ក្រុមកម្មករបោសសម្អាតសម្រាមក្នុងតំបន់អង្គររបស់ក្រុមហ៊ុនវីហ្គ្រីន ក្នុងខេត្តសៀមរាប នៅថ្ងៃទី៨ខែមករា នេះបាននាំគ្នាប្រកាសឈប់តវ៉ាតទៅទៀតក្រោយពីភាគីក្រុមហ៊ុនសន្យាដំឡើងប្រាក់ឈ្នួលឲ្យពួកគេ។
កាលពីថ្ងៃទី៤ខែមករា ក្រុមកម្មករទាំងនេះបាននាំគ្នាស្រែកទាមទារ ឲ្យលោកហ៊ុន សែននិងភាគីថៅកែក្រុមហ៊ុនដំឡើងប្រាក់ឈ្នួលដល់ពួកគេ ពី៨០ដុល្លារ ទៅ១៧០ដុល្លារក្នុងមួយខែ។ ពួកគេបាននាំគ្នាត្អូញត្អែរថា ស្របពេលដែលទំនិញនៅតាមទីផ្សារកំពុងឡើងថ្លៃខ្ពស់កប់ពពក ពួកគេសឹងតែរកលុយទិញអង្ករមិនចង់បាន ហើយត្រូវមានកូនតូចទៅសាលារៀនថែមទៀត។
ក្រុមកម្មកររបស់ក្រុមហ៊ុនវីហ្គ្រីនខូលអិលធីឌី ដែលបោសសម្អាតនៅតាមតំបន់ប្រាសាទនានាក្នុងខេត្តសៀមរាបអំពាវនាវទៅប្រមុខរដ្ឋាភិបាល និងថៅកែក្រុមហ៊ុនជួយដំឡើងប្រាក់ឈ្មួលសមរម្យដល់ពួកគេ។
កាលពីម្សិលមិញភាគីទាំងពីរបានយល់ព្រមគ្នាលើលក្ខខណ្ឌចំនួន១០ចំណុច ជាថ្នូរទៅនឹងការបញ្ចប់ការតវ៉ាត ក្រោយពីភាគីក្រុមហ៊ុនសន្យាដំឡើងប្រាក់ឈ្នួល១៥ដុល្លារបន្ថែមទៀតដល់កម្មករម្នាក់ៗសម្រាប់ឆ្នាំ២០១៩ ហើយក្រុមហ៊ុននឹងដំឡើងប្រាក់ឈ្នួលដល់កម្មករម្នាក់ៗ១២០ដុល្លារសម្រាប់ឆ្នាំ២០២០ ហើយពីរឆ្នាំទៅមុខទៀត ក្រុមហ៊ុននឹងដំឡើងប្រាក់ខែ២០ដុល្លារទៀត។
ប្រធានសហជីពស៊ីខៅឌូគឺលោកអាត់ ធន់ធ្លាប់ប្រាប់ The Cambodia Daily ថា ក្រុមកម្មករបោសសម្អាតសម្រាមទាំងនេះ គួរតែត្រូវបានដំឡើងប្រាក់ខែរហូតដល់១៨២ដុល្លារក្នុងមួយខែ ដូចកម្មករកាត់ដេរអ៊ីចឹងដែរ។ លោកបន្តថាប្រសិនបើក្រុមហ៊ុនមិនអាចដំឡើងក្នុងតម្លៃនេះបានទេ ពួកគេគួរដំឡើង១៥០ដុល្លារក្នុង១ខែសម្រាប់ឆ្នាំដំបូងសិន ហើយក្រោយមកធ្វើការដំឡើងប្រាក់ខែនៅឆ្នាំបន្តបន្ទាប់ឲ្យបានគ្រប់១៨២ដុល្លារក្នុង១ខែដល់ពួកគេ ស្របពេលដែលទំនិញគ្រប់ប្រភេទនៅលើទីផ្សារកំពុងមានការឡើងថ្លៃកប់ពពកនោះ៕