មន្ត្រីជាន់ខ្ពស់កងរាជអាវុធហត្ថលើផ្ទៃប្រទេសបញ្ជាក់ថា គ្រាប់កាំភ្លើងដែលបាញ់ចំពលរដ្ឋម្នាក់បណ្តាលឱ្យរបួសធ្ងន់ក្នុងប្រតិបត្តិការបង្ក្រាបពលរដ្ឋករណីវិវាទដីធ្លី កាលពីខែមករា ក្នុងខេត្តព្រះសីហនុគឺមិនមែនជាគ្រាប់កាំភ្លើងរបស់សមត្ថកិច្ចឡើយ។
អ្នកនាំពាក្យកងរាជអាវុធលើផ្ទៃប្រទេសលោកអេង ហ៊ីបានប្រាប់ក្រុមអ្នកសារព័ត៌មានថា មន្ត្រីរបស់លោកមិនបានបាញ់ប្រហារទៅលើ ពលរដ្ឋនោះឡើយក្នុងអំឡុងពេលចុះអនុវត្តសាលដីការបស់តុលាការនៅក្នុងសំណុំរឿងជម្លោះដីធ្លីមួយស្ថិតក្នុងស្រុកព្រៃនប់ ខេត្តព្រះសីហនុ ដែលឈានទៅដល់កើតមានអំពើហិង្សាបង្កឲ្យពលរដ្ឋ២នាក់រងរបួសនោះ។
ក្នុងសន្និសីទសារព័ត៌មានដែលធ្វើឡើងនៅឯខេត្តព្រះសីហនុនៅថ្ងៃច័ន្ទនេះលោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស អះអាងថា កងកម្លាំងរាជអាវុធហត្ថចំនួន១០០នាក់ដែលបំពាក់ដោយកាំភ្លើងវែង១០ដើម និងកាំភ្លើងខ្លី៦ដើមមិនបានបាញ់ត្រូវពលរដ្ឋម្នាក់ឱ្យរងរបួសធ្ងន់ធ្ងរនោះឡើយ។
លោកថ្លែងការពារមន្ត្រីសមត្ថកិច្ចថា អាវុធដែលបាញ់ត្រូវពលរដ្ឋម្នាក់ក្នុងថ្ងៃចុះអនុវត្តសាលដីកានោះជាអាវុធខ្លីប្រភេទK59 ប៉ុន្តែក្រោយពីស៊ើបអង្កេតនិងធ្វើកោសលវិច័យមក លោកថា ក្បាលគ្រាប់ដែលបាញ់ចំពលរដ្ឋនោះមិនមែនជាក្បាលគ្រាប់ ដែលបាញ់ចេញដោយកងកម្លាំងអាវុធហត្ថនោះទេ ប៉ុន្តែលោកទទួលស្គាល់ថា ក្នុងហេតុការណ៍នោះ កម្លាំងរបស់លោកពិតជាបានប្រើកាំភ្លើងបាញ់មែន ប៉ុន្តែបាញ់ទៅលើប៉ុណ្ណោះ។ លោកបន្តថា សមត្ថកិច្ចកំពុងធ្វើការស៊ើបអង្កេតដើម្បីស្វែងរកជនល្មើសដែលបានបាញ់ពលរដ្ឋនៅពេលនោះ។
លោកបន្តថា អង្គភាពយោធាបានសម្រេចព្យួរការងារមន្ត្រីអាវុធហត្ថម្នាក់និងបានកសាងសំណុំរឿងបញ្ជូនទៅតុលាការចំពោះករណីប្រើហិង្សាទៅលើអ្នកស្រុកម្នាក់ដែលជាប់ខ្នោះដៃព័ទ្ធមកខាងក្រោយ និងលុតជង្គង់លើដីរួចទៅហើយនោះ។
ការអះអាងរបស់លោកអេង ហ៊ីធ្វើឡើងស្របគ្នាទៅនឹងការអះអាងរបស់អាជ្ញាធរខេត្តព្រះសីហនុពីដំបូងដែលថា ករណីបាញ់ពលរដ្ឋម្នាក់ដែលជាកម្មករសំណង់ឱ្យរបួសធ្ងន់នោះ អាចជាក្រុមបាតដៃទីបី ដែលមិនមែនជាក្រុមសមត្ថកិច្ចឡើយ។
ប៉ុន្តែក្រុមសង្គមស៊ីវិលក្នុងស្រុកអះអាងថា សមត្ថកិច្ចកំពុងឆ្លើយដោះសារ ដោយគ្មានការទទួលខុសត្រូវដ្បិតការស៊ើបអង្កេតទាំងឡាយគ្មានក្រុមឯករាជ្យចូលរួម និងគ្មានតម្លាភាពឡើយ។
កាលពីថ្ងៃទី២៤ខែមករា សមត្ថកិច្ចចម្រុះខេត្តព្រះសីហនុប្រមាណ៣រយនាក់ដឹកនាំដោយលោកហួត វិចិត្រ ព្រះរាជអាជ្ញារងនិងអាជ្ញាធរខេត្តបានចុះអនុវត្តសាលដីការបស់តុលាការកំពូលឲ្យអ្នកស្រីហុង សួន ភរិយារបស់ឧកញ៉ាស៊ីវ គង់ទ្រីវស្ថិតភូមិគគីរ ឃុំបិទត្រាំងរហូតដល់មានការផ្ទុះអំពើហិង្សាកើតឡើងបណ្តាលឲ្យពលរដ្ឋម្នាក់ដែលជាកម្មករសំណង់ត្រូវគ្រាប់កាំភ្លើងដែលបាញ់ចំពីក្រោយត្រង់ស្មាពីខាងឆ្វេងបៀមជាប់ឆ្អឹងខ្នង ហើយពលរដ្ឋ៦នាក់ផ្សេងទៀតត្រូវបានសមត្ថកិច្ចឃាត់ខ្លួនបណ្តោះអាសន្ន ប៉ុន្តែដោះលែងវិញនៅយប់ថ្ងៃដដែល។
បុរសដែលរងរបួសដោយគ្រាប់កាំភ្លើងនេះ អាចនឹងពិការទៀតផង ពីព្រោះរហូតមកទល់ពេលនេះ រាងកាយរបស់លោកមួយចំហៀងនៅមិនទាន់អាចកម្រើកបាននៅឡើយ៕