33.3 C
Phnom Penh

រដ្ឋ​មន្ត្រី​ក្រសួង​មហា​ផ្ទៃ​ថា ​អ្នក​ស្នេហា​ជាតិ​ពិត​ប្រាកដ​ មិន​មែន​ជា​អ្នក​រត់​ចោល​ពល​រដ្ឋ​ទេ​

ដោយ ឌឹ ខេមបូឌា ដេលី

បទវិភាគ

រដ្ឋ​មន្ត្រី​ក្រសួង​មហា​ផ្ទៃ​ បាន​និយាយ​ឌឺដង​ទៅ​កាន់​អ្នក​រិះគន់​នៅ​ក្រៅ​ប្រទេស​ដែល​ប្រហែល​សំដៅ​ទៅ​ក្រុម​បក្ស​ប្រឆាំង​ថា​ បាន​តែស្រែក​រិះគន់ ​ប៉ុន្តែ​មិន​បាន​ធ្វើ​អ្វី​ជួយ​ពលរដ្ឋ​នោះ​ឡើយ​ ​ជាពិសេស​នៅ​ពេល​ពលរដ្ឋ​មាន​ទុក្ខ ​ហើយ​តែង​អួត​ថា​ ខ្លួន​ឯង​ជា​អ្នក​ស្នេហា​ជាតិ។​

ថ្លែង​ក្នុង​ពិធី​សំណេះ​សំណាល​និង​សួរ​សុខ​ទុក្ខ​ប្រជា​ពលរដ្ឋ​រងគ្រោះ​ដោយ​ខ្យល់​កន្ត្រាក់​ នៅ​ខេត្ត​បាត់ដំបង​នា​ព្រឹក​ថ្ងៃ​ទី​២៥​ ខែ​មេសា​នេះ​ ឧប​នាយក​រដ្ឋមន្ត្រី ​និង​ជា​រដ្ឋមន្ត្រី​ក្រសួង​មហា​ផ្ទៃ ​លោក​ស ខេង​មាន​ប្រសាសន៍​​ថា ​អ្នក​ស្នេហាជាតិ​ពិត​ប្រាកដ​ គឺជា​អ្នក​នៅ​ក្រាញ​ននៀល​ស្លាប់​រស់​ជាមួយ​ពលរដ្ឋ​ ដោយ​មិន​រត់​ចោល​ពល​រដ្ឋ​ពេល​មាន​ទុក្ខ​នោះ​ឡើយ។​

លោក​ស ខេង​លើក​ឡើង​ថា​ អ្នក​ស្នេហាជាតិ​ពិត​ប្រាកដ​គឺ​ត្រូវ​ជួយ​ជាតិ​ ពេល​មាន​ទុក្ខ ​ជួយ​ប្រជាជន​ពេល​មាន​ទុក្ខ​ ដោយ​ត្រូវ​នៅជា​មួយ​ប្រជាជន ​ហើយ​ត្រូវ​ការ​ពារ​ប្រជាជន​ ការ​ពារ​ទឹក​ដី​របស់​ខ្លួន​ឱ្យ​បាន​ ការពារ​ឯករាជ្យ​ភាព​របស់​ខ្លួន​ឱ្យ​បាន។​

លោក​បន្ត​ថា ​ធ្វើ​យ៉ាង​ណា​ឱ្យ​ប្រទេស​ជាតិ​មាន​សុខ​សន្តិភាព​ មាន​ស្ថិរភាព​ មាន​ការ​អភិវឌ្ឍ​​ មិន​មែន​គ្រាន់​តែ​ស្រែក​​ពីខាង​ក្រៅ​ប្រទេស​ដោយ​មិន​ធ្វើ​អ្វី​សោះ​ ហើយ​លើក​ខ្លួន​ឯង​ថា​ ជា​អ្នក​ស្នេហា​ជាតិ​នោះ​ទេ។ ​​

