33.3 C
Phnom Penh

លោក​សម រង្ស៊ី​រំឭក​ឲ្យ​មន្រ្តី​របស់​លោក​កុំ​សុំ​សិទ្ធិ​ធ្វើ​នយោបាយ​ឡើង​វិញ​

ដោយ ឌឹ ខេមបូឌា ដេលី

បទវិភាគ

ប្រធាន​ស្តីទី​គណបក្ស​សង្គ្រោះ​ជាតិ​លោក​សម រង្ស៊ី​បាន​ក្រើន​រំឭក​កុំឲ្យ​មន្ត្រី​របស់​បក្ស​នេះ​ចាញ់​កលល្បិច​របស់​លោក​ហ៊ុន សែន ​ដែល​ កំពុង​ជំរុញ​ឲ្យមន្រ្តី​របស់​គណបក្ស​សង្គ្រោះ​ជាតិ​ចំនួន​១១៨​ រូប​​សុំ​សិទ្ធិ​ធ្វើ​ នយោបាយ​ឡើង​វិញ។​

លោក​សម រង្ស៊ី​បាន​សរសេរ​នៅ​លើ​គណនី​ហ្វេសប៊ុក​របស់​លោក​នៅ​ថ្ងៃ​ព្រហស្បតិ៍​ថា ​  ​ការ​សុំ​សិទ្ធិ​ធ្វើ​នយោបាយ​ពី​លោក​ហ៊ុន សែន​ឡើង​វិញ​ ប្រៀប​បាន​ទៅ​នឹង​ការ​ ទទួល​ស្គាល់​ការ​រំលាយ​គណបក្ស​សង្គ្រោះ​ជាតិ ​និង​ទទួល​ស្គាល់​បទចោ ទ​លើ​លោក​កឹម សុខា​ថា​ មាន​ទោស​ពី​បទ​ក្បត់ជាតិ​អ៊ីចឹង​ដែរ។​

រហូត​មក​ទល់​ពេល​នេះ​ គណបក្ស​ប្រជាជន​កម្ពុជា​កំពុង​រង់ចាំ​ការ​ឡាយ​ព្រះ​ហត្ថលេខា​ពី​ព្រះ​មហា​ក្សត្រ​ក្នុង​ការ​ប្រកាស​ចូល​ជា​ធរមាន​ ត្រង់​មាត្រា​៤៥​ថ្មីស្ទួន​របស់​គណបក្ស​នយោបាយ​ដើម្បី​បើក​ផ្លូវ​ឲ្យ​ អ្នក​នយោបាយ​ដែល​តុលាការ​ហាម​ឃាត់​មិន​ធ្វើ​នយោបាយ​រយៈ​ពេល​ប្រាំ​ឆ្នាំ។​

លោក​ហ៊ុន សែន​ធ្លាប់​អះអាង​ថា ​បុគ្គល​ ទាំង​ឡាយ​ណាដែល​ចង់​បាន​សិទ្ធិ​ធ្វើ​នយោបាយ​ឡើង​វិញ​ ម្នាក់ៗ​ត្រូវ​ដាក់​លិខិត​សុំ​មក​រូប​លោក​ទៅ​ក្រសួង​មហា​ផ្ទៃ ​ឬទៅ​ព្រះ​មហា​ក្សត្រ។​

ទោះជាយ៉ាង​ណាក៏​ដោយ​ មេធាវី​របស់​លោក​កឹម សុខា​គឺ​លោក​ចាន់ ចេន​ ធ្លាប់​អះអាង​ថា​ កូន​ក្តី​របស់​លោក​ជំរុញ​ឲ្យ​តុលាការ​ទម្លាក់​ចោល​ការ​ចោទ​ប្រកាន់​ជាមុន​សិន​ មុននឹង​ទទួល​បាន​សិទ្ធិ​ធ្វើ​នយោបាយ។ ​ហើយ​ដូច​គ្នា​ដែរ​ ចំពោះ​ការ​ទទួល​យក​សិទ្ធិ​នយោបាយ​មក​វិញ​នោះ ​មន្រ្តី​គណបក្ស​សង្គ្រោះ​ជាតិ​ជាច្រើន​រូប​ទៀត​ក្នុង​ចំណោម​មន្រ្តី​ចំនួន​១១៨​រូប​នោះ​ក៏រង​ចាំឲ្យ​តុលាការ​ទម្លាក់​បទ​ចោទ​មក​លើ​លោក​កឹម សុខា​ដើម្បី​ឲ្យមាន​សេរីភាព​ជា​មុន​សិន​ដែរ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស