មេដឹកនាំរដ្ឋាភិបាលក្រុងភ្នំពេញលោកហ៊ុន សែនអះអាងថា បច្ចុប្បន្នគ្មានគណបក្សណាមួយអាចមានលទ្ធភាពរក្សាសន្តិភាព និងដឹកនាំប្រទេសគ្មានសង្គ្រាមដូចគណបក្សរបស់លោកឡើយ។
ថ្លែងក្នុងពិធីបើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ពីខេត្តបន្ទាយមានជ័យនៅថ្ងៃនេះ លោកហ៊ុន សែនបាននិយាយបែបចំអកទៅដៃគូនយោបាយចាស់របស់លោកគឺលោកសម រង្ស៊ីថា ជាមេដឹកនាំបក្សដែលមិនទាន់បានដឹកនាំប្រទេសផង ប៉ុន្តែតែងប្រាប់ឱ្យពលរដ្ឋធ្វើរដ្ឋប្រហាររួចទៅហើយ ដោយថា ទង្វើបែបនេះនឹងមិនអាចធ្វើឱ្យប្រទេសជាតិបានសុខឡើយ។
លើសពីនេះទៅទៀត មេដឹកនាំដែលក្រាញអំណាចជាង៣០ឆ្នាំរូបនេះ ក៏បានបញ្ជាឲ្យមន្ត្រីរបស់ខ្លួនមិនឱ្យឆ្លើយ មិនឆ្លងនឹងលោកសម រង្ស៊ីជាពិសេស ការអំពាវនាវរបស់មេបក្សប្រឆាំងរូបនេះដែលបានណែនាំឱ្យរដ្ឋមន្ត្រីក្រសួងមហាផ្ទៃលោកស ខេងផ្តួលរំលំលោកពីតំណែង។
លោកបន្តទាំងសំឡេងញ័រថា លោកស ខេងមិនមែនល្ងង់ដល់ថ្នាក់ធ្វើរដ្ឋប្រហារ និងបក្សប្រហារទម្លាក់លោកចេញពីតំណែង ហើយយកអំណាចឱ្យមេបក្សប្រឆាំងនោះឡើយ ហើយការធ្វើរដ្ឋប្រហារណាមួយ នឹងនាំឲ្យកម្ពុជាធ្លាក់ទៅក្នុងភ្លើងសង្គ្រាមតែម្តង។
កាលពីថ្ងៃទី១ខែមេសា ប្រធានស្តីទីគណបក្សសង្រ្គោះជាតិ លោកសម រង្ស៊ីបានបង្ហោះវីដេអូខ្លីបមួយនៅលើទំព័រហ្វេសប៊ុករបស់លោកអមដោយសំណេរចោទជាសំណួរថា តើរវាងគូប្រកួត លោកហ៊ុន សែននិងលោកស ខេងនរណាហ៊ានវ៉ៃមុន?
លោកសម រង្ស៊ីថា សម្រាប់បក្សសង្រ្គោះជាតិគឺ គាំទ្រលោកស ខេង ពេញទំហឹងដើម្បីកម្ចាត់លោកហ៊ុន សែនដោយថាមន្ត្រីធំៗក្នុងជួររដ្ឋាភិបាលជាច្រើនមិនសប្បាយចិត្តនឹងត្រកូលហ៊ុន ដែលបានក្តោបក្តាប់ជំនួញក្នុងដៃយ៉ាងច្រើន ជាពិសេសការធ្វើឱ្យរាស្ត្រទឹកភ្នែក ហើយពួកគេរង់ចាំតែឱកាសមកដល់ប៉ុណ្ណោះ។ លោកបានប្រាប់ក្រុមលោកស ខេងឱ្យផ្តួលរំលំឬវ៉ៃមុន ដោយថា បើចាំលោកហ៊ុន សែនវ៉ៃប្រហារមុននឹងមិនងាយស្រួលនោះឡើយ។
កាលពីថ្ងៃទី២០មេសាក្នុងពិធីបញ្ចុះខណ្ឌសីមាព្រះវិហារ និងឆ្លងសមិទ្ធផលនានា នៅវត្តមួយក្នុងខេត្តព្រៃវែងលោកស ខេងបានទទួលស្គាល់ថា ក្រោមការដឹកនាំរបស់លោកហ៊ុន សែនបច្ចុប្បន្នពិតមានកំហុសខ្លះប្រាកដមែន ប៉ុន្តែលោកថា កំហុសទាំងនេះអាចកែសម្រួលបាន មិនមែនធ្ងន់ធ្ងរដល់ថ្នាក់ត្រូវការឱ្យផ្តួលរំលំទេ ហើយកំហុសទាំងនោះក៏មិនធ្ងន់ធ្ងរដូចរបបខ្មែរក្រហមនោះដែរ។
ទោះជាយ៉ាងណាក៏ដោយ សហគមន៍អន្តរជាតិ ដែលមានសហភាពអឺរ៉ុប និងសហរដ្ឋអាមេរិកនាំមុខនោះ បានជំរុញឱ្យរដ្ឋាភិបាលវិលទៅដំណោះស្រាយរួមមួយ ដោយឈរលើគោលការណ៍គោរពសិទ្ធិមនុស្ស ស្តារប្រជាធិបតេយ្យឡើងវិញ ដើម្បីបញ្ចៀសពីទណ្ឌកម្មសេដ្ឋកិច្ចផ្សេងៗ ដែលនឹងនាំឱ្យប្រទេសនេះធ្លាក់ទៅក្នុងវិបត្តិសង្គមធ្ងន់ធ្ងរ៕