មេដឹកនាំបក្សសង្គ្រោះជាតិដែលកំពុងរស់នៅនីរទេសបានប្រកាសជាថ្មីទៀតថា ពលករខ្មែររាប់ពាន់នាក់ក្នុងប្រទេសកូរ៉េខាងត្បូងនឹងត្រឡប់ទៅប្រទេសកម្ពុជាដើម្បីចូលរួមស្តារប្រជាធិបតេយ្យ។
លោកសម រង្ស៊ីអះអាងនៅលើបណ្តាញហ្វេសប៊ុកថ្ងៃទី២៦ខែមេសា នេះថា ពលករខ្មែររាប់ពាន់នាក់នៅប្រទេសកូរ៉េខាងត្បូង នឹងវិលត្រឡប់ទៅកម្ពុជាវិញ ជាមួយលោកក្នុងពេលឆាប់ៗខាងមុខនេះ។
ប៉ុន្តែលោកសម រង្ស៊ីមិនទាន់កំណត់ពេលវេលាជាក់លាក់ដែលលោកត្រូវវិលត្រឡប់ទៅប្រទេសកម្ពុជាវិញនៅឡើយទេ។
ការអះអាងរបស់លោកសម រង្ស៊ីបែបនេះធ្វើឡើងក្រោយពីលោកបានទៅចូលរួមសមាជអ្នកប្រជាធិបតេយ្យ និងដឹកនាំបាតុកម្មភ្លើងទៀន នៅប្រទេសកូរ៉េខាងត្បូងដែលមានពលរដ្ឋខ្មែរធ្វើការងាររាប់ពាន់នាក់ចូលរួមកាលពីសប្តាហ៍មុន។
មេដឹកនាំគណបក្សប្រឆាំងរូបនេះធ្លាប់អះអាងថា លោកនឹងត្រឡប់ទៅប្រទេសកម្ពុជាវិញដើម្បីចូលរួមជាមួយពលរដ្ឋដើម្បីទម្លាក់លោកហ៊ុន សែនពីតំណែងប៉ុន្តែលោកតែងតែផ្លាស់ប្តូរកាលបរិច្ឆេទក្នុងការវិលត្រឡប់ចូលស្រុកវិញជាញឹកញាប់ ស្របពេលដែលលោកហ៊ុន សែនតែងប្រកាសអំពីគម្រោងការក្នុងចាប់ខ្លួន និងកម្ទេចក្រុមបក្សប្រឆាំង។
ទោះយ៉ាងនេះក្តី លោកសម រង្ស៊ីអះអាងថា នេះជាលើកចុងក្រោយសម្រាប់លោកដែលនឹងវិលទៅកម្ពុជាវិញក្នុងឆ្នាំ២០១៩នេះ៕