34.8 C
Phnom Penh

លោក​បណ្ឌិត​សុខ ទូច​អះអាង​ថា​ កម្ពុជា​ពិត​ជា​ធ្លាប់​រស់​ក្រោម​អាណានិគមន៍​​របស់​វៀតណាម​

ដោយ ឌឹ ខេមបូឌា ដេលី

បទវិភាគ

លោក​សុខ ទូច​ប្រធាន​រាជ​បណ្ឌិត្យ​សភា​កម្ពុជា​ អះអាង​ថា​ កម្ពុជា​ពិត​ជា​ធ្លាប់​រស់​ក្រោម​អាណានិគមន៍​​របស់​វៀតណាម​ពិត​ប្រាកដ​មែន។ ​លោក​បន្ត​ថា​ ការ​រស់​នៅ​ក្រោម​របប​អាណានិគមន៍​វៀតណាម​គឺ​ចន្លោះ​ឆ្នាំ​១៩៧៩​ដល់​ឆ្នាំ​១៩៨៩​នេះ​ហើយ​ ជា​តថភាព​ប្រវត្តិ​សាស្ត្រ​ដែល​មិនអាច​ប្រកែក​បាន​ឡើយ។​

ថ្លែង​ក្នុង​វេទិកា​នៃ​កិច្ច​ពិភាក្សា​តុមូល​ ស្តីពី​ស្ថាន​ភាព​នយោបាយ​ចុង​ក្រោយ​នៃ​គណបក្ស​សង្រ្គោះ​ជាតិ​កាលពី​ព្រឹកមិញ​នេះ ​ប្រធាន​រាជ​បណ្ឌិត​សភា​កម្ពុជា​ លោក​សុខ ទូច​បាន​ទទួល​ស្គាល់​ថា ​កាលពី​ឆ្នាំ​១៩៧៩​ដល់​១៩៨៩​គឺជា​ពេល​វេលា​ដែល​វៀតណាម​បាន​បញ្ជូន​អ្នក​ជំនាញ​ការ​មក​គ្រប់គ្រង​តាម​ស្ថាប័ន​រដ្ឋ​ទាំង​អស់​របស់​ខ្មែរ​ ដែល​នេះ​ជា​ការ​បង្ហាញ​យ៉ាង​ច្បាស់​ពី​ទិដ្ឋភាព​ដាក់​អាណានិគមន៍​មក​លើ​កម្ពុជា។​

លោក​បន្ត​ថា ​បច្ចុប្បន្ន​គ្មាន​ទិដ្ឋភាព​បែប​នេះ​ទៀត​ទេ​ ដោយ​សារ​កម្ពុជា​អាច​រស់​នៅ​ដោយ​ខ្លួន​ឯង​ មាន​ឯករាជ្យ​ភាព ​និង​អធិប​តេយ្យភាព​របស់​ខ្លួន​ ដោយ​មិន​រណប​ប្រទេស​ណា​មួយ​នោះ​ឡើយ។​

ប៉ុន្តែ​ក្រុម​អ្នក​ឃ្លាំ​មើល​នយោបាយ​ការ​បរទេស​ លើក​ឡើង​ថា​ ឥទ្ធិពល​របស់​វៀតណាម​មក​លើ​កម្ពុជា​នៅតែ​មាន។ ​ជាក់​ស្តែង​កាល​ពី​ពេល​ថ្មីៗ​នេះ ​មេ​ដឹកនាំ​វៀតណាម​បាន​ហៅ​មេ​ដឹកនាំ​និង​មន្ត្រី​ជាន់ខ្ពស់​របស់​កម្ពុជា​ជា​ច្រើន​រូប​ទៅ​ព្រមាន​ម្តង​ហើយ​ម្តង​ទៀត​អំពី​ទំនាក់​ទំនង​ជិត​ស្និទ្ធ​ខ្លាំង​របស់​កម្ពុជា​ជាមួយ​ចិន​ ដែល​ជា​គូ​សត្រូវ​ដ៏​ធំ​របស់​វៀតណាម។ ​ពួក​គេ​និយាយ​ថា ​ទំនាក់​ទំនង​កម្ពុជា -ចិន​ សព្វថ្ងៃ​កាន់​តែ​ធ្វើ​ឱ្យ​កម្ពុជា​បាត់​ភាព​ម្ចាស់​ការ​របស់​ខ្លួន​ ដោយ​ងាក​ទាំង​ស្រុង​ទៅ​​រក​របប​កុម្មុនីស្ត​ចិន​និង​ខំប្រឹង​ការពារ​ផល​ប្រយោជន៍​របស់​ជនជាតិ​ចិន​ និង​ប្រទេស​ចិន​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស