មេដឹកនាំក្រុងប៉េកាំងលោកស៊ី ជីងពីងបានប្រកាសផ្តល់ជំនួយប្រមាណ៤ពាន់លានយ័នឬស្មើនឹងជិត ៦០០លានដុល្លារអាមេរិកដល់កម្ពុជា។ ការផ្តល់នេះគឺសម្រាប់អភិវឌ្ឍន៍នៅកម្ពុជារយៈពេល៣ឆ្នាំ ចាប់ពីឆ្នាំ២០១៩ដល់ឆ្នាំ២០២១។
ការប្រកាសរបស់មេដឹកនាំកុម្មុយនីស្តចិនពេលនេះធ្វើឡើងនៅក្នុងជំនួបពិភាក្សាការងារជាមួយលោកហ៊ុន សែន នៅទីក្រុងប៉េកាំង ប្រទេសចិន កាលពីម្សិលមិញ។
លោកហ៊ុន សែនបានសរសេរនៅហ្វេសប៊ុករបស់លោកនៅថ្ងៃអង្គារនេះថា ប្រធានាធិបតីចិនលោកស៊ី ជីងពីងក៏បានប្រកាសបន្តនាំអង្ករកម្ពុជាទៅកាន់ប្រទេសចិនឲ្យបាន៤០ម៉ឺនតោននៅក្នុងឆ្នាំ២០១៩នេះដើម្បីរួមចំណែកជួយលើកកម្ពស់ជីវភាពរបស់ប្រជាកសិករកម្ពុជា។ ប្រធានាធិបតីចិនក៏បានប្រកាសជំរុញឲ្យទំហំពាណិជ្ជកម្មនៃប្រទេសទាំងពីរកើនឡើងដល់ទៅ១០ពាន់លានដុល្លារនៅឆ្នាំ២០២៣ ហើយនឹងបន្តលើកទឹកចិត្តដល់អ្នកវិនិយោគទុនចិន ឲ្យមកវិនិយោគនៅកម្ពុជាកាន់តែច្រើនថែមទៀត។
លោកហ៊ុន សែនបានដកស្រង់សម្តីរបស់លោកស៊ី ជីងពីង ដែលបានអួតសរសើរអំពីទំនាក់ទំនងរវាងចិននិងកម្ពុជាថា ពិតជាមានលក្ខណៈពិសេសខ្លាំងណាស់ បើប្រៀបធៀបទៅនឹងប្រទេសផ្សេងៗទៀត ពោលគឺទំនាក់ទំនងនៃប្រទេសទាំងពីរ មានលក្ខណៈសំខាន់បំផុត។
ការប្រកាសផ្តល់ជំនួយដល់កម្ពុជានេះធ្វើឡើងក្រោយពេលសហគមន៍អន្តរជាតិត្រៀមផ្តាច់ជំនួយជាបន្តបន្ទាប់ និងកំពុងដំណើរការដកហូតប្រព័ន្ធអនុគ្រោះពន្ធពីកម្ពុជាផងដែរ។
កាលពីពេលថ្មីៗនេះ សហភាពអឺរ៉ុបបានសម្រេចយកពន្ធអង្ករ រយៈពេល៣ឆ្នាំពីកម្ពុជា ដោយចាប់ផ្តើមអនុវត្តកាលពីថ្ងៃទី១៨ ខែមករា។ ការយកពន្ធលើអង្ករកម្ពុជានេះ ធ្វើឲ្យកម្ពុជាខាតបង់ប្រាក់ចំណេញរបស់ខ្លួនជាង៥០លានដុល្លារសហរដ្ឋអាមេរិកក្នុងមួយឆ្នាំៗ៕