លោកហ៊ុន សែនអះអាងថា ភាគីកម្ពុជាបានស្នើទៅភាគីថៃ ដើម្បីបើកច្រកព្រំដែនអន្តរជាតិចំនួន៤បន្ថែមទៀតដើម្បីពង្រីកការអភិវឌ្ឍតាមព្រំដែន និងរួមចំណែកសម្រួលពាណិជ្ជកម្មរវាងប្រជាជននៃប្រទេសទាំងពីរផងដែរ។
ថ្លែងក្នុងពិធីបើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥នៅព្រឹកថ្ងៃនេះ លោកហ៊ុន សែន បានលើកឡើងថា លោកបានស្នើទៅនាយករដ្ឋមន្ត្រីថៃ លោកប្រាយុទ្ធ ចាន់អូចាដើម្បីបើកច្រកព្រំដែនអន្តរជាតិចំនួន៤បន្ថែមl ទៀត។
ច្រកព្រំដែនទាំង៤នោះរួមមាន ច្រកព្រំដែន អានសេះ ក្នុងខេត្តព្រះវិហារ ភ្ជាប់ជាមួយច្រកព្រំដែននៃខេត្តអ៊ូប៊ុន ប្រទេសថៃ។ ច្រកព្រំដែន ជប់គគីរ ក្នុងខេត្តឧត្តរមានជ័យភ្ជាប់នឹងច្រកព្រំដែនខេត្តបូរីរ៉ាំ របស់ថៃ ហើយទី៣ច្រកព្រំដែនភ្នំដី ក្នុងខេត្តបាត់ដំបង ភ្ជាប់នឹងច្រកព្រំដែននៃខេត្តស្រះកែវ ព្រមទាំងច្រកព្រំដែនថ្មដារ ក្នុងខេត្តពោធិ៍សាត់ ភ្ជាប់នឹងច្រកព្រំដែនខេត្តត្រាត ប្រទេសថៃ។
លោកបញ្ជាក់ថា ការស្នើនេះគឺដើម្បីរួមចំណែកប្រែក្លាយតំបន់តាមព្រំដែនទៅជាតំបន់សន្តិភាព មិត្តភាព សហប្រតិបត្តិការ និងការអភិវឌ្ឍរួមគ្នា។ បច្ចុប្បន្នច្រកអន្តរជាតិកម្ពុជាជាប់ព្រំដែនប្រទេសវៀតណាមមានចំនួន ១០កន្លែង ច្រកព្រំដែនអន្តរជាតិកម្ពុជាជាប់ព្រំដែនប្រទេសថៃមានចំនួនប្រមាណ១០ កន្លែង និងច្រកទ្វារអន្តរជាតិកម្ពុជាជាប់ព្រំដែនប្រទេសឡាវមានចំនួន១កន្លែង៕