សមត្ថកិច្ចបានចោទប្រកាន់មន្ត្រីគណបក្សសង្រ្គោះជាតិនៅខេត្តស្វាយរៀងម្នាក់គឺលោកគង់ ម៉ាស់ពីបទប៉ុនប៉ងផ្តួលរំលំរដ្ឋាភិបាល លោកហ៊ុន សែន ក្រោមការបញ្ជាពីលោកសម រង្ស៊ីពីខាងក្រៅប្រទេស។
វិទ្យុបារាំង RFI បានដកស្រង់សម្តីអ្នកនាំពាក្យក្រសួងមហាផ្ទៃលោកខៀវ សុភ័គចុះផ្សាយនៅថ្ងៃព្រហស្បតិ៍នេះថា សមត្ថកិច្ចបានបញ្ជូន មន្ត្រីគណបក្សសង្រ្គោះជាតិគឺលោកគង់ ម៉ាស់ទៅសាលាដំបូងរាជធានីភ្នំពេញនៅល្ងាចថ្ងៃនេះ ក្រោយពេលសមត្ថកិច្ចបញ្ចប់ការសាកសួរ។
លោកថា ការចោទប្រកាន់មន្ត្រីបក្សប្រឆាំងរូបនេះពីបទប៉ុនប៉ងផ្តួលរំលំរដ្ឋាភិបាលស្របច្បាប់របស់លោកហ៊ុន សែនគឺដោយសារសមត្ថកិច្ចរកឃើញភស្តុតាងជាច្រើន នៅលើបណ្តាញសង្គមហ្វេសប៊ុកតាមរយៈគណនីហ្វេសប៊ុករបស់លោកគង់ ម៉ាស់ និងភស្តុតាងជាច្រើនទៀតនៅក្នុងកុំព្យូទ័ររបស់អតីតមន្ត្រីបក្សប្រឆាំងរូបនេះ។
អាជ្ញាធរចាប់ខ្លួនមន្ត្រីគណបក្សសង្រ្គោះជាតិប្រចាំខេត្តស្វាយរៀង រូបនេះកាលពីថ្ងៃម្សិលមិញ ខណៈលោកកំពុងអង្គុយពិសារកាហ្វេជាមួយមិត្តភក្តិក្នុងហាងAlmondក្នុងទីក្រុងភ្នំពេញ។
មុនពេលចាប់ខ្លួន អតីតមន្ត្រីបក្សប្រឆាំរូបនេះមួយថ្ងៃ គឺ ថ្ងៃទី ១៥ មករា ហ្វេសប៊ុកឈ្មោះគង់ ម៉ាស់បានសរសេរថា រដ្ឋបាលលោកហ៊ុន សែនគិតតែរឿងអំណាច មួយថ្ងៃៗមិនបានយកចិត្តទុកដាក់ជួយដោះស្រាយរកមធ្យោបាយផលិត ការពារថ្លៃផលិតផលជូនកសិករ សិប្បករ និងជួយរកទីផ្សារលក់ផលិតផល ជាពិសេសមិនបានយកចិត្តទុកដាក់គ្រប់គ្រងទីផ្សារជូនពលរដ្ឋឲ្យមានកម្រិតសមរម្យនោះទេ។ លោកក៏ជំរុញឲ្យពលរដ្ឋខ្មែរងើបឡើងតវ៉ាដើម្បីជីវភាពរបស់ខ្មែរគ្រប់ៗគ្នា។
នៅថ្ងៃទី១៦មុនពេលចាប់ខ្លួនលោកប៉ុន្មានម៉ោង គណនីដដែលសរសេរថា ទឹកទី១៖ សហភាពអ៊ឺរ៉ុបបានសម្រេចជំហានដំបូងដាក់ទណ្ឌកម្មដោយការយកពន្ធ និងតំឡើងថ្លៃមកលើការនាំចូលអង្ករពីកម្ពុជា ដោយយកពន្ធ២០០ដុល្លារនិង៧៣សេនក្នុងមួយតោន។
ការចាប់ខ្លួនអតីតសកម្មជនគណបក្សសង្រ្គោះជាតិជាថ្មីទៀតនេះ គឺធ្វើឡើងក្រោយពេលលោកហ៊ុន សែនព្រមានកម្ចេចក្រុមបក្សប្រឆាំងចោល និងមិនអត់ឱនឱ្យក្រុមបក្សនេះឡើយ ប្រសិនបើសហគមន៍អន្តរជាតិដាក់ទណ្ឌកម្មសេដ្ឋកិច្ចមកលើរដ្ឋាភិបាលក្រុងភ្នំពេញ។
លោកគង់ ម៉ាស់ជាអតីតសមាជិកក្រុមការងារគណបក្សសង្គ្រោះជាតិ ខេត្តស្វាយរៀង និងជាអនុប្រធាននាយកដ្ឋានកិច្ចការបោះឆ្នោត និងនីតិកម្ម។ លោកធ្លាប់បានរិះគន់បក្សកាន់អំណាចនិងរដ្ឋាភិបាលរាប់មិនអស់ពាក់ព័ន្ធរឿងអសកម្ម បញ្ហាព្រំដែន បញ្ហាយួនអន្តោប្រវេសន៍ខុសច្បាប់ បញ្ហាកសិផលគ្មានតម្លៃ និងបញ្ហាចំណាកស្រុក ជាដើម។
លោកធ្លាប់បានរត់ភៀសខ្លួនទៅប្រទេសថៃមួយរយៈពេល ក្រោយពេលគណបក្សសង្រ្គោះជាតិត្រូវរបបលោកហ៊ុនសែនរំលាយចោលកាលពីចុងឆ្នាំ២០១៧ ដើម្បីគេចចេញពីការធ្វើទុក្ខបុកម្នេញពីសំណាក់អាជ្ញាធរ ដោយសារលោកមិនព្រមចុះចូលជាមួយគណបក្សកាន់អំណាច៕