រដ្ឋាភិបាលកម្ពុជាតាមរយៈក្រសួងពាណិជ្ជកម្មបានអំពាវនាវឱ្យក្រុមវិនិយោគិនចិនមកវិនិយោគនៅកម្ពុជាឱ្យបានកាន់តែច្រើនបន្ថែមទៀត។
ទំព័រហ្វេសប៊ុករបស់ក្រសួងពាណិជ្ជកម្មកាលពីម្សិលមិញបានជំរុញឱ្យសាស្ត្រាចារ្យ បុគ្គលិក និងនិស្សិតនៃសាកលវិទ្យាល័យចិន ស៊ិនជិនជួយផ្សព្វផ្សាយអំពីសក្តានុពល និងឱកាសធុរកិច្ចដល់វិនិយោគិនចិន ដើម្បីឱ្យពួកគេកាន់តែចាប់អារម្មណ៍និងផ្តល់ឱកាសវិនិយោគនៅកម្ពុជាបន្ថែមទៀត។
រដ្ឋមន្រ្តីក្រសួងពាណិជ្ជកម្មលោកប៉ាន សូរស័ក្តិបានលើកឡើងថា ការអនុវត្តយុទ្ធសាស្រ្តខ្សែក្រវ៉ាត់មួយនិងផ្លូវមួយរបស់ចិនគឺនាំមកនូវផលប្រយោជន៍យ៉ាងច្រើនដល់កម្ពុជា។ មិនតែប៉ុណ្ណោះលោកថា គម្រោងនេះគឺដើម្បីពង្រឹងកិច្ចសហប្រតិបត្តិការអន្តរជាតិ ដែលបាននាំមកនូវការតភ្ជាប់ហេដ្ឋារចនាសម្ព័ន្ធសេដ្ឋកិច្ច វិនិយោគ ហិរញ្ញវត្ថុ និងវប្បធម៌ ជាមួយប្រទេសនានាក្នុងតំបន់និងពិភពលោក។
យ៉ាងណាក៏ដោយ កាលពីពេលថ្មីៗនេះ សហរដ្ឋអាមេរិកបានលើកឡើងថា គម្រោងផ្លូវមួយខ្សែក្រវ៉ាត់មួយរបស់ចិន គឺជាអន្ទាក់នៃបំណុល ជាពិសេសសម្រាប់ប្រទេសក្រីក្រ និងប្រទេសកំពុងអភិវឌ្ឍន៍ប៉ុណ្ណោះ។
គម្រោងផ្លូវមួយខ្សែក្រវ៉ាត់មួយរបស់ចិនត្រូវបានផ្តួចផ្តើមឡើងដោយ ប្រធានាធិបតីចិនលោកស៊ី ជីងពីងកាលពីឆ្នាំ២០១៣ដើម្បីរំលឹកនិងធ្វើឲ្យរស់ឡើងវិញនូវផ្លូវសូត្រ ដែលចិនធ្លាប់មានតួនាទីសំខាន់កាលពីអតីតកាល។
ផ្លូវមួយខ្សែក្រវ៉ាត់មួយរបស់ចិនក៏ជាគម្រោងកសាងហេដ្ឋារចនាសម្ព័ន្ធ ផ្លូវថ្នល់ ស្ពាន ផ្លូវរថភ្លើងល្បឿនលឿន កំពង់ផែ បំពង់បង្ហូរប្រេង បំពង់បង្ហូរឧស្ម័ន ខ្វាត់ខ្វែងចេញពីអឺរ៉ុបឆ្លងកាត់រុស្ស៊ី និងអាស៊ីកណ្តាល ចេញពីអាហ្វ្រិកឆ្លងកាត់ដើមបូព៌ា និងអាស៊ីខាងត្បូង ចេញពីចិន ឆ្លងកាត់មកអាស៊ីអាគ្នេយ៍ជាដើម។
ក្រៅពីហេដ្ឋារចនាសម្ព័ន្ធដឹកជញ្ជូនគម្រោងនេះ ក៏មានការកសាង តំបន់សេដ្ឋកិច្ចពិសេស តំបន់ឧស្សាហកម្មផ្តាច់មុខ ជាច្រើនកន្លែងនៅតាមប្រទេសក្នុងគម្រោងទាំងអស់៦៥ប្រទេស ដែលគិតជាទឹកប្រាក់មានតម្លៃប្រមាណ១០០ម៉ឺនលានដុល្លារសហរដ្ឋអាមេរិក៕