អាជ្ញាធរខេត្តកោះកុងបានណែនាំឱ្យពលរដ្ឋ ម្ចាស់សណ្ឋាគារ ផ្ទះសំណាក់ សហគ្រាសទាំងអស់ដែលរស់នៅក្រុងខេមរភូមិន្ទនិងស្រុកមណ្ឌលសីមាត្រូវត្រៀមម៉ាស៊ីនភ្លើងផ្ទាល់ខ្លួនសម្រាប់ប្រើប្រាស់ដោយសារខេត្តនេះអាចនឹងមិនមានអគ្គិសនីគ្រប់គ្រាន់។
សេចក្តីជូនដំណឹងរបស់មន្ទីររ៉ែនិងថាមពលខេត្តកោះកុងដែលចេញផ្សាយជាសាធារណៈកាលពីថ្ងៃព្រហស្បតិ៍ ហើយដែលសារព័ត៌មាន The Cambodia Dailyទើបទទួលបាននៅថ្ងៃនេះឲ្យដឹងថា ភាពខ្វះខាតភ្លើងអគ្គិសនីនៅពេលនេះគឺដោយសារអាកាសធាតុរាំងស្ងួតធ្វើឱ្យស្ថានីយ៍វារីអគ្គិសនីស្ទឹងតាតៃ និងវារីអគ្គិសនីស្ទឹងឫស្សីជ្រុំ មានកម្រិតទឹកទាប ពុំអាចទាញយកថាមពលអគ្គិសនីសម្រាប់ផ្គត់ផ្គង់ការប្រើប្រាស់ឲ្យបានគ្រប់គ្រាន់ក្នុងខេត្តក៏ដូចជានៅទូទាំងប្រទេស។
លិខិតដដែលឲ្យដឹងទៀតថា ថាមពលអគ្គិសនីមានតែ១០MWប៉ុណ្ណោះ ហើយពលរដ្ឋនៅក្រុងខេមរភូមិន្ទ និងនៅស្រុកមណ្ឌលសីមានឹងពុំមានភ្លើងអគ្គិសនីប្រើប្រាស់គ្រប់គ្រាន់ឡើយ។
ខេត្តកោះកុងមិនត្រឹមតែប្រឈមនឹងកង្វះភ្លើងប្រើប្រាស់ប៉ុណ្ណោះទេប៉ុន្តែខេត្តជាប់មាត់សមុទ្រមួយនេះក៏កំពុងប្រឈមកង្វះទឹកស្អាតសម្រាប់ប្រើប្រាស់ធ្ងន់ធ្ងរហើយរដ្ឋាភិបាលក៏បញ្ជាឱ្យទិញប្រព័ន្ធទឹកសម្រាប់ប្រើប្រាស់ពីប្រទេសថៃទៀតផង។
សង្គមស៊ីវិលមើលឃើញថា រដ្ឋាភិបាលដឹកនាំជាង៣០ឆ្នាំមកនេះនៅតែបរាជ័យក្នុងការអភិវឌ្ឍប្រទេសជាលក្ខណៈយូរអង្វែងទោះបីជាកម្ពុជាសម្បូរធនធានធម្មជាតិ មានកន្លែងរក្សាទឹកសាប និងទឹកប្រៃធំៗជាច្រើនកន្លែង ប៉ុន្តែកម្ពុជានៅតែប្រឈមកង្វះទឹកប្រើប្រាស់នៅរដូវប្រាំង ហើយបញ្ហានេះតែងតែកើតមានស្ទើរជារៀងរាល់ឆ្នាំក្នុងរយៈពេលចុងក្រោយនេះ៕