25 C
Phnom Penh

រដ្ឋាភិបាល​ដាក់​ចេញ​វិធាន​ការ​ទប់ស្កាត់​បទ​ល្មើស​និង​ឧក្រិដ្ឋ​កម្ម​ឆ្លង​ដែន​

ដោយ ឌឹ ខេមបូឌា ដេលី

បទវិភាគ

ក្រសួង​មហាផ្ទៃ​ បាន​ដាស់​តឿន​ដល់​មន្ត្រី​ព្រំដែន​ទាំងអស់ ​ឲ្យ​ពង្រឹង​ការ​ត្រួត​ពិនិត្យ​បន្ថែម​ទៀត​ ជា​ពិសេស​ចាត់​វិធាន​ការ​ឱ្យ​បាន​ម៉ឹងម៉ាត់​ទៅ​លើ​បទ​ល្មើស​គ្រឿងញៀន​និង​ការ​លាង​លុយ​ទុច្ចរិត​ ព្រម​ទាំង​ឧក្រិដ្ឋ​កម្ម​ឆ្លង​ដែន​នានា ​ដូចជា​ការ​ជួញ​ដូរ​មនុស្ស ​ជួញ​ដូរ​អាវុធ​ខុស​ច្បាប់​ និង​បទ​ល្មើស​បច្ចេក​វិទ្យា​ផង​ដែរ។​

សេចក្ដី​ណែនាំ​របស់​ក្រសួង​មហា​ផ្ទៃ​នៅថ្ងៃ​នេះ ​រដ្ឋមន្ត្រី​ក្រសួង​មហាផ្ទៃ​ លោក​ស ខេង​បាន​ណែនាំ​ដល់​កង​កម្លាំង​នគរបាល​ជាតិឲ្យ​បង្កើន​ការ​ទទួល​ខុស​ត្រូវ ​និង​ចាត់​វិធាន​ការ​ឲ្យ​មាន​ប្រសិទ្ធ​ភាព​ទៅ​លើ​បទ​ល្មើស​ឆ្លង​ដែន​គ្រប់​ប្រភេទ​ដើម្បី​ទប់​ស្កាត់​នូវ​ហានិភ័យ​ដែល​បង្ក​អសន្តិ​សុខ​ ភាព​វឹកវរ ​ចលាចល​ និង​មហន្ត​រាយ​ធ្ងន់ធ្ងរ​ចំពោះ​សង្គម​តាម​គ្រប់​រូបភាព។​

ការ​ណែនាំ​នេះ​ធ្វើ​ឡើង​បន្ទាប់​ពី​រដ្ឋាភិបាល​ទទួល​បាន​ព័ត៌មាន​អំពី​ការ​ប៉ុនប៉ង​លួច​ធ្វើ​សកម្ម​ភាព​ឧក្រិដ្ឋ​កម្ម​ឆ្លងដែន ​នៅ​ភូមិសាស្ត្រ​មួយ​ចំនួន​ដែល​មាន​ការ​ធ្វេស​ប្រហែស ​និង​ខ្វះ​ការ​ប្រុង​ប្រយ័ត្ន​ជាដើម។​

សេចក្ដី​ណែនាំ​ដដែល​នេះ​ឲ្យ​ដឹង​ទៀត​ថា ​ចំពោះ​បទ​ល្មើស​ជួញ​ដូរ​គ្រឿង​ញៀន ​និង​លាង លុយ។​lក្រសួង​មហាផ្ទៃ​ជំរុញ​ឲ្យ​មាន​ការ​ស្រាវជ្រាវ​និង​បង្ក្រាប​ឲ្យ​បាន​ម៉ឺងម៉ាត់​នៅតាម​ច្រក​ព្រំដែន​អន្តរជាតិ​ ច្រក​ទ្វារ​ព្រំដែន​ទ្វេរ​ភាគី ​កំពង់​ផែ​សមុទ្រ ​និង​តាម​ខ្សែ​បន្ទាត់​ព្រំដែន​ ដោយ​​តម្រូវ​ឲ្យ​រាយ​ការណ៍​សុំ​គោល​ការណ៍​ពី​ក្រសួង​ដោយ​ផ្ទាល់។​

របាយ​ការណ៍​៩​ខែ​ឆ្នាំ​២០១៨ ​របស់​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​បាន​លើក​ឡើង​ថា ​ការ​ជួញ​ដូរ​គ្រឿង​ញៀន​ឆ្លងកាត់​ព្រំដែន​ប្រទេស​កម្ពុជា​ទៅ​កាន់​ទី​ផ្សារ​គ្រឿង​ញៀន​ក្នុង​តំបន់ ​និង​អន្តរជាតិ​នៅ​តែ​បន្ត​កើត​មាន​ ដែល​តម្រូវ​ឲ្យ​មន្ត្រី​កម្ពុជា​ពង្រឹង​ការ​សហការ​ជា​មួយ​មន្ត្រី​ប្រទេស​ជិត​ខាង​ជាប់​ព្រំដែន​ដើម្បី​ធ្វើ​ការងារ​ទាំង​នេះឱ្យ​មាន​ប្រសិទ្ធ​ភាព។​

យ៉ាង​នេះ​ក្តី​សេចក្តី​ណែនាំ​របស់​រដ្ឋាភិបាល​មិន​បាន​និយាយ​ដល់​បទ​ល្មើស​រត់ពន្ធ​ឈើ​ចេញ​ទៅ​ប្រទេស​ជិតខាង​ ពិសេស​ចេញ​ទៅ​ប្រទេស​វៀតណាម ​ដែល​ប្រជា​សហគមន៍​តែង​រាយ​ការណ៍​ថា​សកម្ម​ភាព​រត់​ពន្ធ​ឈើ​ចេញ​ទៅ​ប្រទេស​វៀតណាម​នៅ​កើត​ឡើង​រៀង​រាល់​យប់។​ ពល​រដ្ឋ​នៅ​តាម​ព្រំដែន​ មើល​ឃើញ​ថា​ ឧក្រិដ្ឋ​កម្ម​ឆ្លងដែន​មួយ​នេះ​នៅតែ​កើត​មាន​ដែល​ធ្វើឱ្យ​ពួក​គេ​យល់​ថា​ ការ​បង្កើត​គណៈ​កម្មការ​ជាតិ​ទប់​ស្កាត់​និង​បង្ក្រាប​បទល្មើស​ធនធាន​ធម្មជាតិ​របស់​រដ្ឋាភិបាល​លោក​ហ៊ុន សែន​បំពេញ​ការងារ​មិន​ទាន់​មាន​ប្រសិទ្ធ​ភាព​ទាំង​ស្រុង​នៅ​ឡើយ៕​  

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស