកម្មការ​ត្រួត​ពិនិត្យ​ការ​អនុវត្ត​អនុ​សញ្ញា​អន្តរជាតិ​របស់​អង្គការ​ពលកម្ម​អន្តរជាតិ។​

កាលពី​ឆ្នាំ​២០១៤ ​ក្រុម​សហជីព​ជាច្រើន​នៅ​កម្ពុជា​ធ្លាប់​បាន​ប្តឹង​ទៅ​ អង្គការ​ពលកម្ម​អន្តរជាតិ​ចំពោះ​ឃាតកម្ម​លើ​លោក​ជា វិជ្ជា ​លោក​ហ៊ី វុទ្ធី ​និងលោក​ រស់ សុវណ្ណារ៉េត​ និង​ករណី​បាញ់​សម្លាប់​កម្មករ​លើ​ផ្លូវ​វ៉េងស្រេង​ដើម្បី​ឲ្យ​រក​យុត្តិធម៌​ជូន​ពួ​កគេ។​

ប្រធាន​សហភាព​ការងារ​លោក​អាត់ ធន់​ សង្ឃឹម​ថា​ រដ្ឋាភិបាល​នឹង​បន្តការ​ស៊ើប​អង្កេត​ករណី​ឃាតកម្ម​ខ្នាត​ធំ​ជា​ច្រើន​នេះ ​ដើម្បីរក​យុត្តិធម៌​ជូនជន​រងគ្រោះ​ និង​នាំខ្លួន​ជន​ដៃ​ដល់​ពី​ក្រោយ​ឃាតកម្ម​ទាំងនេះ​យកមក​ផ្តន្ទាទោស​តាម​ផ្លូវ​ច្បាប់។​ លោក​បន្ត​ថា​ ក្រុម​សហជីព​នៅ​កម្ពុជា​នឹង​នៅតែ​បន្ត​តាម​ដាន​លើ​ករណី​នេះ​ ហើយ​រំពឹង​ថា  រដ្ឋាភិបាល​កម្ពុជា​នឹង​អាច​ផ្តល់​របាយ​ការណ៍​ដែល​អាច​ទទួល​យក​បាន​ជូន​ទៅ​អង្គការ​ពលកម្ម​អន្តជាតិILO៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស