28 C
Phnom Penh

អគ្គ​ស្នងការ​នគរបាល​ជាតិ​ស្នើ​ឱ្យ​ផ្តល់​ព័ត៌មាន​បញ្ហា​ព្រំដែន​ជា​ប្រចាំ​ដើម្បី​ងាយ​ស្រួល​គ្រប់គ្រង​សភាព​ការណ៍​

ដោយ ឌឹ ខេមបូឌា ដេលី

បទវិភាគ

អគ្គ​ស្នងការ​នគរបាល​ជាតិ​បាន​ណែនាំ​ឱ្យ​មន្ត្រី​សមត្ថ​កិច្ច​ទាំងឡាយ​នៅ​តាម​បណ្តោយ​ព្រំដែន​ទាំងអស់​ត្រូវ​រាយ​ការណ៍​ព័ត៌មាន​អំពី​សភាព​ការណ៍​នៅ​តាម​ព្រំដែន​ដែល​ខ្លួន​គ្រប់គ្រង​ដើម្បី​ងាយ​ស្រួល​តាមដាន ​និង​គ្រប់គ្រង​ស្ថានភាព​តាម​ព្រំដែន​ទាំង​នោះ។​

ភ្នាក់ការ​សារ​ព័ត៌មាន​​កម្ពុជា​AKP​នៅ​ថ្ងៃ​នេះ​ឱ្យ​ដឹង​ថា​ អគ្គ​ស្នងការ​នគរបាល​ជាតិ​លោក​នេត សាវឿន​បាន​ការ​ណែនាំ​ដល់​មន្ត្រី​តាម​ព្រំដែន​របស់​ខ្លួន​ដូច្នេះ​ ធ្វើ​ឡើង​ក្នុង​កិច្ច​ប្រជុំ​ការងារ​ព្រំដែន​នគរបាល​ជាតិ​កាល​ពី​ថ្ងៃ​ម្សិលមិញ។ ​

លោក​នេត សាវឿន​បាន​លើក​ឡើង​នូវ​បញ្ហា​ចំនួន​បី​ចំណុច​រួម​មាន​ កត្តា​រចនា​សម្ព័ន្ធ​នៃ​ការ​ដឹកនាំ ​និង​គ្រប់​គ្រង​កម្លាំង​នគរបាល​ការពារ​ព្រំដែន​  ​យន្តការ​ថ្នាក់​ជាតិ​ដែល​គ្រប់គ្រង​លើ​កិច្ចការ​ព្រំដែន ​និង​ទិស​ដៅ​ឆ្នាំ​២០១៩​របស់​អគ្គ​ស្នង​ការដ្ឋាន​នគរបាល​ជាតិ។​

កន្លង​មក​បទ​ល្មើស​មួយ​ចំនួន​តែងកើត​ឡើង​តាម​ច្រក​ព្រំដែន ​ដូចជា​បទ​ល្មើស​គ្រឿង​ញៀន ​ការ​រត់​ពន្ធ​ឈើខុស​ច្បាប់​ទៅ​ក្រៅ​ប្រទេស​ពិសេស​ប្រទេស​វៀតណាម ​ការ​រត់​ពន្ធ​មនុស្ស​ ឬ​ការ​ជួញ​ដូរ​មនុស្ស​ការ​រត់​ពន្ធ​អាវុធ​ និង​ការ​រត់ពន្ធ​ទំនិញ​ប្រើប្រាស់​ខុស​ច្បាប់​ជាដើម។​

កាលពី​ខែ​មិថុនា​ ឆ្នាំ​២០១៨​អាជ្ញាធរ​ខេត្ត​ស្ទឹងត្រែង​បាន​ឃាត់​ខ្លួន​ជនជាតិ​ខ្មែរ​បី​នាក់ ​ដែល​ធ្វើ​ដំណើរ​តាម​រថយន្ដ​ក្រុង​ពី​ប្រទេស​ឡាវ​មក​ភ្នំពេញ​ដោយ​សមត្ថ​កិច្ចរក​ឃើញ​ថា ​ជន​សង្ស័យ​ទាំងនោះ​បាន​ដឹក​ជញ្ជូន​ថ្នាំ​ញៀន​ ​មេតំហ្វេតាមីន​ម្ស៉ៅ​ចំនួន​១២០​គីឡូក្រាម​ក្នុង​រថយន្ត​ក្រុង​នោះ។​

យោង​តាម​របាយ​ការណ៍​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ក្នុង​ឆ្នាំ​២០១៨​​ សមត្ថ​កិច្ច​បាន​បង្រ្កាប​បទ​ល្មើស​គ្រឿង​ញៀន​ចំនួន​ជាង​៨​ពាន់​ករណី​ដោយ​រឹប​អូស​គ្រឿង​ញៀន​គ្រប់​ប្រភេទ​បាន​ចំនួន​​៥៣៣​គីឡូក្រាម៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស