អគ្គស្នងការនគរបាលជាតិបានអះអាងថានៅឆ្នាំ២០១៨កន្លងទៅនេះសភាពការណ៍ជារួមនៅកម្ពុជាមានភាពល្អប្រសើរដោយសារបានទប់ស្កាត់ឧបាយកលទុច្ចរិតរបស់ក្រុមប្រឆាំងក្រៅច្បាប់ទាន់ពេលវេលាប៉ុន្តែស្ថានភាពបទល្មើសនិងសកម្មភាពបាតុកម្មនិងកូដកម្មមានការកើនឡើង បើធៀបទៅនឹងឆ្នាំ២០១៧។
របាយការណ៍បូកសរុបការងាររបស់អគ្គស្នងការនគរបាលជាតិដែលបានចេញផ្សាយកាលពីម្សិលមិញឲ្យដឹងថានៅឆ្នាំ២០១៨សភាពការណ៍ជារួមនៅប្រទេសកម្ពុជាមានលក្ខណៈល្អប្រសើរមានសុខសន្តិភាពដោយទប់ស្កាត់និងបញ្ចៀសបាននូវអំពើភេរវកម្មការពារបាននូវបូរណភាពទឹកដីអធិបតេយ្យជាតិការពាររឹងមាំនូវឯករាជ្យជាតិសាមគ្គីភាពឯកភាពផ្ទៃក្នុងផងដែរ។
របាយការណ៍ដដែលបញ្ជាក់ថាកាលពីឆ្នាំ២០១៨រដ្ឋាភិបាលកម្ពុជាបានរៀបចំការងារបោះឆ្នោតព្រឹទ្ធសភានីតិកាលទី៤និងបោះឆ្នោតជ្រើសតាំងតំណាងរាស្ត្រអាណត្តិទី៦ប្រកបដោយជោគជ័យគ្មានអំពើហិង្សានិងការគំរាមកំហែងបើទោះបីជាក្រុមក្រៅច្បាប់ទាំងក្នុងនិងក្រៅប្រទេសប្រើប្រាស់គ្រប់កលល្បិចប៉ុនប៉ងបំផ្លាញព្រឹត្តិការណ៍ជាប្រវត្តិសាស្ត្រយ៉ាងណាក៏ដោយ។
ទោះបីយ៉ាងណាក៏ដោយស្ថានភាពនៅឆ្នាំ២០១៨ត្រូវបានសង្គមស៊ីវិលជាតិនិងអន្តរជាតិវាយតម្លៃថាលំហប្រជាធិបតេយ្យសេរីពហុបក្សនិងបញ្ហាសិទ្ធិមនុស្សកាន់តែរួមចង្អៀតទៅៗ។
ជាក់ស្តែងចាប់តាំងពីមានការចាប់ខ្លួនប្រធានគណបក្សសង្រ្គោះជាតិលោកកឹមសុខានិងរំលាយគណបក្សនេះកាលពីចុងឆ្នាំ២០១៧មករដ្ឋាភិបាលលោកហ៊ុនសែនបានធ្វើទុក្ខបុកម្នេញស្ទើរគ្រប់យ៉ាងទៅលើមន្ត្រីជាប់ឆ្នោតនិងសកម្មជនរបស់បក្សមួយនេះដោយមានទាំងការគំរាមកំហែងការចាប់ដាក់ពន្ធនាគារនិងការអូសទាញឱ្យចុះចូលបក្សប្រជាជនកម្ពុជាផងដែរ។
សហគមន៍អន្តរជាតិបានចេញសេចក្តីប្រកាសមិនទទួលស្គាល់លទ្ធផលបោះឆ្នោតកាលពីខែកក្កដាឆ្នាំ២០១៨ឡើយដោយហៅការបោះឆ្នោតនោះជាការបោះឆ្នោតបែបបង្រ្គប់កិច្ចនិងក្លែងក្លាយព្រោះជាការបោះឆ្នោតដែលបានទាត់ចោលគណបក្សសង្រ្គោះជាតិដែលជាគណបក្សប្រឆាំងដ៏ធំមុនការបោះឆ្នោតចូលមកដល់។
មិនតែប៉ុណ្ណោះសហគមន៍អន្តរជាតិបានចាត់ទុកកម្ពុជាក្រោមការដឹកនាំរបស់លោកហ៊ុនសែនបានបំផ្លាញឫសគល់នៃលទ្ធិប្រជាធិតេយ្យនិងសិទ្ធិមនុស្សយ៉ាងធ្ងន់ធ្ងរស្របពេលលោកហ៊ុនសែនកំពុងងាកយ៉ាងខ្លាំងទៅរករបបក្រុងប៉េកាំង៕