ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជាហៅកាត់ថា ក.ផ.ផ.គ្រោងនឹងលើកបញ្ហាសំខាន់ៗមួយចំនួនពាក់ព័ន្ធវិស័យទេសចរណ៍ ដាក់ជូនរាជរដ្ឋាភិបាលដោះស្រាយ ដើម្បីទាក់ទាញកំណើនទេសចរបន្ថែមទៀត។
ទំព័រហ្វេសប៊ុករបស់ក្រសួងទេសចរណ៍នៅថ្ងៃនេះ ឱ្យដឹងថា ក្នុងចំណោមបញ្ហាទាំងឡាយបញ្ហាប្រព័ន្ធហេដ្ឋារចនាសម្ព័ន្ធនៅតាមតំបន់គោលដៅទេសចរណ៍មួយចំនួន ពិសេសនៅក្រុងសៀមរាបដែលមិនទាន់មានការរៀបចំឱ្យបានត្រឹមត្រូវគឺជាឧបសគ្គរំខានដល់ទឹកចិត្តភ្ញៀវទេសចរបរទេសមកលេងកម្សាន្តនៅកម្ពុជា។
ក្នុងកិច្ចប្រជុំរបស់ក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជាកាលពីថ្ងៃម្សិលមិញ រដ្ឋមន្ត្រីក្រសួងទេសចរណ៍លោកថោង ខុនដែលប្រធានក្រុមប្រឹក្សាភិបាលនេះព្រមទាំងសមាជិករបស់ខ្លួនបានលើកឡើងបញ្ហានិងដំណោះស្រាយសំខាន់ៗមួយចំនួនរួមមានការស្នើចង់ឱ្យមានការលើកលែងទិដ្ឋាការជូនភ្ញៀវទេសចរអន្តរជាតិ។ ការពង្រីកជើងហោះហើរពីប្រទេសឥណ្ឌាដើម្បីទាក់ទាញកំណើនទេសចរឥណ្ឌា និងទេសចរនៅប្រទេសឥណ្ឌាបន្ថែម។
ការបង្កើតផលិតផលទេសចរណ៍ថ្មីៗឱ្យបានច្រើននៅខេត្តសៀមរាប ដើម្បីបំពេញតម្រូវការកម្សាន្តជូនភ្ញៀវទេសចរក្រៅពីប្រាសាទអង្គរវត្ត និងប្រាសាទសំខាន់ដទៃទៀត ពិសេសលោកក៏បានលើកពីបំណងចង់រៀបចំតំបន់បឹងទន្លេសាបនិងតំបន់ជួរភ្នំគូលេងគោលដៅទេសចរណ៍ថ្មីសម្រាប់កម្ពុជានិងដោះស្រាយបញ្ហាលក់វត្ថុអនុស្សាវរីយ៍ និងទំនិញនានាជូនភ្ញៀវទេសចរឱ្យបានត្រឹមត្រូវ ខណៈមានការក្លែងបន្លំលក់ទំនិញក្លែងក្លាយនិងទំនិញគ្មានគុណភាពឱ្យភ្ញៀវនៅតែមាន។
បញ្ហាប្រព័ន្ធហេដ្ឋារចនាសម្ព័ន្ធនៅក្នុងក្រុងសៀមរាបនិងនៅតាមតំបន់ទេសចរណ៍មួយចំនួនមិនទាន់រៀបចំឱ្យសមរម្យដែលបង្កជាឧបសគ្គដល់ភ្ញៀវទេសចរចង់មកទស្សនានៅកម្ពុជាជាដើម។
ក្រៅពីនេះនៅមានបញ្ហាមួយចំនួនទៀតដែលប៉ះពាល់ដល់ការទាក់ទាញកំណើនទេសចរអន្តរជាតិហើយអង្គប្រជុំបានឯកភាពគ្នានឹងលើកបញ្ហាទាំងនេះទៅពិភាក្សាគ្នាបន្តបន្ទាប់ទៀត ហើយនឹងដាក់ជូនរាជរដ្ឋាភិបាលដើម្បីកំណត់យុទ្ធសាស្ត្រដោះស្រាយឱ្យបានត្រឹមត្រូវ៕