រដ្ឋមន្ត្រីក្រសួងការពារជាតិ បានជំរុញឲ្យពលរដ្ឋចូលរួមទប់ស្កាត់វប្បធម៌លាបពណ៌គ្នាបន្តទៀត ព្រោះលោកថា ការលាបពណ៌គ្នានេះនឹងរុញឱ្យកម្ពុជាធ្លាក់ចូលទៅក្នុងវិបត្តិសង្គ្រាមស៊ីវិលដូចពីអតីតកាល។
ទំព័រហ្វេសប៊ុករបស់រដ្ឋមន្ត្រីក្រសួងការពារជាតិលោកទៀ ចាញ់បានលើកឡើងថា ការលាបពណ៌ជាមូលហេតុចម្បងដែលធ្វើឱ្យប្រជាជាតិ មានការស្អប់គ្នា ហើយយកគ្នាជាសត្រូវ និងសងសឹកគ្នារហូតឈានដល់ការកើតមានជាសង្គ្រាមដែលមិននឹកស្មានដល់។
រដ្ឋមន្ត្រីក្រសួងការពារជាតិរូបនេះសង្ឃឹមថា ប្រជាពលរដ្ឋកម្ពុជាគ្រប់រូបនឹងស្វែងយល់អំពីរូបភាព និងផលវិបាកនៃការលាបពណ៌គ្នានេះ ដោយត្រូវរួមគ្នាទប់ស្កាត់ឱ្យខាងតែបាននូវរាល់សកម្មភាពលាបពណ៌នៅក្នុងសង្គមកម្ពុជាផងដែរ។
សង្គមកម្ពុជាបច្ចុប្បន្នត្រូវបានគេមើលឃើញថា វប្បធម៌នៃការលាបពណ៌គ្នានេះរីកដុះដាលកាន់តែទូលំទូលាយហើយអ្នកដែលបណ្តុះវប្បធម៌អាក្រក់មួយនេះគឺកើតចេញពីអ្នកនយោបាយតែម្តង។
កន្លងមកអតីតប្រធានគណបក្សប្រឆាំងលោកសម រង្ស៊ីធ្លាប់បានចោទក្រុមបក្សកាន់អំណាច ជាពិសេសលោកហ៊ុន សែនថាជាអាយ៉ងយួន ហើយក្រោយមកក៏ក្លាយជាអាយ៉ងរបស់ចិនជាដើម។
ក្រៅពីនេះ លោកបានចោទក្រុមលោកហ៊ុន សែនថាជាក្រុមក្បត់ជាតិ តាមរយៈលួចសម្បត្តិជាតិ កែងប្រវ័ញ្ច គាបសង្កត់ពលរដ្ឋ ប្រព្រឹត្តអំពើពុករលួយ និងបំផ្លិចបំផ្លាញធនធានធម្មជាតិ។ មិនតែប៉ុណ្ណោះក្រុមបក្សប្រឆាំងក៏ត្រូវបានគេមើលឃើញដែរថា កំពុងប្រើយុទ្ធនាការ និងរូបភាពនៃការលាបពណ៌ទៅលើក្រុមបក្សប្រឆាំងខ្លួនឯងឬទៅលើក្រុមសង្គមស៊ីវិលថា ជាក្រុមភ្នាក់ងារយួន ភ្នាក់ងារចារកម្មរបស់លោកហ៊ុន សែនជាអាយ៉ងរបស់លោកហ៊ុន សែនជាក្រុមក្បត់ជាតិ ក្រុមដង្កូវចេញពីសាច់ និងជាក្រុមអាត្រឹមត្រូវជាដើម។
ចំណែកក្រុមបក្សកាន់អំណាចវិញ ជាពិសេសលោកហ៊ុន សែននិងអ្នកនាំពាក្យរបស់ខ្លួនក៏ធ្លាប់បានលាបពណ៌ឱ្យជនណាឬក្រុមណាដែលហ៊ានរិះគន់ការដឹកនាំរបស់ខ្លួនថា ជាក្រុមពួកអគតិ ក្រុមអាយ៉ងលោកសេរី ក្រុមឧទ្ទាមក្រៅច្បាប់ ក្រុមបដិវត្តន៍នេះ បដិវត្តន៍នោះជាដើម។
ជាក់ស្តែង កាលពីខែកុម្ភៈ ឆ្នាំមុន រដ្ឋាភិបាលបានចេញផ្សាយសៀវភៅ «ស»ដែលអះអាងថា កម្ពុជាកំពុងកើតមាននូវបដិវត្ដន៍ពណ៌មួយ ដែលរៀបចំឡើងដោយអតីតគណបក្សប្រឆាំង ដើម្បីផ្ដួលរំលំរដ្ឋាភិបាលស្របច្បាប់។ ក្រៅពីនោះ រដ្ឋាភិបាលក៏បានចោទប្រកាន់អង្គការ សង្គមស៊ីវិលជាង៣០០ថា បានចូលរួមនិងគាំទ្របដិវត្តន៍នោះថែមទៀត។
កាលពីសម័យខ្មែរក្រហម ក្រោយពេលក្រុមនេះ ទទួលបានអំណាចពេញដៃពួកគេចាប់ផ្តើមបែងចែកពលរដ្ឋរួមមានពលរដ្ឋថ្មីឬ ពលរដ្ឋ១៧មេសានិងពលរដ្ឋចាស់ ឬពលរដ្ឋមូលដ្ឋាន។
ក្រុមខ្មែរក្រហមក៏បែងចែកទៀតអំពីក្រុមកម្មាភិបាល ឬ ក្រុមអង្គការ ដែលបានលើកខ្លួនឯងថា ជាមនុស្សស្អាតស្អំ ដោយចោទប្រកាន់អ្នកប្រឆាំងនឹងខ្លួនថា ជាក្រុមប្រតិកិរិយាឬជាភ្នាក់ងារ KGBរបស់រុស្ស៊ី ឬជាភ្នាក់ងារស៊ីអាយអេ CIAរបស់អាមេរិក និងជាពួកខ្មាំងក្បត់នឹងអង្គការជាដើម។
លទ្ធផលនៃការលាបពណ៌គ្នានៅចន្លោះឆ្នាំ១៩៧៥ដល់ឆ្នាំ ១៩៧៩ពេលនោះបានធ្វើឱ្យពលរដ្ឋខ្មែរជិត២លាននាក់បាត់បង់ជីវិត ហើយចុងក្រោយរបបនេះក៏ដួលរលំផងដែរ៕