លោកហ៊ុន សែននិងគណៈប្រតិភូជាន់ខ្ពស់របស់លោកបាននាំគ្នាទៅចូលរួមសន្និបាតលើកទី៧៥ នៃគណៈកម្មាធិការសេដ្ឋកិច្ច និងសង្គមនៃអង្គការសហប្រជាជាតិសម្រាប់តំបន់អាស៊ី–ប៉ាស៊ីហ្វិក(UN-ASCAP)ក្នុងទីក្រុងបាងកកប្រទេសថៃនាព្រឹកនេះហើយលោកនឹងវិលត្រឡប់មកដល់កម្ពុជាវិញនៅរសៀលនេះផងដែរ។
ហ្វេសប៊ុករបស់លោកហ៊ុន សែននៅព្រឹកនេះអះអាងថា ការដឹកនាំប្រតិភូទៅនេះគឺដើម្បីចូលរួមសន្និបាតប្រចាំឆ្នាំលើកទី៧៥របស់គណៈកម្មាធិការសេដ្ឋកិច្ចនិងសង្គមនៃអង្គការសហប្រជាជាតិសម្រាប់តំបន់អាស៊ី-ប៉ាស៊ីហ្វីក(UN-ESCAP)មូលបទ«ការផ្តល់សិទ្ធិអំណាចជូនប្រជាជននិងការធានាការចូលរួមរបស់ពលរដ្ឋក្នុងដំណើរការអភិវឌ្ឍន៍ជាតិនិងសមភាព»ដែលនឹងប្រារព្ធឡើងនៅថ្ងៃនេះ។
លោកហ៊ុន សែនអះអាងថា នៅវាទិកានេះលោកក៏បានថ្លែងសុន្ទរកថាគន្លឹះទៅកាន់ សន្និបាតប្រចាំឆ្នាំលើកទី៧៥របស់គណៈកម្មាធិការសេដ្ឋកិច្ច និងសង្គមនៃអង្គការសហប្រជាជាតិសម្រាប់តំបន់អាស៊ី-ប៉ាស៊ីហ្វីក(UN-ESCAP) ក្រោមមូលបទ«ការផ្តល់សិទ្ធិអំណាចជូនប្រជាជននិងការធានាការចូលរួមរបស់ពលរដ្ឋក្នុងដំណើរការអភិវឌ្ឍន៍ជាតិនិងសមភាព»។
ប្រភពដដែលបញ្ជាក់ថា សន្និបាតប្រចាំឆ្នាំនេះនឹងប្រព្រឹត្តទៅចាប់ពីថ្ងៃទី២៧ដល់ថ្ងៃទី៣១ខែឧសភាឆ្នាំ២០១៩ហើយគោលបំណងដ៏ចម្បងនៃសន្និបាតនេះគឺដើម្បីពិនិត្យ និងអនុម័តលើរបាយការណ៍ការងារដែលUN-ESCAPនិងរដ្ឋជាសមាជិកបានអនុវត្តក្នុងឆ្នាំ២០១៨និងអនុម័តលើផែនការ ព្រមទាំងកម្មវិធីអភិវឌ្ឍន៍ផ្សេងៗទៀត ដែលបានស្នើឡើងដោយUN-ESCAPនិងរដ្ឋជាសមាជិកសម្រាប់ឆ្នាំ២០១៩។
សន្និបាតប្រចាំឆ្នាំនេះក៏នឹងមានការយាងចូលរួមពីម្ចាស់ក្សត្រីមហាចក្រីសិរិនថន និងមានការអញ្ជើញចូលរួមពីប្រធានាធិបតីនាយករដ្ឋមន្ត្រី ឧបនាយករដ្ឋមន្ត្រី រដ្ឋមន្ត្រី ឧត្តមមន្ត្រីនិងមន្ត្រីនៃរដ្ឋជាសមាជិកចំនួន៥៣ប្រទេសនៃតំបន់អាស៊ី និងប៉ាស៊ីហ្វិកតំណាងស្ថាប័នសំខាន់ៗរបស់អង្គការសហប្រជាជាតិ អង្គការអន្តរជាតិដៃគូអភិវឌ្ឍន៍ ស្ថាប័នហិរញ្ញវត្ថុអន្តរជាតិ អង្គការក្រៅរដ្ឋាភិបាល សង្គមស៊ីវិលនិងវិស័យឯកជនជាច្រើនទៀត។
របាយការណ៍ និងផែនការសកម្មភាពទាំងនោះនឹងដាក់ជូនក្រុមប្រឹក្សាសេដ្ឋកិច្ច និងសង្គមកិច្ចអង្គការសហប្រជាជាតិ(ECOSOC)និងអង្គមហាសន្និបាតប្រចាំឆ្នាំរបស់អង្គការសហប្រជាជាតិនៅក្នុងអំឡុងខែកញ្ញានៅបូរីញូយ៉ក សហរដ្ឋអាមេរិកផងដែរ៕