31 C
Phnom Penh

ក្រុម​ហ៊ុន​ចិន​UDG​នឹង​បញ្ចប់​ការ​សាងសង​ព្រលាន​យន្តហោះ​អន្តរជាតិ​ក្នុង​ខេត្ត​កោះកុង​ក្នុង​រយៈ​ពេល​ពីរ​ឆ្នាំ​ទៀត​

ដោយ ឌឹ ខេមបូឌា ដេលី

បទវិភាគ

អាកាស​យានដ្ឋាន​អន្តរ​ជាតិ​សាជីវកម្ម​ដារ៉ា​សាគរ​ ក្នុង​ខេត្ត​កោះកុង​ នឹង​ចាប់​ផ្តើម​ប្រតិបត្តិ​ការ​នៅ​ចុង​ឆ្នាំ​២០២០​ នៅពេល​ដែល​ការ​ងារ​សាងសង់​ដំណាក់​កាល​ដំបូង​នៃ​ការ​អភិវឌ្ឍ​គ្រោង​នឹង​បញ្ចប់។​ ព្រលាន​យន្ត​ហោះនេះ​ត្រូវ​បាន​សាង​សង់​នៅ​ក្បែរ​រមណីយ​ដ្ឋាន​ដារ៉ាសាគរ។​

សារ​ព័ត៌មាន​ខ្មែរ​ថែមស៍​បាន​ដក​ស្រង់​សម្តី​លោក​វ៉ាង ចាវ​(Wang Chao)​ អនុ​ប្រធាន​ក្រុម​ហ៊ុន​ចិន​ Union Development Group​ឬ​ហៅ​កាត់​ថា ​UDG​ចុះ​ផ្សាយ​នៅ​ថ្ងៃអង្គារ​នេះ​ថា ​ព្រលាន​យន្ត​ហោះ​ដែល​សាងសង់​ដោយ​ក្រុមហ៊ុន ​UDG​ នេះ​អាច​គ្រប់គ្រង​យន្តហោះ​ដឹក​ជញ្ជូន​ផ្លូវ​អាកាស​ដូចជា​Boeing 777​និង​យន្តហោះ Airbus A340។​ លោក​បន្ត​ថា​ ព្រលាន​យន្តហោះ​នេះនឹង​ត្រូវ​ចំណាយ​ថវិកា​ចំនួន​២០០​លាន​ដុល្លារ​ដើម្បី​បញ្ចប់​ការ​សាងសង​វគ្គ​ដំបូង​ ដែល​អាច​ទទួល​ភ្ញៀវ​ទេសចរ​ពី​ទូទាំង​ពិភព​លោក​ចំនួន​៤​លាន​នាក់​ក្នុង​១​ឆ្នាំៗ។​

ព្រលាន​យន្តហោះ​នេះ​មាន​ទីតាំង​នៅ​ស្រុក​បទុមសាគរ​ខេត្ត​កោះកុង​លើ​ផ្ទៃដី​ទំហំ​១៨៧​ក្នុង​ចំណោម​ផ្ទៃ​ដី​ទំហំ​២១៨​​ហិចតា​ ដែល​រដ្ឋាភិបាល​លោក​ហ៊ុន សែន​ បាន​សម្បទាន​ទៅ​ក្រុម​ហ៊ុន​នេះ​កាល​ពី​ឆ្នាំ​២០០៨​​សម្រាប់​គ្រប់គ្រង​រយៈ​ពេល​៩៩​ ឆ្នាំ។​

ទោះ​ជាយ៉ាង​ណាក៏​ដោយ​ទាក់ទង​នឹង​ ក្រុមហ៊ុន​UDG​នេះ​ សារ​ព័ត៌មាន​ Asia Times​កាលពី​ខែ​ធ្នូ​ឆ្នាំ​២០១៨​កន្លង​ទៅ​​ចុះផ្សាយ​ថា   ​កម្ពុជា​អាច​ក្លាយ​ជា​ចំណុច​ស្នូល​នៃ​សង្គ្រាម​ត្រជាក់​ថ្មី ​ដោយ​សារ​កម្ពុជា​បាន​អនុញ្ញាត​ឲ្យ​ធ្វើ​មូលដ្ឋាន​ទ័ព​ជើង​ទឹក​របស់​ចិន​ក្នុង​ខេត្ត​កោះកុង​តាម​រយៈ​ដី​សម្បទាន​សេដ្ឋកិច្ច​របស់​ក្រុមហ៊ុន​ចិន ​UDG ​ទំហំ​ជាង​៤​ម៉ឺន​៥​ពាន់​ហិកតា​សម្រាប់​រយៈ​ពេល​៩៩​ឆ្នាំ​ដើម្បី​ឲ្យ​ចិន​សាងសង់​កំពង់ផែ​សមុទ្រ​ទឹក​ជ្រៅ ​ដែល​អាច​ឲ្យ​កប៉ាល់​ចម្បាំង​ចិន​ចូល​ចត​បាន។​ ប៉ុន្តែ​រដ្ឋាភិបាល​ទីក្រុង​ភ្នំពេញ​បាន​បដិសេធ​ជា​បន្ទាន់​ចំពោះ​ការ​ចុះ​ផ្សាយ​នេះ ​ក្រោយពី​អនុ​ប្រធានាធិបតី​អាមេរិក​លោក​Mike Pense​បាន​ផ្ញើរ​សារ​ទៅ​លោក​ហ៊ុន សែន​ថា ​ប្រសិន​បើ​ពិត​ដូច​ការ​ចុះផ្សាយ​មែន​ នោះ​​វា​នឹង​ធ្វើឲ្យ​ខូច​ទំនាក់​ទំនង​រវាង​កម្ពុជា​និង​អាមេរិក៕​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស