លោកហ៊ុន សែននៅថ្ងៃនេះបានថ្លែងអំណរគុណដល់ថ្នាក់ដឹកនាំគ្រប់ខេត្ដក្រុងទាំងអស់ ដែលបានរៀបចំព្រឹត្តិការណ៍សង្ក្រាន្ដឆ្នាំថ្មី ដើម្បីបង្កលក្ខណៈសប្បាយរីករាយដល់ពលរដ្ឋ។
មេដឹកនាំបក្សកាន់អំណាចដែលកំពុងឃុំខ្លួនមេដឹកនាំបក្សប្រឆាំងរូបនេះបានសរសេរនៅលើទំព័រហ្វេសប៊ុករបស់លោកដែលបានណែនាំឲ្យសមត្ថកិច្ចទាំងអស់ត្រូវពង្រឹងសន្ដិសុខ សណ្ដាប់ធ្នាប់ឲ្យបានល្អ ដើម្បីធានាសុវត្ថិភាពគ្រប់ទីកន្លែងទាំងអស់ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ។
ក្រុមអ្នកឃ្លាំមើលនិយាយថា ពិធីបុណ្យចូលឆ្នាំឆ្នាំនេះហាក់មានភាពសោះកក្រោះ ខណៈអ្នកនយោបាយដែលមាននិន្នាការផ្ទុយកំពុងស្ថិតក្នុងការឃុំឃាំងក្នុងផ្ទះ ហើយចំណែកក្រុមមេដឹកនាំបក្សប្រឆាំងជាច្រើនរូបទៀតកំពុងរស់នៅភៀសខ្លួនក្រៅប្រទេស គេចពីការធ្វើទុក្ខបុកម្មេញរបស់រដ្ឋាភិបាលក្រុងភ្នំពេញ។
ចំណែកលោកសមរង្ស៊ី ប្រធានស្តីទី គណបក្សសង្គ្រោះជាតិ កាលពីម្សិលមិញបានថ្លែងសារតាមទំព័រហ្វេសប៊ុករបស់លោកថា ក្នុងឱកាសបុណ្យចូលឆ្នាំថ្មី ប្រពៃណីខ្មែរ ឆ្នាំកុរ នេះ ប្រទេសកម្ពុជាត្រូវតែទទួលបានការផ្លាស់ប្តូរជាវិជ្ជមាន។
រីឯលោកកឹម សុខាប្រធានគណបក្សសង្គ្រោះជាតិដែលកំពុងជាប់ឃុំក្នុងផ្ទះបានសរសេរនៅលើហ្វេសប៊ុករបស់លោកដោយបួងសួងសុំឱ្យទេវតាឆ្នាំថ្មីសម្អាតចិត្តមនុស្សពិសេសអ្នកនយោបាយឱ្យឈប់ជេរប្រមាថគំរាមកំហែង និងមួលបង្កាច់គ្នា ហើយឱ្យខ្មែររួមរស់ជាមួយគ្នាឱ្យបានសុខសាន្ត និងសម្អាតចិត្តមនុស្ស។
លោកកឹម សុខាបានសរសេរថា សូមឲ្យកំចាត់ចេញពីកាយវាចានិងចិត្តរបស់មនុស្ស ជាពិសេសអ្នកនយោបាយខ្មែរ នូវអកុសលធម៌ទាំងឡាយលោភៈ ទោសៈ មោហៈដូចជាការលោភលន់គ្មានព្រំដែន ការរំលោភបំពាន ការគំរាមកំហែង អំពើហិង្សា ការមួលបង្កាច់ចោទប្រកាន់ ការលាបពណ៌ ការជេរប្រមាថ ការគំកួនសងសឹកគ្នា ដែលជាមូលហេតុនាំឲ្យមានការឈឺចាប់ ការបែកបាក់ក្នុងសង្គមជាតិ និងនាំឲ្យអាប់ឱននូវតម្លៃពូជសាសន៍ តម្លៃនៃអ្នកដឹកនាំ ជាពិសេសកិត្យានុភាពជាតិ។ ជាងនេះទៅទៀត លោកកឹម សុខាក៏បានបួងសួងឱ្យឆ្នាំនេះក្លាយជាឆ្នាំសិរីសួស្តី ដែលខ្មែរទាំងអស់គ្នាងាកមករកដំណោះស្រាយរួមគ្នាវិញ៕