ក្រុមអតីតមន្ត្រីគណបក្សសង្រ្គោះជាតិ ដែលទើបនឹងទទួលបានសិទ្ធិធ្វើនយោបាយឡើងវិញចុងក្រោយអះអាងថា ពួកគេគ្មានបំណងបង្កើតគណបក្សនយោបាយឬ ចុះចូលជាមួយគណបក្សកាន់អំណាចឡើយ។
អតីតមន្ត្រីគណបក្សសង្រ្គោះជាតិ រួមមានលោកអ៊ូ ច័ន្ទរ័ត្ន លោកជីវ កត្តា លោកកង គឹមហាក់ លោកទេព សុទ្ធី លោកស៊ឹម សុវណ្ណី និងលោកស្រីច័ន្ទ សីលាបានបញ្ជាក់ជំហរថា ពួកគេនៅតែបន្តទាមទារឱ្យដោះលែងប្រធានគណបក្សសង្រ្គោះជាតិលោកកឹម សុខានិងផ្តល់នីតិសម្បទាជូនលោកវិញដើម្បីឱ្យលោកមានឱកាសដឹកនាំសកម្មភាពនយោបាយឡើងវិញ។ លើសពីនេះពួកគេក៏នៅតែទាមទារឱ្យរបបក្រុងភ្នំពេញផ្តល់តំណែងក្រុមប្រឹក្សាឃុំសង្កាត់ជូនអតីតមន្ត្រីដែលជាប់ឆ្នោតគណបក្សសង្រ្គោះជាតិឡើងវិញផងដែរ។
បន្ថែមពីនេះ ក្រុមអតីតមន្ត្រីបក្សប្រឆាំងទាំងនោះបានអះអាងថា ខ្លួននៅតែរួមរស់ជីវិតនយោបាយជាមួយគណបក្សសង្រ្គោះជាតិដដែលទោះបីជាបក្សនេះបច្ចុប្បន្នមិនទាន់រស់ឡើងវិញក្តី។
ថ្លែងនៅក្នុងសន្និសីទសារព័ត៌មាននៅសណ្ឋាគារសាន់វ៉េ នាព្រឹកនេះ អតីតមន្ត្រីជាន់ខ្ពស់បក្សប្រឆាំងម្នាក់លោកអ៊ូ ច័ន្ទរ័ត្នបានលើកឡើងថា ក្រោយពេលពួកគាត់ទទួលបានសិទ្ធិធ្វើនយោបាយឡើងវិញក្រុមលោកនឹងធ្វើការងារមួយចំនួនដើម្បីជំរុញឱ្យមានការបង្រួបបង្រូមជាតិ ផ្សះផ្សារជាតិ ពិសេសជំរុញឱ្យដោះលែងប្រធានគណបក្សប្រឆាំងលោកកឹម សុខាផងដែរ។
លោកថា ការទទួលបានសិទ្ធិធ្វើនយោបាយនេះដើម្បីបង្កភាពងាយស្រួលក្នុងការធ្វើសកម្មភាពនយោបាយផ្សេងៗ ពិសេសជួបជាមួយអតីតសហការីរបស់ខ្លួន ដោយគ្មានការភ័យខ្លាច។
លោកអ៊ូ ច័ន្ទរ័ត្នបានអះអាងដែរថា ក្រុមលោកមិនបានទទួលបានប្រាក់ឬលាភសក្ការៈណាមួយពីបក្សកាន់អំណាចទេ ប៉ុន្តែជាការឈរនៅលើប្រយោជន៍ជាតិជាធំដោយសំឡឹងឃើញភាពបែកបាក់ជាតិកាន់តែធ្ងន់ធ្ងរ និងដើម្បីបញ្ជៀសហានិភ័យដល់ប្រទេសជាតិផងដែរ។
ថ្លែងក្នុងពិធីចែកសញ្ញាបត្រឱ្យនិស្សិតនៅរាជធានីភ្នំពេញនាព្រឹកនេះ លោកហ៊ុន សែនក៏បានអះអាងថា លោកមិនបានចំណាយប្រាក់ទៅលើក្រុមអតីតមន្ត្រីបក្សប្រឆាំងដែលសុំសិទ្ធិនយោបាយពីលោកទេ។
លោកក៏បានបញ្ជាឱ្យអាជ្ញាធរទាំងអស់ត្រូវសម្រួលដល់សកម្មភាពធ្វើនយោបាយរបស់ក្រុមមន្ត្រីដែលទទួលបានសិទ្ធិធ្វើនយោបាយពីលោកឱ្យបានប្រសើរ ប៉ុន្តែលោកក៏បានព្រមានផងដែរ ចំពោះក្រុមមន្ត្រីបក្សសង្រ្គោះជាតិដែលកំពុងជាប់បម្រាមថា នឹងត្រូវចាប់ខ្លួនប្រសិនបើហ៊ានធ្វើសកម្មភាពនយោបាយណាមួយមុនពេលទទួលបានសិទ្ធិធ្វើនយោបាយពីលោកនោះ។
ចំណែកលោកផែង ហេង ដែលជាមេធាវីរបស់លោកកឹម សុខាបានសរសេរនៅលើគណនីហ្វេសប៊ុករបស់លោកនៅថ្ងៃនេះថា លោកកឹម សុខាមិនបានហាមឃាត់ ឬព្រមានអ្នកដែលសុំសិទ្ធិធ្វើនយោបាយហើយក៏មិនបានជំរុញឲ្យទៅសុំសិទ្ធិធ្វើនយោបាយដែរ។
ក្នុងចំណោមអតីតមន្ត្រីគណបក្សសង្រ្គោះជាតិ១១៨រូបដែលជាប់បម្រាមគឺមានតែមន្ត្រីចំនួន៩រូបប៉ុណ្ណោះដែលបានដាក់លិខិតសុំសិទ្ធិធ្វើនយោបាយឡើងវិញពីលោកហ៊ុន សែន។ ពួកគេទាំង៩រូបក៏ត្រូវបានព្រះមហាក្សត្រ និងប្រមុខរដ្ឋស្តីទីផ្តល់សិទ្ធិធ្វើនយោបាយឡើងវិញ តាមការចង់បានរបស់លោកហ៊ុន សែនហើយដែរ៕