ក្រុមបណ្តាញអង្គការ និងសហជីពដែលធ្វើការងារលើកម្ពស់សិទ្ធិស្ត្រីបញ្ជាក់ថា ពួកគេនឹងនៅតែដើរហែក្បួនក្នុងថ្ងៃទិវាសិទ្ធិនារីអន្តរជាតិនាថ្ងៃស្អែកនេះដើម្បីបង្ហាញអំពីសិទ្ធិសេរីភាពរបស់ខ្លួននិងបញ្ហាប្រឈមនានារបស់ស្ត្រីជាពិសេសបញ្ហាប្រឈមរបស់ស្ត្រីដែលបំពេញការងារលើកកម្ពស់សិទ្ធិមនុស្ស។
នាយិកាប្រតិបត្តិសហជីពចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីនបានថ្លែងនៅក្នុងសន្និសីទសារព័ត៌មាននៅថ្ងៃនេះថា ពួកគាត់នៅតែរក្សាជំហរដើរហែក្បួនតាមការគ្រោងទុកដដែលដើម្បីដាក់ញត្តិនៅតាមក្រសួងពាក់ព័ន្ធ ឲ្យដោះស្រាយបញ្ហាប្រឈមរបស់ស្ត្រីដែលបានកើតឡើងពេលកន្លងមក កំពុងកើតឡើង ពេលបច្ចុប្បន្ន។
អ្ននស្រីថា ការដង្ហែក្បួននោះនឹងធ្វើឡើងដោយទន់ភ្លន់ហើយបើត្រូវអាជ្ញាធរក្រុងភ្នំពេញបង្ក្រាបក៏ពួកគេមិនអ្វីតបតនោះឡើយ ព្រោះសិទ្ធិអំណាចទាំងអស់ស្ថិតនៅក្នុងដៃរបស់របបក្រុងភ្នំពេញប៉ុណ្ណោះ។
ក្រុមសហជីព និងសង្គមស៊ីវិលដែលដឹកនាំដោយស្ត្រីគ្រោងប្រារព្ធទិវាសិទ្ធិនារីអន្តរជាតិថ្ងៃ៨មីនា ខួបលើកទី ១០៨ នៅថ្ងៃស្អែកនេះ ក្រោមប្រធានបទ«រួមគ្នាបញ្ឈប់អំពើហិង្សាគ្រប់រូបភាពមកលើស្ត្រី» ដោយធ្វើក្បួនដង្ហែថ្មើរជើងចាប់ពីមុខពហុកីឡាដ្ឋានជាតិអូឡាំពិក ទៅកាន់ការិយាល័យទីស្ដីការគណៈរដ្ឋមន្ត្រីដើម្បីប្រគល់«ញត្តិស្ដីពីតម្រូវការអាទិភាពរបស់ស្ត្រី»ជូនដល់រដ្ឋាភិបាល។
យ៉ាងណាក៏ដោយគម្រោងដើរហែក្បួនរបស់ក្រុមស្រ្តីមិនត្រូវបានអាជ្ញាធរក្រុងភ្នំពេញអនុញ្ញាតឡើយក្រោមហេតុផលថា បង្កផលប៉ះពាល់ដល់សន្តិសុខ សណ្តាប់ធ្នាប់និងរបៀបរៀបរយសាធារណៈជាដើម។
ក្រុមស្ត្រីទាំងនេះ ក៏បានសម្តែងការសោកស្តាយចំពោះការបដិសេធក្រោមហេតុផលទាំងនេះ ដោយថា ជាហេតុផលដដែលៗ របស់អាជ្ញាធរក្រុងភ្នំពេញដែលតែងរឹតត្បិតសិទ្ធិសេរីភាពរបស់ពលរដ្ឋ និងក្រុមសង្គមស៊ីវិលក្នុងការជួបជុំដោយសន្តិវិធីនៅតាមទីសាធារណៈដើម្បីបង្ហាញពីក្តីកង្វល់របស់ខ្លួន។ ពួកគេអះអាងថា ពួកគេនឹងនៅតែដឹកនាំការហែក្បួនដោយសន្តិវិធីទៅតាមការគ្រោងទុកដដែល៕