ក្រសួងទេសចរណ៍បានឲ្យដឹងថា យ៉ាងហោចណាស់មានភ្ញៀវទេសចរប្រមាណ៦លាន២សែននាក់ បានមកទស្សនានៅកម្ពុជាកាលពីឆ្នាំ២០១៨។ ទំព័រហ្វេសប៊ុករបស់ក្រសួងទេសចរណ៍បានចេញផ្សាយរបាយការណ៍ប្រចាំឆ្នាំរបស់ខ្លួននៅថ្ងៃពុធនេះថា ភ្ញៀវទេសចរបរទេសមកកម្ពុជាបានកើនឡើង១១ភាគរយក្នុងឆ្នាំ២០១៨ បើធៀបទៅនឹងឆ្នាំ២០១៧កន្លងទៅ។
របាយការណ៍ដដែលបង្ហាញថា កាលពីឆ្នាំ២០១៨ កន្លងទៅភ្ញៀវទេសចរចិនបានឈរលំដាប់ទី១ ដែលមានចំនួនប្រមាណ២លាននាក់ ក្នុងចំណោម៦លាន២សែននាក់ឬស្មើនឹង៧០% នៃចំនួនភ្ញៀវទេសចរសរុប។ក្រសួងទេសចរណ៍បានសម្តែងមោទនភាពថា ការកើនឡើងនៃភ្ញៀវទេសចរចិន ដោយសារមានជើងយន្តហោះច្រើនពីចិនមកកម្ពុជា ចំនួនដល់ទៅ១២ ហើយធ្វើការហោះហើរមកកម្ពុជាមានចំនួន ២០៧ជើង ក្នុង១សប្តាហ៍។ ក្រសួងទេសចរណ៍រំពឹងថា នឹងមានភ្ញៀវទេសចរបរទេសប្រមាណ៧លាននាក់ ហើយយ៉ាងហោចណាស់មានជនជាតិចិនប្រហែល៣លាននាក់មកទស្សនាកម្ពុជានៅ២០២០ ហើយចំនួនភ្ញៀវទេសចរនឹងបន្តកើនឡើងដល់ទៅ១១លាននាក់ នៅក្នុងឆ្នាំ២០២៥ដែលមានជនជាតិចិនប្រមាន៥លាននាក់ថែមទៀត៕