អតីត​ប្រធាន​គណបក្ស​សង្គ្រោះ​ជាតិ ​លោក​សម រង្ស៊ី​កន្លង​មក​ធ្លាប់​បាន​រិះគន់​ថា ​រដ្ឋាភិបាល​របស់​លោក​ហ៊ុន សែន​បច្ចុប្បន្ន​ដែល​កំពុង​រស់នៅ​ផ្ទាល់​ជាមួយ​ពល​រដ្ឋ​ក្នុង​ប្រទេស ​ប៉ុន្តែ​បាន​ធ្វើ​ឱ្យ​ជាតិ​ និង​រាស្ត្រ​ឈឺ​ចាប់​ច្រើន ​ដូចជា​ការ​ដឹក​នាំ​បែប​សែ​ស្រឡាយ​បក្ខពួក ​និង​គ្រួសារ​និយម។​ ការ​ប្រព្រឹត្ត​អំពើ​ពុករលួយ ​ការ​កេង​ប្រវ័ញ្ច​ទ្រព្យ​សម្បត្តិ​ជាតិ​ បំផ្លិច​បំផ្លាញ​ធនធាន​ធម្មជាតិ​ រំលោភ​យក​ដី​រាស្ត្រ ​តុលាការ​មិន​ឯករាជ្យ​ ដែល​ធ្វើឱ្យ​ពលរដ្ឋ​ទន់​ខ្សោយ ​រង​ភាព​អយុត្តិធម៌​ឥត​ស្រាក​ស្រាន្ត ​ការ​រំលាយ​ឆន្ទៈ​រាស្ត្រ​ម្ចាស់​ឆ្នោត​ស្ទើរ​កន្លះ​នគរ​ព្រម​ទាំង​ការ​បើក​ដៃ​ឱ្យ​បរទេស ​ពិសេស​ចិន​និង​វៀតណាម​ មក​ត្រួតត្រា​ខ្មែរ​ម្ចាស់​ស្រុក​ជា​ដើម។​

លោក​សម រង្ស៊ី​ក៏តែង​ចោទ​ប្រកាន់​រដ្ឋាភិបាល​លោក​ហ៊ុន សែន​ពិសេស​ត្រកូល​ហ៊ុន​តែ​ម្តង​ថា​ ជា​អ្នក​បំផ្លាញ​ជាតិ​ បំផ្លាញ​លទ្ធិ​ប្រជា​ធិបតេយ្យ ​និង​រំលោភ​សិទ្ធិ​មនុស្ស​ធ្ងន់ធ្ងរ​ ធ្វើយ៉ាង​ណា​ដើម្បី​តែ​ការ​ពារ​អំណាច​ខ្លួន​និង​គ្រួសារ​របស់​ខ្លួន​ប៉ុណ្ណោះ។​

វិបត្តិ​នយោបាយ​នៅ​កម្ពុជា​និង​ភាព​មិន​ចុះ​សម្រុង​គ្នា​រវាង​គណបក្ស​សង្គ្រោះ​ជាតិ​ និង​បក្ស​កាន់​អំណាច​បាន​កើត​មាន​កាន់​តែខ្លាំង ​ក្រោយ​ពេល​រដ្ឋាភិបាល​លោក​ហ៊ុន សែន​ចាប់ខ្លួន​ប្រធាន​គណបក្ស​សង្រ្គោះ​ជាតិ​លោក​កឹម សុខា​ដាក់​ពន្ធនាគារ ​និង​រំលាយ​គណបក្ស​នេះ​កាល​ពី​ចុង​ឆ្នាំ​២០១៧។​ ​

កាលពី​ដើម​ឆ្នាំ​២០១៩ ​ស្ថានទូត​សហ​រដ្ឋ​អាមេរិក​ប្រចាំ​កម្ពុជា​ បាន​ទទូច​ឱ្យ​មេដឹក​នាំ​ខ្មែរ​វិល​ទៅ​រក​ដំណោះ​ស្រាយ​ជាតិ​រួមមួយ​ដោយ​ឈរ​នៅ​លើ​គោល​ការណ៍​ប្រជា​ធិបតេយ្យ ​និង​ការ​គោរព​សិទ្ធិ​មនុស្ស ​ព្រម​ទាំង​តម្កល់​ផល​ប្រយោជន៍​ជាតិ​ជា​ធំ ​ជាង​ផល​ប្រយោជន៍​នយោបាយ​ឬ​ ផល​ប្រយោជន៍​បុគ្គល។ ​សហ​រដ្ឋ​អាមេរិក​ក៏​បាន​ទាមទារ​ឱ្យ​ដោះលែង​ លោក​​កឹម សុខា​ ដោយ​ថា​ ប្រធាន​គណបក្ស​ប្រឆាំង​រូប​នេះ​គ្មាន​កំហុស​ ហើយ​ការឃុំ​ខ្លួន​គឺ​ជា​រឿង​អ​យុត្តិធម៌។​

លើស​ពីនេះ​អាមេរិក​ស្នើកម្ពុជា​ស្តារ​ស្ថាន​ភាព​នយោបាយ ​និង​ បញ្ហា​សិទ្ធិ​មនុស្ស​ឡើង​វិញ​ដើម្បី​បញ្ចៀស​ពី​ទណ្ឌ​កម្ម​សេដ្ឋកិច្ច​របស់​សហ​ភាព​អឺរ៉ុប​ តាម​រយៈ​ការ​ដក​ហូត​ប្រព័ន្ធ​អនុគ្រោះ​ពន្ធ​EBA​ដែល​នឹង​ធ្វើ​ឱ្យ​កម្ពុជា​ខាត​បង់​ប្រយោជន៍​ជាតិ​កាន់​តែ​ធ្ងន់ធ្ងរ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស