រដ្ឋាភិបាលតាមរយៈក្រសួងមហាផ្ទៃ បានសម្រេចជ្រើសរើសស្រុកចំនួន២៩ក្នុងខេត្តចំនួន២១នៅទូទាំងប្រទេសដើម្បីបង្កើតជាច្រកចេញចូលតែមួយ បន្ថែមទៀតនៅឆ្នាំ២០១៩ ដោយថា ដើម្បីផ្តល់សេវាសាធារណៈជូនប្រជាពលរដ្ឋឱ្យកាន់តែមានភាពងាយស្រួល។
សេចក្តីសម្រេចរបស់ក្រសួងមហាផ្ទៃកាលពីមិ្សលមិញ បានជ្រើសរើសស្រុកចំនួន២៩ក្នុងខេត្តចំនួន២១របស់កម្ពុជាធ្វើជាគោលដៅបង្កើតច្រកចេញ-ចូលតែមួយ ដោយលោកស ខេងបានណែនាំឱ្យ ស្រុកគោលដៅក្នុងខេត្តទាំង២១នោះត្រូវរៀបចំការិយាល័យច្រកចេញចូលតែមួយឱ្យបានល្អប្រសើរ ស្របតាមប្រកាសរបស់ក្រសួង កាលពីថ្ងៃទី១២ ខែមីនាឆ្នាំ២០០៩ស្តីពីការរៀបចំ និងការបង្កើតការិយាល័យច្រកចេញចូលតែមួយនៅក្នុងក្រុង ស្រុក ខណ្ឌ តាមគោលដៅ។
កន្លងមក លោកស ខេងធ្លាប់បានលើកឡើងថា ការបង្កើតច្រកចេញ-ចូលនៅតាមស្រុក ខណ្ឌ ក្នុងខេត្តនៅទូទាំងប្រទេសបានផ្តល់នូវអត្ថប្រយោជន៍ច្រើនដល់ការផ្តល់សេវាសាធារណៈកាន់តែមានភាពងាយស្រួលដល់ប្រជាពលរដ្ឋ និងកាត់បន្ថយការប្រព្រឹត្ត អំពើពុករលួយផងដែរ។ ទន្ទឹមគ្នានេះ ការបង្កើតឱ្យមានច្រកចេញ-ចូលតែមួយ គឺជាការបង្ខិតសេវាសាធារណៈឱ្យកាន់តែជិតប្រជាពលរដ្ឋ ដោយចំណេញទាំងពេលវេលា និងកាត់បន្ថយ ការចំណាយក្រៅផ្លូវការផងដែរ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោកសន ជ័យហៅការសម្រេចនេះថាជារឿងល្អ និងងាយស្រួលសម្រាប់ពលរដ្ឋ ប៉ុន្តែលោកស្នើឱ្យមានការពង្រីកសេវាកម្មផ្សេងៗ ទៅកាន់ច្រកចេញចូលនៅតាមស្រុកគោលដៅទាំងនោះ ដូចជាសេវាធ្វើស្លាកលេខម៉ូតូឬ រថយន្តនិងការចុះបញ្ជីយានជំនិះផងដែរ។
ក្រៅពីនេះ សេវាកម្មធ្វើប៉ាស្ព័រឬវីហ្សា លោកថា គប្បីផ្ទេរភារកិច្ចនេះឱ្យបានទូលំទំលាយទៅកាន់ច្រកចេញចូលតែមួយផងដែរ ព្រោះវានឹងបង្កភាពងាយស្រួលជូនពលរដ្ឋព្រមទាំងកាត់បន្ថយការចំណាយផ្សេងៗទៀតផង៕