គណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ដែលដឹកនាំដោយលោកសៅ សុខាមេបញ្ជាការកងរាជអាវុធហត្ថលើផ្ទៃប្រទេសប្តេជ្ញាជាថ្មីម្តងទៀតថា នឹងការពារធនធានធម្មជាតិឱ្យមានប្រសិទ្ធភាពនៅឆ្នាំ២០១៩នេះ។
ការប្តេជា្ញចិត្តជាថ្មីរបស់លោកសៅ សុខាធ្វើឡើងនៅក្នុងកិច្ចប្រជុំការងាររបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិកាលពីថ្ងៃច័ន្ទ ដោយមានការចូលរួមពីអភិបាលខេត្ត និងមេបញ្ជាការកងរាជអាវុធហត្ថមួយចំនួន។
លោកសៅ សុខាបានបញ្ជាឱ្យអាជ្ញាធរខេត្ត និងស្ថាប័នពាក់ព័ន្ធមួយចំនួនត្រូវទប់ស្កាត់ និងបង្ក្រាបឲ្យមានប្រសិទ្ធភាពប្រឆាំងបទល្មើសកាប់បំផ្លាញព្រៃឈើ ការដឹកជញ្ជូនឈើការធ្វើអាជីវកម្មឈើដោយខុសច្បាប់ ការបាញ់ ឬចាប់សត្វព្រៃ ការធ្វើអាជីវកម្មសត្វព្រៃដោយខុសច្បាប់ ការកាប់ទន្ទ្រាន និងកាន់កាប់ដីរបស់រដ្ឋ ព្រមទាំងការរុករករ៉ែដោយខុសច្បាប់ នៅទូទាំងប្រទេស។
ជាងនេះទៅទៀតលោកក៏បានបញ្ជាឱ្យមន្ត្រីពាក់ព័ន្ធ ត្រូវបើកការស៊ើបអង្កេតស្រាវជ្រាវរកជនដែលប្រព្រឹត្តបទល្មើស និងជនដែលនៅពីក្រោយខ្នងនៃបទល្មើសដើម្បីចាប់ខ្លួននិងបញ្ជូនទៅតុលាការតាមនីតិវិធីច្បាប់។
ប៉ុន្តែក្រុមអង្គការឃ្លាំមើលបរិស្ថានមួយចំនួនអះអាងថា ការប្តេជ្ញាចិត្តរបស់លោកសៅ សុខាអាចជាការប្តេជ្ញាខ្យល់ពីព្រោះបទល្មើសព្រៃឈើនៅតែកើតឡើងឥតឈប់ឈរ។ មិនតែប៉ុណ្ណោះ ក្រុមឧក្រិដ្ឋជនព្រៃឈើធំៗ ដែលធ្លាប់ត្រូវបានលោកហ៊ុន សែនចង្អុលចំឈ្មោះ ដូចជា ឧកញ៉ាលីម ប៊ុណ្ណា ហៅខ្នា ឧកញ៉ាស៊ឹង សំអុលហៅអុលពាក់ព័ន្ធនឹងការជួញដូរឈើខុសច្បាប់នោះ នៅតែអាចរួចខ្លួនដដែល។
ក្រៅពីឧកញ៉ាទាំងនេះ ក៏មានឧកញ៉ានិងមន្ត្រីគ្រាក់ៗ នៅក្បែរលោកហ៊ុន សែនជាច្រើនទៀត ដែលធ្លាប់មានឈ្មោះក្នុងទំព័រកាសែតក្នុងស្រុក និងក្រៅស្រុក ព្រមទាំងមានឈ្មោះក្នុងរបាយការណ៍ស៊ើបអង្កេតរបស់អន្តរជាតិទៀតផង ដូចជាឧកញ៉ាទ្រី ភាព ឧកញ៉ាថៃ និងសែស្រឡាយរបស់លោកហ៊ុន សែនមួយចំនួនទៀត។
របាយការណ៍អន្តរជាតិមួយចំនួនក៏បានលើកឡើងថា អ្នកដែលកាងឬ ការពារឱ្យឈ្មួញរកស៊ីឈើ ឬឈ្មួញរ៉ុករករ៉ែភាគច្រើនជាក្រុមយោធា កងកម្លាំងប្រដាប់អាវុធនៅថ្នាក់ជាតិ និងថ្នាក់ខេត្តតែម្តង។
កាលពីឆ្នាំ២០១៦ រដ្ឋាភិបាលលោកហ៊ុន សែនសម្រេចបង្កើតគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ ដោយមានលោកសៅ សុខាជាប្រធាន។ ក្រោយការបង្កើតភ្លាម គណៈកម្មការនេះចាប់បានឈើប្រណិតជាង៧ម៉ឺនម៉ែត្រគូប នៅតាមឃ្លាំងស្តុកឈើរបស់ឧកញ៉ាលីម ប៊ុណ្ណាហៅខ្នា នៅឃុំដារ ស្រុកមេមត់។ ចំណែកឈើជាច្រើនទៀតត្រូវបានគេរកឃើញនៅតាមដីសម្បទានសេដ្ឋកិច្ចរបស់ក្រុមហ៊ុនលោកទ្រី ភាព ក្រុមហ៊ុនចិន និងក្រុមហ៊ុនវៀតណាមជាដើម៕