របបក្រុងភ្នំពេញ នឹងរៀបចំពិធីជួបពិគ្រោះយោបល់ជាលើកដំបូងជាមួយអង្គការមិនមែនរដ្ឋាភិបាល ដែលជាអង្គការអន្តរជាតិ កំពុងបំពេញការងារនៅកម្ពុជា ដើម្បីផ្លាស់ប្តូរទស្សនទានដោយស្មោះត្រង់ និងពង្រឹងកិច្ចសហប្រតិបត្តិការរវាងរដ្ឋាភិបាល និងអង្គការមិនមែនរដ្ឋាភិបាលអន្តរជាតិទាំងនោះក្នុងបុព្វហេតុអភិវឌ្ឍសេដ្ឋកិច្ចសង្គមកម្ពុជា ព្រមទាំងសិទ្ធិនិងកាតព្វកិច្ចរបស់សង្គមស៊ីវិល ក្រោមច្បាប់ស្តីពីសមាគមនិងអង្គការមិនមែនរដ្ឋាភិបាល។
សេចក្តីជូនដំណឹងរបស់ក្រសួងការបរទេសកម្ពុជាដែលចេញផ្សាយជាសាធារណៈនៅថ្ងៃច័ន្ទនេះ ឲ្យដឹងថា ជំនួបពិគ្រោះយោបល់ជាលើកដំបូងរវាងរដ្ឋាភិបាល និងអង្គការមិនមែនរដ្ឋាភិបាលបរទេសនេះនឹងធ្វើឡើងនៅថ្ងៃទី២៩ ខែមករាស្អែកនេះ នៅទីស្តីការក្រសួងការបរទេស និងសហប្រតិបត្តិការអន្តរជាតិ ដែលមានអ្នកចូលរួមប្រមាណ៣រយនាក់។
នៅមុនពេលបោះឆ្នោតជ្រើសរើសតំណាងរាស្ត្រអាណត្តិទី៦ ឆ្នាំ២០១៨ អង្គការអន្តរជាតិធំៗមួយចំនួនត្រូវបានរដ្ឋាភិបាលក្រុងភ្នំពេញចាត់វិធានការបិទសកម្មភាពដំណើរការអង្គការអន្តរជាតិមួយចំនួនដូចជាវិទ្យាស្ថានសាធារណរដ្ឋអន្តរជាតិ(IRI)និង វិទ្យាស្ថានជាតិប្រជាធិបតេយ្យ(NDI)ជាដើម ក្រោមហេតុផលថា មិនបានបង់ពន្ធ និង បំពេញការងារខុសច្បាប់នៅកម្ពុជាជាដើម។ ការបិទអង្គការអន្តរជាតិទាំងនេះធ្វើឱ្យអង្គការក្នុងស្រុកជាច្រើនជួបបញ្ហាប្រឈម ដោយសារអង្គការទាំងពីរនេះជាប្រភពជំនួយដ៏សំខាន់សម្រាប់ការបំពេញការងារស្តារប្រជាធិបតេយ្យ សិទ្ធិមនុស្ស នីតិរដ្ឋ និងអភិបាលកិច្ចល្អនៅកម្ពុជាផងដែរ។ មិនត្រឹមតែអង្គការអន្តរជាតិទាំងនោះទេ ដែលរបបលោកហ៊ុន សែនចាត់វិធានការ សូម្បីប្រព័ន្ធផ្សព្វផ្សាយឯករាជ្យមួយចំនួនក៏ត្រូវបានរបបនេះធ្វើទុក្ខបុកម្នេញក្រោមរូបភាពពន្ធដារ និងការគាបសង្កត់ផ្នែករដ្ឋបាលផងដែរ ជាពិសេសសារព័ត៌មានThe Cambodia Dailyវិទ្យុអាស៊ីសេរី និងវិទ្យុសម្លេងសហរដ្ឋអាមេរិកជាដើម។
លើសពីនេះ អង្គការអន្តរជាតិ និងអង្គការសង្គមស៊ីវិលក្នុងស្រុក ដែលបំពេញការងារស្តារប្រជាធិបតេយ្យ និងសិទ្ធិមនុស្ស និងអង្គការការពារធនធានធម្មជាតិជាច្រើនទៀត ក៏រងការធ្វើទុក្ខបុកម្នេញពីសំណាក់អាជ្ញាធរ ការតាមឃ្លាំមើលគ្រប់សកម្មភាព ការរារាំង ការគំរាមកំហែង និងការចុះបំពេញការងាររបស់ពួកគេនៅតាមមូលដ្ឋាន។
ស្ថានភាពរបស់អង្គការសង្គមស៊ីវិកាន់តែអាក្រក់ បន្ទាប់ពីរបាយការណ៍របស់អគ្គស្នងការនគរបាលជាតិបានចោទប្រកាន់ក្រុមអង្គការសង្គមស៊ីវិលមួយចំនួនថា មានជាប់ពាក់ព័ន្ធនឹងគម្រោងបដិវត្តន៍ពណ៌នៅកម្ពុជា ហើយដាក់បញ្ចូលអង្គការមួយចំនួនក្នុងបញ្ជីខ្មៅរបស់រដ្ឋាភិបាលថែមទៀត។
ទោះជាយ៉ាងណាក៏ដោយ កាលពីថ្ងៃទី១៧ខែមករា រដ្ឋមន្ត្រី ក្រសួងមហាផ្ទៃលោកស ខេងបានបដិសេធថា រដ្ឋាភិបាលមិនបានរារាំង លាបពណ៌ ឬដាក់សង្គមស៊ីវិលណាមួយចូលទៅក្នុងបញ្ជីខ្មៅដូចការចោទប្រកាន់ឡើយ។ លោកអះអាងថា វិធានការទាំងឡាយរបស់រដ្ឋាភិបាលកន្លងមកគឺដើម្បីពង្រឹងនីតិរដ្ឋនៅកម្ពុជាប៉ុណ្ណោះ។
ប៉ុន្តែក្រុមសង្គមស៊ីវិលក្នុងស្រុកអះអាងថា សេរីភាពក្នុងបំពេញការងាររបស់អង្គការសង្គមស៊ីវិលត្រូវបានរឹតត្បិត ដោយច្បាប់ស្តីពីសមាគម និងអង្គការមិនមែនរដ្ឋាភិបាលដែលពួកគេចាត់ទុកថា មានចរិកនយោបាយ។ ពួកគេធ្លាប់បានស្នើឱ្យរដ្ឋសភាធ្វើវិសោធនកម្មច្បាប់នេះឡើងវិញដើម្បីបង្ហាញពីភាពស្មោះត្រង់ និងកិច្ចសហការល្អជាមួយគ្នា ហើយ លោកស ខេងក៏ធ្លាប់បានប្រកាសគាំទ្រចំពោះសំណើធ្វើវិសោធនកម្មច្បាប់នេះឡើងវិញដែរ៕