កូនប្រុសសកម្មជនបរិស្ថានដ៏ល្បីឈ្មោះលោកឈុត វុទ្ធីគឺលោកឆឺយ ឧត្តមរស្មី អំពាវនាវដល់មហាជនចូលរួមពិធីបុណ្យគម្រប់៧ឆ្នាំនៃការបាញ់សម្លាប់ឪពុករបស់លោក។
លោកឆឺយ ឧត្តមរស្មីបានសរសេរលើហ្វេសប៊ុករបស់លោកថា ពិធីឧទ្ទិសកុសលជូនវិញ្ញាណក្ខន្ធលោកឈុត វុទ្ធីនេះធ្វើនៅថ្ងៃសុក្រទី២៦ ខែមេសាឆ្នាំ២០១៩វេលាម៉ោង៧ព្រឹកដល់ម៉ោង១១ថ្ងៃត្រង់ នៅកន្លែងបញ្ចុះសពលោកឈុត វុទ្ធីស្ថិតក្នុងភូមិស្វាយមាស ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល។
កូនប្រុសច្បងរបស់សកម្មជនបរិស្ថានរូបនេះអំពាវនាវដល់ សាធារណជនទាំងក្នុងប្រទេស និងក្រៅប្រទេសបណ្ដាអង្គការសង្គមស៊ីវិលនានាអ្នកសារព័ត៌មានជាតិនិងអន្តរជាតិចូលរួមជាភ្ញៀវកិត្តិយសក្នុង ពិធីបុណ្យគម្រប់ខួប៧ឆ្នាំនៃការបាញ់សម្លាប់លោកឈុត វុទ្ធី។
អតីតប្រធានអង្គការការពារធនធានធម្មជាតិលោកឈុត វុទ្ធីត្រូវបាន បាញ់សម្លាប់កាលពីថ្ងៃទី២៦ខែមេសាឆ្នាំ២០១២។ ការបាញ់សម្លាប់នេះកើតឡើងនៅអំឡុងពេលលោកកំពុងបំពេញបេសកកម្មនៅខេត្តកោះកុង ដែលលោកបានចុះទៅពិនិត្យនិងថតរូបសកម្មភាពបទល្មើសព្រៃឈើនៅខែត្រនេះ។
ទោះជារបាយការណ៍របស់សមត្ថកិច្ចបង្ហាញថា អ្នកបាញ់សម្លាប់លោកឈុត វុទ្ធីជាមន្រ្តីកងរាជអាវុធហត្ថម្នាក់នៅខេត្តកោះកុង ហើយមន្រ្តីរូបនោះបានបាញ់សម្លាប់ខ្លួនហើយក្តី ប៉ុន្តែមហាជនទូទៅ និងក្រុមគ្រួសារលោកឈុត វុទ្ធីនៅតែគ្មានការជឿជាក់លើការអះអាងរបស់របាយការណ៍នោះឡើយ៕