ក្រុមសង្គមស៊ីវិលនិងក្រុមអតីតបុគ្គលិករបស់កាសែត The Cambodia Dailyរាប់រយនាក់កាលពីថ្ងៃម្សិលមិញ រហូតដល់ថ្ងៃនេះបាននាំគ្នាធ្វើពិធីរំលឹកវិញ្ញាណក្ខន្ធ និងពិធីរាប់បាតឧទិ្ទសកុសលផលបុណ្យដល់លោកBernard Krisherចាងហ្វាងកាសែតThe Cambodia Dailyនៅក្នុងសង្កាត់ច្បារអំពៅ ទីក្រុងភ្នំពេញ។
អតីតអ្នកកាសែតThe Cambodia Dailyនិងជាអ្នកឆ្លើយឆ្លងព័ត៌រ៉យទ័រ (Reuters)លោកប្រាក់ ចន្ធុលមានប្រសាសន៍ថា ក្នុងនាមលោកជាអតីតបុគ្គលិករបស់កាសែតThe Cambodia Daily លោកមានការសោកស្តាយនិងអាឡោះអាល័យជាខ្លាំងចំពោះការបាត់បង់លោកBernard Krisher។ លោកបន្តថា The Cambodia Dailyនេះជាស្ថាប័នកាសែតឯករាជ្យពិតប្រាកដែលធ្វើការដោយគ្មានការភ័យខ្លាច។ លោកប្រាក់ ចន្ធុលបន្តថា ស្ថាប័នកាសែតមួយនេះជាថ្នាលបណ្តុះបណ្តាលជំនាញខាងផ្នែកសារព័ត៌មាន ដល់អ្នកកាសែតជាជនខ្មែរនិងបរទេសដែលមិនទាន់មានជំនាញជាអ្នកកាសែត។
លោកបន្តថា ក្រៅពីជួយកសាងសាលានៅតាមជនបទជាង៥រយខ្នង លោកBernard Krisherក៏បានបង្កើតមជ្ឈមណ្ឌលអប់រំសម្រាប់សិស្សក្រីក្រនិងបង្កើតកម្មវិធីជំនួយមនុស្សធម៌មួយឈ្មោះ HOPE ប្រចាំនៅមន្ទីរពេទ្យព្រះសីហនុក្នុងទីក្រុងភំ្នពេញ ដែលជួយព្យាបាលដល់បុគ្គលិកThe Cambodia Dailyនិងប្រជាជនក្រីក្រដទៃទៀតដោយមិនគិតថ្លៃ។
លោកBernard Krisherប្រធានអង្គការជំនួយពិភពលោកសម្រាប់កម្ពុជានិងជាស្ថាបនិករបស់សារព័ត៌មានThe Cambodia Dailyបានទទួលមរណភាពដោយសារជំងឺគាំងបេះដូង កាលពីថ្ងៃទី៥ ខែមីនានៅឯមន្ទីរពេទ្យមួយក្នុងទីក្រុងតូក្យូ ប្រទេសជប៉ុនក្នុងវ័យ៨៧ឆ្នាំ។
មរណភាពរបស់លោកBernard Krisherត្រូវបានក្រុមគ្រួសារទម្លាយឲ្យដឹងជាសាធារណៈ ក្រោយពីការរៀបចំពិធីបញ្ចុះសពលក្ខណៈឯកជនមួយធ្វើឡើងនៅទីក្រុងញូវយ៉ក៕