លោកហ៊ុន សែន នៅថ្ងៃនេះបានលើកទឹកចិត្តដល់អ្នកមានទ្រព្យធនច្រើនឲ្យមានចិត្តចែករំលែកដល់ជនដែលងាយរងគ្រោះ ឬអ្នកក្រដើម្បីធានាភាពសុខសាន្តក្នុងសង្គម។
ការអះអាងរបស់លោកហ៊ុន សែន ធ្វើឡើងក្នុងពិធីប្រារព្ធទិវាពិភពលោកកាកបាទក្រហម ក្រោមប្រធានបទ«ខ្ញុំស្រឡាញ់កាកបាទក្រហមកម្ពុជា» ក្នុងទីក្រុងភ្នំពេញនៅថ្ងៃទី៨ខែឧសភា។
លោកហ៊ុន សែនអះអាងថា មុនឆ្នាំ១៩៧០សមិទ្ធផលជាតិចំនួន៩០%កើតចេញពីការចែករំលែករបស់សហគមន៍ ហើយថា បច្ចុប្បន្ននេះសមិទ្ធផលជាតិពាក់កណ្តាលចេញពីរដ្ឋាភិបាល ហើយពាក់កណ្តាលទៀតបានមកពីការចែករំលែក។
លោកគឹម សុខអ្នកវិភាគនយោបាយសង្គមដែលកំពុងរស់នៅនីរទេសក្នុងប្រទេសហ្វាំងឡង់គេចពីការធ្វើទុក្ខបុកម្នេញដោយរដ្ឋាភិបាលទីក្រុងភ្នំពេញបានប្រាប់សារព័ត៌មានThe Cambodia Dailyថា សាររបស់លោកហ៊ុន សែនគ្រាន់តែជាសារដដែលៗដែលលោកហ៊ុន សែន ដឹកនាំជាង៣០ឆ្នាំមកនេះមិនបានបង្កើតប្រព័ន្ធគ្រប់គ្រងរដ្ឋឲ្យបានច្បាស់លាស់។
លោកបន្តថា លោកហ៊ុន សែនគួរតែពង្រឹងវិស័យអប់រំឲ្យមានកម្រិតខ្ពស់ប្រកបដោយសីលធម៌ និងគុណធម៌ ហើយថា អ្នកដឹកនាំត្រូវមានការចេះដឹងខ្ពស់ហើយអាចសាបព្រោះសីលធម៌ និងគុណធម៌ខ្ពស់ក្នុងការប្រកួតប្រជែងលើឆាកនយោបាយ។ លោកបន្តថាវប្បធម៌ចែករំលែកត្រូវធ្វើឡើងដោយសេចក្តីថ្លៃថ្នូរក្នុងសង្គមមួយប្រកបដោយយុត្តិធម៌និងសមធម៌។
របាយការណ៍ឆ្នាំ២០១៨កន្លងទៅបង្ហាញថា កាកបាទក្រហមកម្ពុជាបានផ្តល់អំណោយមនុស្សធម៌ដល់ពលរដ្ឋរងគ្រោះ និងងាយរងគ្រោះបំផុតជាង១សែន៣ម៉ឺនគ្រួសារនិងផ្តល់ផ្ទះជិត១៧០ខ្នងដល់ជនចាស់ជរាគ្មានទីពឹង ឬស្ត្រីមេម៉ាយដែលមានកូនច្រើន៕