រដ្ឋមន្ត្រីក្រសួងការបរទេសកម្ពុជាលោកប្រាក់ សុខុនបានបង្ហាញការខកចិត្តចំពោះសកម្មភាពរបស់មន្ត្រីនយោបាយគណបក្សសង្រ្គោះជាតិជាប់បម្រាម ព្រោះពួកគេចំនួនតិចតួចប៉ុណ្ណោះមកសុំសិទ្ធិពីលោកហ៊ុន សែនដើម្បីធ្វើនយោបាយឡើងវិញ។មិនតែប៉ុណ្ណោះ លោកក៏ខកចិត្តផងដែរចំពោះវិធានការឈានទៅដកប្រព័ន្ធអនុគ្រោះពន្ធរបស់សហភាពអឺរ៉ុបសម្រាប់កម្ពុជា។
ថ្លែងក្នុងពិធីមហាសន្និបាតប្រចាំឆ្នាំ២០១៩នៅទីស្តីការក្រសួងការបរទេសកាលពីព្រឹកមិញលោកប្រាក់ សុខុនអះអាងថា របបលោកហ៊ុន សែនបានខិតខំស្ដារលទ្ធិប្រជាធិបតេយ្យឡើងវិញតាមរយៈការកែច្បាប់បើកផ្លូវឲ្យអ្នកជាប់បម្រាមរបស់តុលាការអាចទទួលបានសិទ្ធិធ្វើនយោបាយឡើងវិញ។
រដ្ឋមន្រ្តីក្រសួងការបរទេសរូបនេះបានថ្លែងការពាររបបក្រុងភ្នំពេញថា ការដាក់ពាក្យស្នើសុំសិទ្ធិធ្វើនយោបាយឡើងវិញនេះគឺគ្រាន់តែជាការបង្គ្រប់កិច្ចប៉ុណ្ណោះហើយលោកក៏បានចោទលោកសម រង្ស៊ី ប្រធានស្តីទីគណបក្សសង្រ្គោះជាតិដែលបានផ្ញើរសារគំរាមមិនឲ្យមន្ត្រីបក្សប្រឆាំងដែលជាប់បម្រាមរបស់តុលាការទៅដាក់ពាក្យស្នើសុំសិទ្ធិធ្វើនយោបាយពីលោកហ៊ុន សែនឡើយ។
លោកបន្តថា ប្រសិនបើគ្មានការគំរាមនិងទប់ស្កាត់ពីលោកសម រង្ស៊ីទេ ម៉្លេះមន្ត្រីជាប់បម្រាមទាំងអស់នឹងទៅសុំសិទ្ធិធ្វើនយោបាយពីលោកហ៊ុន សែន តែម្តង។
កាលពីថ្ងៃម្សិលមិញលោកហ៊ុន សែន បានព្រមានបិទទ្វារក្នុងការផ្ដល់សិទ្ធិធ្វើនយោបាយដល់ក្រុមថ្នាក់ដឹកនាំបក្សប្រឆាំងដទៃទៀតដែលពុំទាន់បានដាក់ពាក្យស្នើសុំសិទ្ធិធ្វើនយោបាយឡើងវិញ ត្រឹមមុនឬក្រោយចូលឆ្នាំខ្មែរយ៉ាងយូរហើយថែមទាំងគំរាមវាយខ្នោះមន្ត្រីទាំងនោះប្រសិនបើពួកគេហ៊ានធ្វើសកម្មភាពនយោបាយណាមួយ ខណៈពួកគេមិនទាន់ទទួលបានសិទ្ធិពីលោកដើម្បីធ្វើនយោបាយឡើងវិញទេនោះ។
ប៉ុន្តែលោកសម រង្ស៊ី ប្រធានប្រធានស្តីទីគណបក្សសង្រ្គោះជាតិតែងព្រមានម្តងហើយម្តងទៀតថា ការទៅសុំសិទ្ធិពីលោកហ៊ុន សែនដើម្បីបានធ្វើនយោបាយឡើងវិញគឺមានន័យថា ពួកគេបានប្រព្រឹត្តនូវអំពើក្បត់បក្ស ក្បត់ឆន្ទៈរាស្រ្តនិងជាការទទួលស្គាល់ថា ការរំលាយបក្សសង្គ្រោះជាតិកន្លងមកជាទង្វើត្រឹមត្រូវ៕