រដ្ឋាភិបាលសម្រេចទទួលស្គាល់គណបក្សថ្មីឈ្មោះគណបក្សបំណងពលរដ្ឋនៅក្នុងបញ្ជីនយោបាយ។
សេចក្តីប្រកាសរបស់ក្រសួងមហាផ្ទៃដែលផ្សព្វផ្សាយជាសាធារណៈនៅថ្ងៃទី៧ខែកុម្ភៈនេះ ចុះហត្ថលេខាដោយលោកស ខេងរដ្ឋមន្រ្តីក្រសួងមហាផ្ទៃឲ្យដឹងថា រដ្ឋាភិបាលសម្រេចទទួលស្គាល់គណបក្សបំណងពលរដ្ឋដែលមានលោកអ៊ិត សារម្យជាប្រធាន។
លោកអ៊ិត សារម្យជាអតីតសមាជិករបស់គណបក្សហ៊្វុនស៊ីនប៉ិច ក្រោយមកលោកបានទៅចូលរួមជាមួយគណបក្សជាតិខ្មែរ ដែលប្តូរទៅជាគណបក្សសម រង្ស៊ី។ បន្ទាប់មកទៀតលោកប្តូរពីគណបក្សសមរង្ស៊ីទៅចូលរួមជាមួយគណបក្សសម្ព័ន្ធដើម្បីប្រជាធិបតេយ្យរបស់លោកឃឹម វាសនារហូតដល់ឆ្នាំ២០១២។
ក្រសួងមហាផ្ទៃបញ្ជាក់ថា គណបក្សបំណងពលរដ្ឋ ត្រូវធ្វើសកម្មភាពរបស់ខ្លួនស្របទៅតាមច្បាប់ស្ដីពីគណបក្សនយោបាយនិងលក្ខនិ្តកៈរបស់គណបក្សដែលដាក់តម្កល់នៅក្រសួងមហាផ្ទៃ។
រហូតមកទល់ពេលនេះ យ៉ាងហោចណាស់មានគណបក្សនយោបាយជាង៤០ហើយដែលបានចុះបញ្ជីជាមួយក្រសួងមហាផ្ទៃកាលពីឆ្នាំកន្លងទៅ ក្រោយពីរបបលោកហ៊ុន សែននាំគ្នារំលាយគណបក្សសង្គ្រោះជាតិដែលជាគណបក្សប្រឆាំងដ៏ធំជាងនៅកម្ពុជា។
អ្នកសម្របសម្រួបផ្នែកអង្កេតជាន់ខ្ពស់របស់គណៈកម្មាធិការ ដើម្បីការបោះឆ្នោតដោយសេរី និងយុត្តិធម៌ហៅកាត់ថា COMFRELលោក កន សាវង្សបានប្រាប់សារព័ត៌មាន The Cambodia Dailyនៅមុនការផ្សាយនេះបន្តិចថា រដ្ឋាភិបាលទទួលស្គាល់គណបក្សនយោបាយកាន់តែច្រើន កាន់តែល្អក្នុងគោលការណ៍ប្រជាធិបតេយ្យប៉ុន្តែគណបក្សកាន់អំណាចត្រូវតែធានាអំពីការគោរពគោលការណ៍ប្រជាធិបតេយ្យការចូលរួមនយោបាយដោយឈរលើគោលការណ៍ស្មើភាពគ្នា និងការគោរពឆន្ទៈរបស់ប្រជាពលរដ្ឋ៕