ចៅក្រមស៊ើបសួរសាលាដំបូងរាជធានីភ្នំពេញលោកសេង ឫទ្ធីបានសម្រេចលើកលែងចោទប្រកាន់មកលើលោកជា មុន្នីអតីតប្រធានសហជីពសេរីកម្មករនៃព្រះរាជាណាចក្រកម្ពុជាក្នុងសំណុំរឿងដែលសមាគម និងសហជីពគាំទ្ររដ្ឋាភិបាលប្តឹងកាលពីចុងឆ្នាំ២០១៧។
កាលពីចុងខែធ្នូឆ្នាំ២០១៨ ចៅក្រមស៊ើបសួរនៃសាលាដំបូងរាជធានីភ្នំពេញលោកសេង ឫទ្ធីបានចេញលិខិតជូនដំណឹងមួយដែលលិខិតនោះទើបត្រូវបានផ្សព្វផ្សាយកាលពីមិ្សលមិញដោយសម្រេចលើកលែងការចោទប្រកាន់ជាផ្លូវការលើលោកជា មុន្នី។
អតីតប្រធានសហជីពសេរីកម្មករនៃព្រះរាជាណាចក្រកម្ពុជាលោកជា មុន្នី ត្រូវបានក្រុមសមាគមសហជីពដែលគាំទ្ររដ្ឋាភិបាលចំនួន១២០បានដាក់ពាក្យប្តឹងពីបទញុះញង់កាលពីថ្ងៃ១៨ខែធ្នូឆ្នាំ២០១៧ បន្ទាប់ពីលោកបាន ផ្តល់បទសម្ភាសន៍ដល់វិទ្យុអាស៊ីសេរីនៅថ្ងៃទី១៥ខែធ្នូឆ្នាំ២០១៧ពាក់ព័ន្ធនឹងដាក់ទណ្ឌកម្មរបស់សហភាពអឺរ៉ុបមកលើរដ្ឋាភិបាលកម្ពុជា។
ក្នុងបទសម្ភាសន៍ពេលនោះ លោកជា មុន្នីបានបញ្ចេញប្រតិកម្ម ដើម្បីឆ្លើយតបទៅនឹងការរំលាយគណបក្សសង្រ្គោះជាតិ កាលពីថ្ងៃទី ១៤ វិច្ឆិកាឆ្នាំ២០១៧ដោយថា ប្រទេសកម្ពុជាកំពុងឆ្ពោះទៅរកប្រទេសឯការហើយក៏ស្នើឱ្យសហគមន៍អឺរ៉ុបដាក់ទណ្ឌកម្មមកលើរដ្ឋាភិបាលលោកហ៊ុន សែន។
ពាក្យបណ្តឹងមេធាវីតំណាងឱ្យសហភាព សមាគម និងសម្ព័ន្ធសហជីព កាលពីឆ្នាំ២០១៧បានប្តឹងលោកជា មុន្នីពីបទញុះញង់និងស្នើឱ្យតុលាការផ្តន្ទាទោសតាមច្បាប់ ព្រមទាំងទាមទារសំណងជំងឺចិត្តដល់កម្មករនិយោជិតចំនួន១លានដុល្លារសហរដ្ឋអាមេរិកផងដែរ។
ក្រោយពីរងពាក្យបណ្តឹង លោកជា មុន្នីបានរត់ភៀសខ្លួនទៅក្រៅប្រទេសដើម្បីគេចផុតពីការចាប់ខ្លួនរបស់អាជ្ញាធរក្រុងភ្នំពេញផងដែរ។
ក្រៅពីបណ្តឹងនេះ លោកជា មុន្នីក៏នៅមានបណ្តឹងផ្សេងទៀតពាក់ព័ន្ធករណីហិង្សានៅផ្លូវវ៉េងស្រេង កាលពីដើមឆ្នាំ២០១៤ ប៉ុន្តែករណីនេះត្រូវបានលោកហ៊ុន សែនធ្លាប់ចេញមុខអះអាងថា មេដឹកនាំសហជីពមួយចំនួនដូចជា ប្រធានសហភាពការងារកម្ពុជាលោកអាត់ ធន់ និងប្រធានសហភាពចលនាកម្មក រកម្ពុជាលោកប៉ាវ ស៊ីណាព្រមទាំងលោកជា មុន្នីផង មិនបានជាប់ពាក់ព័ន្ធក្នុងករណីនោះឡើយ។
យ៉ាងណាក៏ដោយ ការលើកលែងបទចោទប្រកាន់លើអតីតប្រធានសហជីពសេរីកម្មករកម្ពុជាពេលនេះត្រូវបានថ្នាក់ដឹកនាំសហជីពនិង មន្ត្រីសង្គមស៊ីវិលមួយចំនួនមើលឃើញថា ជាសញ្ញាវិជ្ជមានមួយ ហើយក៏ស្នើឱ្យមានការទម្លាក់បទចោទ និងលើកលែងទោសដល់មន្ត្រីសហជីពទាំងអស់ដែលកំពុងជាប់បណ្តឹងផងដែរ។
លើសពីនេះទៅទៀត ក្រុមសង្គមស៊ីវិលក៏ស្នើឱ្យពិនិត្យករណីអយុត្តិធម៌ដទៃទៀត ដែលបានប្តឹងមន្ត្រីសង្គមស៊ីវិល អ្នកសារព័ត៌មានឯករាជ្យ ព្រមទាំងមន្ត្រីគណបក្សប្រឆាំងដែលកំពុងជាប់ឃុំ និងកំពុងរងបណ្តឹងជាដើមនោះ៕