26 C
Phnom Penh

អតីត​សមាជិក​គ.ជ.ប.​លោក​រ៉ុង ឈុន​អះអាង​ថា ​បញ្ហា​សិទ្ធិ​មនុស្ស​និង​លទ្ធិ​ប្រជា​ធិបតេយ្យ​នៅ​កម្ពុជា​ធ្លាក់​ដល់​កម្រិត​សូន្យ​

ដោយ ឌឹ ខេមបូឌា ដេលី

បទវិភាគ

អតីត​សមាជិក​គណៈ​កម្មាធិការ​ជាតិ​រៀបចំ​ការ​បោះ​ឆ្នោត​ហៅ​កាត់​គ.ជ.ប. លោក​រ៉ុង ឈុន​បាន​អះអាង​ថា ​ស្ថានភាព​សិទ្ធិ​មនុស្ស​និង​ លទ្ធិ​ប្រជា​ធិបតេយ្យ​នៅ​កម្ពុជា​បច្ចុប្បន្ន​ធ្លាក់​ដល់​កម្រិត​សូន្យ​ហួស​ពី​ប្រកាស​អាសន្ន​ទៅ​ទៀត។​

ការ​អះអាង​របស់​លោក​រ៉ុង ឈុន​ធ្វើ​ឡើង​ក្នុង​ពិធី​ជួប​ជុំ​ក្រុម​អ្នក​គាំទ្រ​គណបក្ស​សង្រ្គោះ​ជាតិ​ក្នុង​រដ្ឋ​កាលីហ្វ័រញ៉ា​ សហ​រដ្ឋ​អាមេរិក​កាលពី​ថ្ងៃ​៣​កុម្ភៈ។​

លោក​រ៉ុង ឈុន​អះអាង​ថា​ រដ្ឋាភិបាល​តែង​រឹត​ត្បិត​គ្រប់​បែប​យ៉ាង​ទៅ​លើការ​ប្រារព្ធ​ទិវា​គ្រូ​បង្រៀន​អន្តរជាតិ ​ការ​ជួប​ជុំ​របស់​ពលរដ្ឋ ​និង​សង្គម​ស៊ីវិល។​

លោក​បន្ត​ថា ​ដូច​ករណី​ជាក់​ស្តែង​តែ​ម្តង​គឺ​ការ​បាញ់​ប្រហារ​ទៅ​លើ​ពលរដ្ឋ​ នៅ​ខេត្ត​ព្រះ​សីហនុ​ទាក់ទង​នឹង​វិវាទ​ដីធ្លី​កាលពី​ពេល​ថ្មីៗ​នេះជា​ដើម។​ លោក​ព្រមាន​ថា​ ស្ថាន​ភាព​អាក្រក់​នេះ​នឹង​ធ្វើ​ឱ្យ​កម្ពុ​ជា​ខាត​បង់​ប្រយោជន៍​សេដ្ឋកិច្ច​យ៉ាង​ធំធេង​ ដែល​ធ្វើឱ្យ​ប៉ះពាល់​ដល់​កម្មករ​ជិត​១​លាននាក់​តាម​រយៈ​ការ​ដក​ហូត​ប្រព័ន្ធ​អនុ​គ្រោះ​ពន្ធ​ពី​សហភាព​អឺរ៉ុប​និង​សហ​រដ្ឋ​អាមេរិក។​​

ប៉ុន្តែ​លោក​កែវ រ៉េមី​ប្រធាន​គណៈ​កម្មការ​សិទ្ធិ​មនុស្ស​របស់​រដ្ឋាភិបាល​កម្ពុជា​កាល​ពី​ចុង​ខែ​មករា​បាន​អះអាង​នៅ​ចំពោះ​មុខ​ក្រុម​ប្រឹក្សា​សិទ្ធិ​មនុស្ស​របស់​អង្គការ​សហ​ប្រជាជាតិ​ថា ​កម្ពុជា​ជោគជ័យ​ក្នុង​កិច្ចការ​ការពារ​សិទ្ធិ​មនុស្ស​និង​លទ្ធិ​ប្រជា​ធិបតេយ្យ។​​

ទោះជាយ៉ាង​ណាក៏​ដោយ​ សមាជិក​ក្រុម​ប្រឹក្សា​សិទ្ធិ​មនុស្ស​អង្គ​ការ​សហ​​ប្រជាជាតិ​មាន​ទាំង​សហ​រដ្ឋ​អាមេរិក​ផង​ បាន​ព្រមាន​រដ្ឋាភិបាល​កម្ពុជា​ឲ្យ​ស្តារ​លទ្ធិ​ប្រជា​ធិបតេយ្យ ​បញ្ឈប់​ការ​យាយី​គណបក្ស​ប្រឆាំង ​ក្រុម​សង្គម​ស៊ីវិល​ ប្រព័ន្ធ​ផ្សព្វ​ផ្សាយ​ឯក​រាជ្យ ​ផ្តល់​សិទ្ធិ​ធ្វើ​នយោបាយ​ឡើង​វិញ​ដល់​មន្រ្តី​គណបក្ស​ប្រឆាំង​​ និង​ទម្លាក់​បទចោទ​លើ​លោក​កឹម សុខា។ ​ រី​ឯ​តំណាង​របស់​ចក្រភព​អង់គ្លេស​វិញ​ ក៏បាន​លើក​ឡើង​ថា ​ការ​បោះឆ្នោត​កាលពី​ថ្ងៃ​ទី​២៩​ ខែ​កក្កដា​ឆ្នាំ​២០១៨​ជា​ការ​បោះឆ្នោត​មួយ​ដែល​គ្មាន​ភាព​ស្រប​ច្បាប់៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស