រដ្ឋមន្ត្រីក្រសួងមហាផ្ទៃលោកស ខេងជំរុញឱ្យអាជ្ញាធរទាំងអស់ បង្កើនប្រសិទ្ធភាពក្នុងការបង្ក្រាបមេខ្លោងធំៗពាក់ព័ន្ធបទល្មើសគ្រឿងញៀនបន្ថែមទៀត ដើម្បីឆ្លើយតបទៅនឹងការកាត់បន្ថយចរាចរគ្រឿងញៀនទៅដល់អ្នកប្រើប្រាស់។
ការអះអាងរបស់លោកស ខេងធ្វើឡើងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០១៨និងលើកទិសដៅការងារសម្រាប់អនុវត្តបន្តឆ្នាំ២០១៩ របស់រដ្ឋបាលខេត្តស្ទឹងត្រែងនៅថ្ងៃនេះ។
លោកស ខេងបានជំរុញឱ្យពលរដ្ឋចូលរួមក្នុងការផ្ដល់ជូនព័ត៌មាននានាមកអាជ្ញាធរដើម្បីឲ្យមានដំណោះស្រាយ ដូចជាករណីគ្រឿងញៀននៅតាមមូលដ្ឋាន និងបញ្ហាផ្សេងៗទៀត ដែលពលរដ្ឋជួបប្រទះ។ ជាងនេះទៅទៀតលោកក៏បានដាស់តឿនមន្រ្តីទាំងអស់មិនឲ្យមាននរណាម្នាក់ជាប់ពាក់ព័ន្ធបញ្ហាគ្រឿងញៀនឡើយ ដោយលោកនិយាយថា ត្រូវចៀសវាងការបង្ក្រាបអ្នកផ្សេងៗ ប៉ុន្តែខ្លួនឯងជាមេខ្លោងជួញដូរគ្រឿងញៀននោះ។
កន្លងមកសង្គមស៊ីវិលធ្លាប់បានរិះគន់ចំពោះវិធានការបង្ក្រាបគ្រឿងញៀនរបស់សមត្ថកិច្ច ដោយថា បានបង្ក្រាបនិងចាប់ខ្លួនបាន ភាគច្រើនជាអ្នកប្រើប្រាស់ និងជនរងគ្រោះប៉ុណ្ណោះប៉ុន្តែមេខ្លោងជួញដូរគ្រឿងញៀនធំៗគឺចាប់បានតិចតួចណាស់ឬស្ទើរតែគ្មានតែម្តង។
សង្គមស៊ីវិលក៏ស្នើឱ្យមានការស៊ើបអង្កេតរកមេខ្លោងធំៗ យកមកផ្តន្ទាទោសតាមច្បាប់ ដោយគ្មានការយោគយល់ ពិសេសអ្នកដែលនៅពីក្រោយខ្នងបទល្មើសទាំងនោះ ជាជាងចាប់បានតែជនរងគ្រោះ។
របាយការណ៍របស់ក្រសួងមហាផ្ទៃឲ្យដឹងថា អ្នកជាប់ឃុំនៅពន្ធនាគារបច្ចុប្បន្នមានចំនួនជាង៣ម៉ឺននាក់ក្នុងនោះអ្នកជាប់ឃុំ២ភាគ៣ ពាក់ព័ន្ធបទល្មើសគ្រឿងញៀន ហើយពួកគេភាគច្រើនមិនទាន់ត្រូវបានតុលាការជំនុំជម្រះក្តីនៅឡើយ ដែលធ្វើឱ្យស្ថានភាពពន្ធនាគារកាន់តែអាក្រក់៕